10,016 pinakamataas na COVID-19 cases sa isang araw

ni Ronalyn Seminiano Reonico | March 29, 2021

TULAD ng kinatatakutan, umabot na at nakapagtala ang bansa ng pinakamataas na bilang ng karagdagang kaso ng COVID-19 ngayong araw na umabot sa 10,016 at sa kabuuan ay pumalo na sa 731,894 ang naitalang kaso.

Ayon sa Department of Health (DOH), pumalo na sa 115,495 ang bilang ng mga aktibong COVID-19 cases sa bansa kung saan 95.9% ang mild, 2.4% ang asymptomatic, 0.7% ang kritikal at 0.7% ang may severe condition.

Umakyat naman sa 603,213 ang bilang ng mga gumaling na matapos maitala ng DOH ang karagdagang 78 pasyente ngayong araw.

Samantala, 16 ang naitalang pumanaw dahil sa COVID-19 at sa kabuuan ay 13,186 na ang death toll sa bansa.

206 cases ng COVID… Isabela, state of calamity na, humirit pa ng mas mahigpit na lockdown

ni Mary Gutierrez Almirañez | March 27, 2021

Umapela si Mayor Jonathan Calderon upang ilagay sa mas mahigpit na lockdown ang bayan ng Roxas, Isabela na kasalukuyang nasa state of calamity matapos makapagtala ng 206 na kumpirmadong kaso ng COVID-19, batay sa naging panayam sa alkalde kaninang umaga, Marso 27.

Aniya, “Inaapela na po namin ito kung puwedeng maitaas ang kategorya ng quarantine status ng ating munisipalidad. Kailangan ito ng provincial at regional IATF para po sa concurrence.”

Sa ngayon ay nasa ilalim ng general community quarantine (GCQ) ang munisipalidad at nagdeklara sila ng state of calamity, kung saan 5 sa pribadong ospital, 20 clinics at isang district hospital ay napuno na ng mga pasyenteng may virus.

Paliwanag ng alkalde, “Alam natin na meron tayong pondo na hindi basta-basta puwedeng gamitin.

Sa katunayan, sa lokal na pamahalaan ng Roxas, meron lang po kaming maliit na pondo na maaaring hindi sapat ‘yung aming in-allot para sa COVID.”

Dagdag pa niya, “Ang aming bayan o public market ay hindi lamang kine-cater itong bayan ng Roxas kundi as many as 8 municipalities ang aming sine-serve dito at merong mga probinsiya gaya ng Kalinga, Mountain Province at part of Ifugao na bumababa sa aming bayan.”

Sa huling tala ay mahigit 71 ang nadagdag na nagpositibo sa virus, habang 21 ang gumaling at 2 ang pumanaw. Umaasa si Mayor Calderon na mare-reclassify ang kanilang lockdown status upang mapigilan ang pagkalat ng COVID-19 sa kanilang lugar.

7,103 bagong kaso ng COVID-19, pinakamataas na naitala

ni Ronalyn Seminiano Reonico | March 19, 2021

Pumalo na sa 648,066 ang kaso ng COVID-19 sa Pilipinas matapos maitala ang pinakamataas na karagdagang bilang na 7,103 sa loob lamang ng isang araw ngayong Biyernes mula nang tumama sa bansa ang coronavirus noong nakaraang taon.

Ayon sa Department of Health (DOH), sa tally ngayong Biyernes, hindi pa naisama ang datos mula sa 5 accredited laboratories dahil hindi nakapagsumite ang mga ito sa takdang oras.

Sa kabuuan ay umabot na sa 73,264 ang aktibong kaso kung saan 93.9% ang mild, 3.3% ang asymptomatic, 1.1% ang severe at 1% ang nasa kritikal na kondisyon.

Naitala rin ang 13 karagdagang bilang ng mga pumanaw at sa kabuuan ay umabot na ito sa 12,900.

Tumaas naman sa 390 ang bilang ng mga gumaling na at sa kabuuan ay 561,902 na.

Samantala, sa ngayon ay umabot na sa 241,000 ang bilang ng mga healthcare workers na nabakunahan at patuloy pa rin ang vaccination program ng pamahalaan.