Galvez, nagpositibo sa test sa COVID-19

ni Lolet Abania | May 22, 2022

Sumailalim na ngayon si vaccine czar Secretary Carlito Galvez Jr. at kanyang pamilya sa isolation matapos na magpositibo siya sa test sa COVID-19.

Ayon kay Galvez, lumabas na positive siya sa test sa COVID-19 mula sa kanyang weekly RT-PCR test ngayong Linggo, Mayo 22, habang kasalukuyang nakararanas ng mild symptoms, subalit nananatili siya aniya, “in high spirits” dahil siya at kanyang pamilya ay fully vaccinated.

“I would like to apologize to the people whom I have come in contact with over the last five to seven days. I encourage them to have themselves tested and observe their health conditions,” pahayag ni Galvez.

“While I am under isolation, I will continue to monitor the country’s peace processes and vaccination efforts,” sabi pa ng Presidential Peace Adviser.

Nanawagan din si Galvez sa publiko na magpabakuna na sa madaling panahon, at para sa mga bakunado ay tanggapin naman ang kanilang booster shots.

Kaugnay nito, sa latest data mula sa Department of Health (DOH), sa ngayon ay nakapag-administered na ang bansa ng kabuuang 149.119 milyong doses ng COVID-19 vaccines hanggang nitong Mayo.

Gamit na hiringgilya, pinaglaruan... 7 bata, nagpositibo sa COVID

ni Lolet Abania | January 29, 2022

Pitong bata na pinaglaruan ang medical waste na kanilang natagpuan sa bisinidad sa kanilang lugar ang nagpositibo sa test sa COVID-19 ngayong Sabado, sa bayan ng Virac, Catanduanes.

Isinailalim ng mga awtoridad sa antigen test ang mga bata na nasa edad 3 hanggang 11, matapos na paglaruan ang mga gamit nang syringes o mga hiringgilya na itinapon sa baybayin ng Barangay Concepcion.

Isa babae naman na namataang pinagagalitan ang mga bata dahil sa pinaglalruan ng mga ito ang mga medical waste ay na-infect din sa COVID-19.

Sinabi ni Concepcion Barangay Chairman Anthony Arcilla na naka-isolate na ang mga bata at binigyan na rin ng mga bitamina at gamot.

Aniya, nakatakdang sumailalim sa RT-PCR testing ang mga ito sa Lunes.

Matatandaang unang natagpuan ang mga medical waste sa kahabaan ng baybayin ng Concepcion ngayon buwan.

Ayon sa mga barangay officials, inako na ng laboratoryo kung saan nanggaling ang naturang basura ang responsibilidad sa insidente at humingi na rin ng paumanhin sa ginanap na village council session.

Nabatid naman ng village council, na ang representative ng laboratoryo na dumalo sa sesyon ay nagpositibo sa test sa COVID-19, kaya ang mga council members na naging close contact ng lab representative ay sumailalim na rin sa quarantine.

891 empleyado ng SPMC sa Davao, may COVID

ni Lolet Abania | January 29, 2022

Halos 900 empleyado ng Southern Philippines Medical Center (SPMC) sa Davao, ang nagpositibo sa test sa COVID-19 ngayong buwan.

Ito ang kinumpirma ng medical chief ng SPMC na si Dr. Ricardo Audan na karamihan sa 891 empleyado na tinamaan ng virus ay sumailalim sa home isolation, habang 30 lamang ang na-admit sa healthcare facility. “I think it’s the work of Omicron.

Ang mabuti lang dito, ’yung lahat ng nag-positive, fully vaccinated. And I think, karamihan din, naka-booster na,” sabi ni Audan sa isang interview. Sinabi ni Audan na dahil sa kakulangan ng mga staff ng ospital, binawasan ng SPMC ang quarantine period ng mga infected na empleyado na mula sa 7 araw ay ginawang 5 araw na lamang.

“Bale sinunod din namin ’yung guidelines ng IATF na 7 days fully vaccinated, ginawa na naming 5 days (ang quarantine) kasi talagang medyo ma-paralyze ang operation. But then, hindi kami nag-close, patuloy pa rin ‘yung serbisyo namin sa mga tao,” sabi ni Audan.

Gayundin, humingi na ang pamunuan ng ospital ng karagdagang personnel mula sa Department of Health (DOH), subalit ani Audan, ang ahensiya ay wala ring sapat na staff para ibigay sa kanila.

Ayon kay Audan, sumulat na rin ang ospital kay National Task Force Against COVID-19 chief implementer Carlito Galvez Jr., hinggil sa request nila na mga health workers na mula sa Armed Forces of the Philippines (AFP) at sa Bureau of Fire Protection (BFP).

Una nang natugunan ng mga naturang ahensiya ang kakulangan ng staff sa SPMC nang maitala ang unang surge ng COVID-19 sa Davao Region noong nakaraang taon. Subalit, bumalik din ang mga personnel na ito matapos na lumuwag ang sitwasyon sa lugar.

Samantala, parehong ang ICU at ward bed utilization rates sa SPMC ay umabot na sa 100 percent, kung saan ang lahat ng kanilang 87 ICU beds at 473 ward beds ay okupado na.

“Wala kaming problema mag-expand. In fact, mayroon kaming waiting na another 60 beds for expansion. The problem is ’yung staffing talaga,” sabi pa ni Audan.

Ang SPMC, isa sa pinakamalalaking mga ospital sa bansa, ay pangunahing ginagamot ang mga moderate hanggang critical COVID-19 cases dahil na rin ito sa pagdami ng mga pasyenteng tinatamaan ng coronavirus.

Gayundin, pansamantalang isinara ng ospital ang kanilang outpatient department na face-to-face services, habang pinayuhan ang mga pasyenteng mag-virtual consultation na lamang sa ngayon.