Lalaking kinatay at kinain ang 69-anyos na ina, mahigit 15 taong kulong!

ni Lolet Abania | June 16, 2021

Hinatulan kahapon ng 15 taon at limang buwan na pagkakabilanggo ang isang lalaki ng Spanish court matapos na mapatunayang guilty sa pagpatay sa kanyang ina at kinain pa ang katawan nito.

Idineklara ng korte na si Albert S.G. – na tinaguriang “cannibal of Ventas” kung saan sa lugar na ito naganap ang krimen – ay matino o nasa katinuan sa panahong nangyari ang krimen at karapat-dapat na sentensiyahan ng pagkakabilanggo.

Nakatakda siyang ikulong ng 15 taon sa kasong homicide at limang buwan sa ginawang kalapastanganan sa isang bangkay matapos na tadtarin ang katawan ng kanyang ina at kainin ito sa loob ng halos 15 araw, habang ang iba nito ay ipinakain sa kanyang aso.

Naganap ang pagpatay noong 2019 sa isang flat o unit sa Ventas kung saan magkasama ang suspek at 69-anyos niyang nanay.

Ayon sa report, nagkaroon ng mainitang pagtatalo ang mag-ina hanggang sa sinakal ng suspek ang kanyang ina at kinaladkad papasok ng kuwarto nito, saka ginamitan ng isang lagari at dalawang kitchen knives para pagpuputulin.

“He began eating the remains over the course of about 15 days, storing other parts in various plastic containers around the house and in the fridge,” batay pa sa report.

Inilagay din ng suspek ang ibang labi sa plastic bags at itinapon ito sa basurahan. Sa pahayag ng local media mula sa isang testimonya ng police officer, inamin ng suspek na kinain niya ang ibang labi ng ina, habang ang ibang parte ng katawan nito ay kanyang iniluto at ipinakain sa kanyang aso.

Naaresto ang suspek noong February 23, 2019 nang dumating ang mga pulis sa kanilang tirahan matapos na i-report ng kaibigan ng kanyang ina na ito ay nawawala. Bukod sa pagkakakulong, hinatulan ding magbayad ang suspek ng €60,000 ($73,000) sa kanyang nakatatandang kapatid na lalaki.

Death penalty sa Kuwaiti at kulong sa mister na pumatay sa Pinay OFW

ni Thea Janica Teh | December 31, 2020

Kamatayan ang ipinataw na parusa ng Kuwait Criminal Court sa isang Kuwaiti habang 4 na taong pagkakakulong naman sa kanyang mister matapos i-torture at patayin ang isang Pinay domestic worker na si Jeanelyn Padernal Villavende noong 2019.

Ayon sa Philippine Embassy lead council na si Atty. Sheikha Fawzia Al-Sabah, patas umano ang naging desisyon ng korte.

Pinasalamatan din ni Philippine Ambassador to Kuwait Mohd Noordin Pendosina Lomondot si Sheikha Fawzia at ang pamahalaan ng Kuwait dahil sa nakuhang hustisya ni Villavende.

Matatandaang namatay si Villavende noong Disyembre 28, 2019 sa kamay ng kanyang mga employers. Ayon sa embalming certificate nito, namatay si Villavende dahil sa “acute failure of heart and respiration as result by (sic) shock and multiple injuries in the vascular nervous system.”

Call center agent na pumatay sa 2 anak, sumuko na nu’ng Pasko

ni Thea Janica Teh | December 26, 2020

Sumuko nitong Kapaskuhan sa Taguig City Police ang isang lalaking pumatay sa dalawa nitong anak isang araw matapos ang pagkamatay ng kanyang asawa.

Kinilala ang suspek na si Aiko Siancunco, 28-anyos na pumatay sa 3-anyos na anak na babae at 1-anyos na anak na lalaki sa kanilang bahay sa Barangay North Signal. Ayon kay City Police Chief Col. Celso Rodriguez, puno umano ng dugo ang puting t-shirt ng suspek noong ito ay sumuko.

Kuwento pa ni Rodriguez, sumuko umano si Siancunco matapos nitong mapigilan ang pagtangkang pagbibigti. Agad na pinuntahan ng mga pulis ang bahay ng suspek at nakita ang labi ng dalawa nitong anak sa kama.

Sa isang pahayag, napag-alamang nagtrabaho bilang call center agent si Siancunco at ang asawa nito. Matagal na umanong nagtatalo ang dalawa dahil nahihirapang maghanap ng trabaho simula nang ipatupad ang lockdown noong Marso dahil sa COVID-19. Sa ngayon ay nahaharap sa kasong parricide ang suspek.