Gordon, nakarekober na sa COVID-19

ni Lolet Abania | August 12, 2021

Magaling na si Senador Richard Gordon mula sa sakit na COVID-19.

“Yes. Nag-ingat lang tayo, wala akong naramdaman. I was completely asymptomatic but because my wife, may autoimmune problem s’ya, siyempre, iniingatan ko ang asawa ko, ang mga katulong namin sa bahay, mga kasama sa Red Cross, mga staff ko sa Senado, ayaw kong mahawa sila sa akin,” sabi ni Gordon sa Laging Handa briefing nang tanungin kung talagang nakarekober na ito sa respiratory disease.

Matatandaan noong Hulyo 28, inianunsiyo ng senador na tinamaan siya ng sakit na COVID-19.

Gayundin, isang araw matapos nito ay na-admit siya sa Makati Medical Center sanhi ng COVID-related pneumonia.

Sinabi pa ng senador na fully vaccinated na siya kontra-COVID-19 gamit ang AstraZeneca vaccine.

Si Gordon ang ika-anim na senador na nagka-COVID, kung saan ang iba pang senador na nagpositibo sa virus ay sina Majority Leader Juan Miguel Zubiri, Sonny Angara, Aquilino Pimentel III, Ronald dela Rosa, at Ramon “Bong” Revilla, Jr..

Manila Vice Mayor Honey Lacuna, positibo sa COVID-19

ni Ronalyn Seminiano Reonico | August 9, 2021

Nagpositibo sa COVID-19 si Manila Vice Mayor Honey Lacuna, ayon sa Manila Public Information Office noong Linggo.

Pahayag ni Lacuna, “Sa kabila ng matinding pag-iingat ay hindi ko lubos na inaasahan ang nakalulungkot na resulta. Dahil dito, kinakailangan kong pansumandaling magpahinga at magpagaling.

“Inaasahan ko po ang inyong pag-unawa at hinihiling ko ang inyong panalangin para sa ating lahat. Patuloy po tayong mag-ingat at sundin ang mga itinakdang safety protocols.”

Samantala, noong Linggo, pumalo na sa 1,658,916 ang kabuuang kaso ng COVID-19 sa bansa matapos maitala ang 9,671 bagong kaso.

Sa ngayon ay mayroon pang 77,516 aktibong kaso sa bansa at umakyat na sa 29,122 ang bilang ng mga pumanaw.

Gordon, isinugod sa ospital dahil sa COVID

ni Lolet Abania | July 29, 2021

Isinugod sa Makati Medical Center si Senador Richard Gordon nitong Miyerkules nang gabi dahil sa COVID-19. “Upon the advice of his physician, Senator Dick Gordon was admitted last night to the Makati Medical Center for observation and further testing related to COVID-19,” batay sa isang statement na inilabas ng kanyang opisina ngayong Huwebes nang hapon.

Sa inisyal na COVID-19 panel test results at CT-scan findings, lumabas na ang 75-anyos na senador ay nakararanas ng COVID-related pneumonia.

“Senator Gordon is being treated accordingly and will remain at MMC until further notice,” dagdag pang statement.

Una nang sinabi ni Gordon nu'ng Miyerkules nang umaga na tinamaan siya ng naturang respiratory disease, kung saan siya ay asymptomatic, subalit may mga kakaiba siyang nararamdaman patungkol sa kanyang kalusugan dahil nahihirapan siyang makatulog.

Binanggit pa ng senador na siya ay fully vaccinated laban sa COVID-19 gamit ang AstraZeneca vaccine.