4 Malaysian, timbog sa pagpatay sa kasama

ni Janice Baricuatro @News | August 1, 2026

Photo: File

Arestado ang apat na Malaysian national na umano’y sangkot sa brutal na pagpatay sa kanilang kasamahan na natagpuang duguan at tadtad ng saksak sa Sitio Ilayang Pulo, Brgy. Iba, Silang, Cavite.

Ayon sa imbestigasyon, matapos ang pananaksak ay tumakas ang mga suspek sakay ng Toyota Fortuner ngunit nahulog umano ang sasakyan sa kanal, kaya iniwan nila ito. Sumakay sila ng tricycle at nag-book umano ng Grab patungong Pasay City upang makatakas. 

Natunton sila ng pulisya sa tulong ng CCTV footage, pagkilala ng tricycle driver, at pakikipag-ugnayan sa Pasay City Police.

Inamin umano ng mga suspek ang kanilang pagkakasangkot sa krimen. 

Lumabas din sa paunang imbestigasyon na posibleng nasa impluwensya ng ilegal na droga ang mga ito nang gawin ang pananaksak.

Pares vendor pinagsasaksak ng kostumer, dedbol

ni Levi Gonzales @News | July 27, 2026

Photo: Batangas City Police Station - Circulated

Patay ang isang pares vendor matapos na umano'y pagsasaksakin ng hindi pa nakikilalang suspek sa Brgy. Tinga Labak, Batangas City.

Kinilala ang biktima na si “Anthony,” nasa hustong gulang, binata, tubong Mabini, Batangas at residente ng Brgy. Santa Rita Karsada, Batangas City.

Batay sa paunang imbestigasyon, nagtitinda ng pares ang biktima nang lapitan ng ilang kalalakihan na umorder ng pagkain. Matapos kumain, nagreklamo umano ang mga ito dahil wala umanong karne ang inihain na nauwi sa pagtatalo.

Sa kasagsagan ng komprontasyon, isa sa mga suspek ang umano'y bumunot ng balisong at ipinagsasaksak ang biktima na kanyang ikinasawi.

Patuloy ang imbestigasyon upang maaresto ang suspek.

Edad 12, 13 at 14... Single mom at 3 anak, minasaker sa bahay

ni Mai Ancheta @News | June 30, 2026

Photo: Ang bahay ng mag-iinang minasaker sa Brgy. Litapan, Josefina, Zamboanga del Sur. (Mai Ancheta)

Karumal-dumal na kamatayan ang sinapit ng isang ina at tatlong anak nito matapos madiskubre ang brutal na pagpatay sa mga ito sa loob ng kanilang bahay sa Brgy. Litapan, Josefina, Zamboanga del Sur kahapon ng umaga.

Ang mga biktima ay tadtad ng saksak sa iba't ibang bahagi ng katawan nang madiskubre ng mga otoridad.

Kinilala ang mga biktima na sina Arlene Fernan Dumalte, 42; mga anak na sina Nacel, 14; En-En, 13, at Arnel, 12-anyos.

Ayon kay Police Lt. Julito Pamalaran, nadiskubre ang krimen nitong Lunes ng umaga ng isang konsehal ng barangay na papunta sana sa kanyang bukid.

Napansin ng konsehal ang nakalitaw na duguang kamay sa isang butas ng dingding ng bahay ng mga biktima kaya agad na ipinaalam sa mga otoridad.

Ang ina ay isa umanong health worker at hiwalay ito sa kanyang asawa.

Huling nakita umanong buhay ang mga bata noong Sabado sa isang public WiFi station.

Nagpapatuloy ang imbestigasyon ng mga otoridad upang matukoy ang mga salarin at motibo ng karumal-dumal na pagpatay sa mga biktima.