Ji Chang Wook, positive sa COVID-19

ni Lolet Abania | July 26, 2021

Nagpositibo sa test sa COVID-19 ang Korean actor na si Ji Chang Wook.

Ayon sa report ng Soompi ngayong Lunes, isang source mula sa agency ni Ji Chang Wook na Glorious Entertainment ang nagkumpirma nito.

“Ji Chang Wook has tested positive for COVID-19. In accordance with health authority guidelines, he is in quarantine and receiving treatment,” pahayag ng naturang source.

Kasalukuyang ginagawa ni Chang Wook ang upcoming Netflix series na “The Sound of Magic” kasama sina Hwang In Yeop at Choi Sung Eun.

Itinigil na muna ang production nito kung saan ang lahat ng staff at cast members ay nakatakdang sumailalim sa test sa COVID-19.

Habang isinusulat ito, nasa 19th trending topic sa Pilipinas kabilang ang mahigit sa 4,000 tweets mula sa fans ni Ji Chang Wook ang nagdarasal ng kanyang agarang paggaling.

Kilala si Chang Wook sa kanyang mga Korean drama gaya ng “Suspicious Partner,” “Lovestruck in the City,” “Healer,” “7 First Kisses,” at iba pa.

Davao City VM Baste Duterte, positibo sa COVID-19

ni Lolet Abania | July 21, 2021

Nagpositibo si Davao City Vice-Mayor Sebastian “Baste” Duterte sa COVID-19, ayon sa kanyang kapatid na si Davao City Mayor Sara Duterte.

“Sa ngayon, via video call muna ang family kumustahan nang malaman naming positive sa COVID-19 si Vice-Mayor Baste. Get well soon, Vice! Smile,” ani Mayor Sara.

Batay sa kanyang post sa Facebook, nagsagawa ng video conference si Sara kasama ang amang si Pangulong Rodrigo Duterte, inang si Elizabeth Zimmerman, at mga kapatid na sina Davao City First District Representative Paolo Duterte at Davao City VM Sebastian Duterte.

Tiniyak naman ni Mayor Sara sa mga residente ng Davao City na patuloy ang serbisyo ng lokal na pamahalaan na katuwang pa rin ang kapatid na si VM Baste.

68 BFP trainees sa Baguio, positibo sa COVID-19

ni Ronalyn Seminiano Reonico | July 18, 2021

Nagpositibo sa COVID-19 ang 68 trainees ng Bureau of Fire Protection (BFP) sa Baguio City, ayon kay Mayor Benjamin Magalong ngayong Linggo.

Una nang kinausap ni Magalong si Philippine National Police PNP Chief Guillermo Eleazar na itigil ang pagsasagawa ng training sa siyudad dahil hindi umano nasusunod ang ilang health protocols.

Saad pa ni Magalong, “Ipinahinto ko. Sabi ko sa kanya, stop muna lahat ng training ng PNP dito sa siyudad ng Baguio.” Aniya, hindi nasusunod ang physical distancing kapag nagte-training at pagkatapos umano ng ilang activities, inaalis ng ibang trainees ang kanilang face mask.

Kung magpapatuloy umanong malalabag ang mga ipinatutupad na health protocols sa Baguio, hindi na papayagan ni Magalong na magsagawa pa ng mga PNP trainings sa siyudad. Aniya pa, “They have to follow ‘yung policy namin dito sa Baguio.”

Kinausap din umano niya si BFP Chief Gen. Jose Embang, Jr. upang suspendihin din ang mga training sa siyudad dahil sa naganap na hawahan ng COVID-19 sa training site. Saad pa ni Magalong, “Buong training ng PNP at BFP, hinto muna indefinitely hanggang makita ko talaga na ‘yung kanilang mga ginagawa ay compliant with our public health standards.”

Mabilis naman umanong umaksiyon sina Eleazar at Embang at kakasuhan diumano ang mga consistent violators. Samantala, ayon sa Public Information Office ng Baguio City, ang naitalang 68 positive cases ay mula sa “pool of 130 trainees for a 58 percent positivity rate.”