82 pulis na positibo sa COVID, pinagbantay sa SONA.. Hepe ng QC Station 3, sibak!

ni Ronalyn Seminiano Reonico | July 29, 2021

Sinibak sa puwesto ang hepe ng Quezon City Police Station 3 kaugnay ng pag-deploy sa mga pulis sa huling State of the Nation Address (SONA) ni Pangulong Rodrigo Duterte kahit hindi pa nila nakukuha ang kanilang COVID-19 test result.

Ayon kay Philippine National Police Chief Police General Guillermo Eleazar, "In view of the apparent breach of protocol when most of these PNP personnel were deployed for SONA duties even if they were still waiting for their RT-PCR results, I have already ordered the administrative relief of the Station Commander, Police Station 3 of the QCPD, for command responsibility."

Aniya, matapos makuha ang resulta kung saan lumalabas na 82 pulis ang nagpositibo sa COVID-19, kaagad na isinailalim ang iba pang QCPD personnel sa RT-PCR at nagsagawa na rin ng contact-tracing simula pa noong Miyerkules. Sa ngayon ay hinihintay pa ang RT-PCR results ng 167 pang PNP personnel.

Ani Eleazar, "Hindi pa natin alam kung Delta variant ang tumama sa aming mga kasamahan sa QCPD kaya nakikiusap tayo sa ating mga kababayan na iwasan ang mga espekulasyon tungkol dito. "But your PNP has long prepared for all worse-case scenarios like this, which include aggressive vaccination and preparing for more isolation and medical facilities, so we assure the relatives of those who were infected and also our kababayan of full attention and care for our personnel."

Samantala, nanawagan din si Eleazar na itigil ang pambabatikos at ang mga "unnecessary and insensitive comments" sa mga kapulisan na tinamaan ng COVID-19.

Aniya, "Huwag sana nating kakalimutan na kaya naman sila na-deploy ay para tiyakin na mapayapa at maayos na maisagawa ang karapatan ng ilan nating kababayan na magprotesta at maghayag ng saloobin habang pinapangalagaan din ang karapatan ng mga motorista at mga kababayan nating commuters na hindi maabala ng mga kilos-protesta sa mga lansangan na regular na dinadaanan nila.

"Hindi makatwiran at hindi makatao na hamakin pa ang ating kapulisan sa kabila ng kanilang sinapit dahil halos lahat ng mga pulis na tinamaan ng COVID ay dahil naman sa pagtupad ng kanilang sinumpaang tungkulin.

Sila ay may mga pamilyang nag-aalala rin at higit sa lahat, sila ay kapwa natin Pilipino, kaya nakikiusap tayo na maging sensitibo tayo sa ating mga binibitawang salita."

51 pulis sa SONA, nagpositibo sa COVID

ni Lolet Abania | July 28, 2021

Nasa tinatayang 82 personnel ng Police Station 3 ng Quezon City Police District (QCPD) ang nagpositibo sa test sa COVID-19. Sa kabuuang 161 pulis na sumailalim sa testing, 82 ang positibo habang 79 naman ay nakatanggap ng negative results.

Sa isang interview kay Mayor Joy Belmonte, ini-report ng Epidemiology and Disease Surveillance Unit (CESU) ng lungsod na ang mga pulis ay na-test noong July 23.

Gayunman, nilinaw ni Belmonte na ang transmission ng virus ay walang kaugnayan sa mga pulis na naka-duty sa State of the Nation Address (SONA) ni President Rodrigo Duterte nitong Lunes, July 26.

“Matagal na silang na-swab, so walang kinalaman ito sa SONA,” ani Belmonte. Batay sa report ng CESU, naniniwala si Belmonte na ang tinamaan ng impeksiyon ay dahil sa kakulangan ng pagsunod ng istasyon ng pulis sa health protocols. “It’s just a matter of loose health standards,” sabi ni Belmonte.

Sa isang statement ng lokal na pamahalaan, ang mga infected na pulis ay nakatalaga sa Police Station 3 (Talipapa), Police Community Precinct 1 (Unang Sigaw) at Police Community Precinct 2 (Bahay Toro).

Sinabi pa ni Belmonte, ang mga police personnel ay nabakunahan na. Dinala na ng mga awtoridad ang unang batch ng infected na pulis sa isang isolation facility, habang ang iba pa ay pinoproseso pa at naghihintay ng resulta ang test.

