Seafarer sa Iligan City, nagpositibo sa Omicron COVID-19 variant — DOH

ni Lolet Abania | January 8, 2022

Isang returning seafarer na taga-Iligan City ang naitala ng Department of Health (DOH) na nagpositibo sa test sa mas nakahahawang COVID-19 Omicron variant.

Ayon sa DOH, ang nasabing seafarer ay kabilang sa 29 Omicron variant cases na na-detect nitong Huwebes. Sinabi ng ahensiya na nag-travel ang seafarer mula sa Kenya at bumalik sa Iligan City nitong Disyembre 30.

“This case arrived on December 16, completed isolation until December 30. On December 30, he was discharged, transferred, and arrived in CDO (Cagayan de Oro),” ani DOH Undersecretary Maria Rosario Vergeire sa mga reporters ngayong Sabado.

Binanggit naman ng DOH na hindi ito kinokonsidera bilang unang kaso sa Mindanao, ang kaso ayon sa ahensiya ay kinaklasipika bilang isang returning overseas Filipino (ROF).

“Since this is an ROF po we do not count them under any region. Thus, there is still no case for Region 10 since wala pang local case doon,” sabi ni Vergeire.

Sa ngayon, nakapagtala na ang DOH ng 43 kumpirmadong Omicron variant cases sa bansa.

Ayon pa sa DOH, sa bagong kaso ng Omicron variant, 10 ay mga ROFs habang 19 ang mga local cases na ang mga address ay nasa National Capital Region (NCR).

Hotel binayaran, pumarty sa Makati… ‘Poblacion girl’ na nagkalat daw ng Omicron, trending sa socmed

ni Jasmin Joy Evangelista | December 30, 2021

Trending ngayon sa social media ang isang babaeng nagngangalang Gwyneth Chua matapos umanong lumabag sa quarantine protocols.

Ayon sa social media posts, galing si Chua sa ibang bansa at nang dumating sa Pilipinas ay nagbayad umano sa hotel facility upang payagang makalabas at hindi na mag-quarantine pa.

Ang ikinababahala ng netizens ay positibo umano ito sa Omicron variant ngunit dumalo pa ito ng party sa Poblacion, Makati kung saan nakahawa ito ng nasa 12 indibidwal.

Nakarating umano sa Department of Health (DOH) ang insidenteng ito at ayon sa ahensiya, iniimbestigahan pa ang kaso at nakikipag-ugnayan sa mga kinauukulang tanggapan upang maberipika ang pangyayari.

“The DOH is aware of a circulating social media post about an alleged individual who violated quarantine protocols. We are still investigating the case and coordinating with concerned offices to further determine the veracity of the claims in the said post,” pahayag ng DOH.

Sa ngayon ay patuloy na kumakalat ang usaping ito sa social media.

Mister ng ikaapat na kaso ng Omicron, nagpositibo sa COVID-19

ni Lolet Abania | December 28, 2021

Nagpositibo rin sa test sa COVID-19 ang mister ng iniulat na ikaapat na kaso ng Omicron variant habang nakatakdang isailalim ito sa genome sequencing, ayon sa Department of Health (DOH).

Sinabi ni DOH Undersecretary Maria Rosario Vergeire na na-traced na nila ang mga naging close contacts ng 38-anyos na babae na nanggaling sa United States at dumating sa Ninoy Aquino International Airport noong Disyembre 10.

“Her husband turned positive also. He’s currently in the isolation facility,” ani Vergeire sa isang interview ngayong Martes.

Ayon kay Vergeire, nakakolekta sila ng samples mula sa asawang lalaki at isinailalim ito sa genome sequencing, kung saan maaaring lumabas ang resulta matapos ang 24 hanggang 48 oras.

“What we are challenged with right now would be the submissions of laboratories in our epidemiology and surveillance units to submit immediately these samples to the Philippine Genome Center so we could immediately process and release the results at once,” paliwanag ni Vergeire.

Batay sa DOH, noong Disyembre 25, lumabas ang positibong resulta para sa Omicron variant ng naturang traveler at nakaiskedyul namang muli siyang i-test ng Martes.

Nakumpleto na rin ng traveler ang dalawang doses ng Moderna COVID-19 vaccine. Lumabas na rin mula sa isolation facility noong Biyernes at sa ngayon ay naka-home quarantine na habang patuloy siyang mino-monitor.

Sinabi pa ni Vergeire na ang pamilya ng traveler at mga naging close contacts sa bahay ay sumailalim na rin sa isolation.

Samantala, sinusubukan pa rin ng DOH na idetermina pa ang mga nakasalamuhang mga pasahero ng nasabing traveler sa Philippine Airlines flight PR 127.

“We are going to apply the epidemiological definition of close contact in terms of riding a plane—that would be four seats in front, four seats beside, and four seats at the back,” sabi ni Vergeire.

Sa hiwalay naman na interview, ayon kay Vergeire ang lahat ng apat na Omicron cases sa bansa ay “mild” symptoms lamang.

“’Yung isa nagkaroon ng cough pero after 2 or 3 days, was resolved. Itong latest natin na detection nagkaroon ng scratchy throat and parang colds, then after about 2 or 3 days also has resolved,” ani opisyal.

Gayunman, nilinaw ni Vergeire na hindi pa ito maituturing na conclusive dahil apat pa lamang na pasyente na tinamaan ng Omicron variant sa bansa ang kanilang inoobserbahan at wala pa silang nakikitang ibang katangian na mayroon sa Omicron variant.