COVID-19 vaccines, balasahin.. ‘Wag kayong mamili — P-Du30

ni Lolet Abania | October 20, 2021

Naglabas ng direktiba si Pangulong Rodrigo Duterte na i-shuffle o balasahin ang pamamahagi ng COVID-19 vaccines sa iba’t ibang lugar sa bansa.

Sa isang public address, muling nagbabala si Pangulong Duterte sa mga opisyal ng gobyerno na namimili umano ng ibibigay na bakuna kontra-COVID-19.

“Huwag kayong mamili. Sabi ko kay Secretary [Carlito] Galvez… ibabalasa ninyo. Iyong isang karton, itapon mo sa isa dito… So ang magdating sa inyo, halo,” pahayag ni P-Duterte.

Ayon sa Pangulo, kahit na mas pinapaboran ng karamihan ang COVID-19 vaccines na nagmula sa Western countries aniya, lahat ng mga bakuna ay ginawa at dinibelop ng mga taong may kakayahan at husay sa paggawa nito.

“If they are not effective and if they are not good, eh bakit ngayon halos wala nang patay?” saad ng Pangulo. Sa ngayon, nasa pitong brands ng COVID-19 vaccine ang ginagamit na sa bansa. Ito ay Pfizer, Moderna, Sinovac, AstraZeneca, Johnson & Johnson, Sinopharm at Gamaleya Institute.

Samantala, hanggang nitong Oktubre 18, nasa tinatayang 24.5 milyong Pilipino na ang fully vaccinated, kung saan higit 31 porsiyento sa year-end target ng gobyerno na mabakunahan.

Sinimulan ang pagbabakuna kontra-COVID-19 noong Marso 1. Aabot naman sa 53,315,069 ang kabuuang vaccine doses na na-administer ng pamahalaan. Halos 17 milyon dito ay sa Metro Manila, kasunod ang Calabarzon na nakapagbakuna na ng halos 8 milyong doses ng COVID-19 vaccines.

Ayon naman kay vaccine czar Carlito Galvez Jr., dapat ay nasa 50 milyon na ang nabakunahan upang makamit na ng bansa ang herd immunity at para magkaroon na rin ng ligtas na pagdiriwang ng Kapaskuhan.

Gamot kontra-COVID-19.. Ronapreve, binigyan ng EUA ng ‘Pinas

ni Lolet Abania | October 7, 2021

Inaprubahan na ng bansa ang aplikasyon para sa emergency use authorization (EUA) bilang antibody treatment ang Ronapreve kontra-COVID-19.

Sinabi ni Food and Drug Administration (FDA) director-general Dr. Eric Domingo na nag-isyu ang ahensiya ng EUA sa Ronapreve bilang gamot na maaari lamang gamitin sa mga mild hanggang moderate COVID-19 cases para sa edad 12 at pataas.

“It’s the first one that has been granted an EUA sa atin na for treatment. Others are being used sa compassionate special permit, ang iba old drugs na may certificate of product registration na,” ani Domingo sa isang interview.

Ang Japan, unang bansa na ganap na inaprubahan o fully approve ang Ronapreve bilang antibody treatment para sa mga pasyenteng may mild hanggang moderate COVID-19.

Ayon sa isang Agence France-Presse report, “Phase 3 trials showed that the antibody cocktail dramatically reduced the likelihood that mild or moderate COVID-19 patients would develop into serious illness causing hospitalization or death.”

Ang Ronapreve ay dinibelop ng dayuhang biotechnology firms na Regeneron at Roche. Bukod sa Japan at Pilipinas, inaprubahan na rin para sa emergency use o temporary pandemic use ang Ronapreve ng ilang mga bansa kabilang na ang European Union, United States, India, Switzerland, at Canada.

889,200 doses ng Pfizer vaccine dumating na

ni Lolet Abania | October 2, 2021

Nakatanggap muli ang Pilipinas ng halos 900,000 doses ng Pfizer vaccine mula sa COVAX facility ngayong Sabado.

Ayon sa National Task Force Against COVID-19, may kabuuang 889,200 doses ng Pfizer vaccine ang dumating sa Ninoy Aquino International Airport Terminal 3 ng alas-4:15 ng hapon ngayong araw via flight EK332.

Sinalubong ang naturang COVID-19 vaccine nina vaccine czar Carlito Galvez Jr. at United States Agency for International Development Health Director Michelle Lang-Alli.

Ayon kay Galvez, ang ilang mga vaccine ay gagamitin para sa pilot implementation ng pagbabakuna sa mga kabataan na nasa edad 12 hanggang 17.

“We will still focus on inoculating our priority groups A2 and A3, but partly itong ibang dumarating na ito we will be given also to our possible children inoculation this coming October 15,” ani Galvez.

Sinabi ng vaccine czar na may alokasyon ang gobyerno ng tinatayang 60 milyon doses para sa pagbabakuna ng mga menor-de-edad.

“Meron tayong ia-allocate na, more or less, good for 17.7 people. Our population of adolescents and children is more or less 29 million. So we will be allocating more or less 60 million doses,” sabi ng opisyal.

Nagpasalamat naman si Galvez sa United States Embassy para sa ibinigay na mga Pfizer vaccines. Nagpahayag din ng kasiyahan si Alli at sinabing ang US ay malugod na nakapagbigay ng tulong sa Pilipinas sa paglaban nito kontra-COVID-19.

“Yes, this is part of the 5.5 million doses of vaccine that arrived this weekend here in Manila, but also down in Davao and Cebu,” sabi ni Alli. “The United States is very happy to be able to provide safe and effective vaccines not just to Manila but to the greater Philippines and the Central and Southern part of the Philippines as well,” dagdag niya.

Una nang inanunsiyo ng Amerika na magpapadala sila ng mahigit 8 milyon COVID-19 vaccine doses sa Bangladesh at sa Pilipinas para sa pinakabago nilang tulong sa gitna ng patuloy na paglaban ng buong mundo sa COVID-19 pandemic.