Ayon kay CESU Chief Dr. Rolando Cruz, ang 48 positive cases ay na-admit na sa mga HOPE facilities ng lungsod nitong Martes nang gabi, habang ang 34 ay nakatakdang dalhin din sa kanilang quarantine facilities ngayong Miyerkules. “The first 48 positive cases were already admitted to several of our HOPE facilities last night, July 27. The other 34 will be admitted today,” ani Cruz.

Sinabi rin ni Cruz na ang lahat ng infected na pulis sa Police Station 3 ay asymptomatic. Tiniyak naman ni Police Station 3 commander Lieutenant Colonel Cristine Tabdi na mananatili ang istasyon na operational upang tumanggap ng reports o complaints sa receiving area na nasa labas nito.

Subalit, ang nasabing istasyon ay restricted na sa publiko at ipinagbabawal ang pagbisita rito. Iniutos na rin ng city government sa QCPD na beripikahin kung ang mga infected na pulis ay na-deploy bilang security sa SONA, kasabay ng paglalabas ng direktibang lahat ng pulis na naghihintay pa ng resulta ng kanilang test ay dapat sumailalim sa mandatory quarantine at anumang pagsuway sa ipinatutupad na protocol ay paglabag sa probisyong nakasaad sa Republic Act 11332.

Inatasan na rin ni Belmonte ang lahat ng 16 station commanders na siguruhing ipinatutupad sa kanilang mga istasyon ang minimum health protocols. Samantala, nasa 51 mula sa 82 pulis ng Police Station 3 ng Quezon City na nagpositibo sa test sa COVID-19 ay na-deploy bilang security sa SONA nitong Lunes.

Sa isang press conference, inianunsiyo ni Quezon City Police District (QCPD) director Police Brigadier General Antonio Candido Yarra na ang mga pulis ay nakatalaga rin sa iba pang regular na police functions. “Hundred eighteen of Police Station 3 participated in our SONA deployment and then 51 of them were tested positive,” ani Yarra.

Naka-2 bakuna na ng AstraZeneca… Sen. Gordon, positibo sa COVID-19

ni Lolet Abania | July 28, 2021

Nagpositibo sa test sa COVID-19 si Senador Richard Gordon. Ito ang inamin ni Gordon sa isang radio interview ngayong Miyerkules nang umaga kung saan tinamaan siya ng respiratory disease at kasalukuyang naka-quarantine.

"Ako mismo, right now. Natamaan ako. So I’m staying home,” ani Gordon habang tinatalakay ang COVID-19 response ng Philippine Red Cross.

Gayunman, si Gordon ay asymptomatic subalit kung pag-uusapan ang kanyang kalusugan, aniya, nakararamdam siya ng pagbabago dahil nahihirapan siyang makatulog. “Wala [symptoms] pero nagpapa-test ako. Mukhang asymptomatic ako, nasa bahay lang ako ngayon,” sabi ni Gordon.

Ayon sa senador, fully vaccinated na siya kontra-COVID-19, kung saan AstraZeneca vaccine ang itinurok sa kanya. Ang kanyang asawa at staff members naman ay nagnegatibo sa test sa COVID-19 subalit sasailalim pa ang mga ito sa isa pang test matapos ang tatlong araw.

“Nakapagbakuna na kami. Magte-test siya [wife] about three days,” sabi ng senador. Gayundin, sinabi ni Gordon na dahil sa mas nakahahawang Delta variant, pinayuhan siya ng kanyang doktor na humingi ng medikal na atensiyon, kung saan dapat na ipa-check nito ang kanyang lungs at dugo. Posible ring sumailalim siya sa CT scan ngayong araw.

Sa hiwalay na statement, ipinaalala naman ni Gordon sa publiko na ang mga indibidwal na nabakunahan na ay maaari pa ring ma-infect ng COVID-19. “I have been fully vaccinated and am grateful for the protection the vaccine affords me today. While infections in vaccinated people are relatively uncommon, they can and do happen. What vaccines offer, as has been documented in countries with high rate of vaccination, is protection against serious illness, hospitalization, and death. Vaccines work and they save lives,” saad ni Gordon.

Si Gordon ang ikaanim na senador na nakumpirmang tinamaan ng COVID-19. Ang iba pang senators na nagpositibo sa Coronavirus ay sina Majority Leader Juan Miguel Zubiri, Senators Sonny Angara, Aquilino Pimentel III, Ronald dela Rosa, at Ramon "Bong" Revilla, Jr..