DOLE Secretary Bello, positibo sa COVID-19

ni Lolet Abania | August 17, 2021

Nagpositibo si Department of Labor and Employment (DOLE) Secretary Silvestre Bello III sa test sa COVID-19.

Sa isang statement ng DOLE, kahit na tinamaan ng sakit ang 77-anyos na opisyal, “He is asymptomatic and remains on top of his health.”

Si Bello na fully vaccinated na ay kasalukuyang sumasailalim sa self-quarantine sa kanyang hometown sa Iligan, kung saan siya nai-test nitong weekend.

“Even while in isolation, the Secretary continues to discharge his functions,” pahayag ng DOLE.

“The Secretary wishes to thank the public for their prayers, and expresses hopes to resume leading DOLE officials in the distribution of assistance funds under its Serbisyong TUPAD (Tulong Panghanapbuhay sa Ating Disadvantaged/Displaced Workers) as soon as his quarantine period is over,” ayon pa sa ahensiya.

Ang DOLE chief ay tumatanggap ng mga bisita sa kanyang opisina habang madalas na bumibiyahe sa buong bansa upang pangunahan ang pamamahagi ng assistance para sa mga displaced at disadvantaged workers.

Ang DOLE ay mayroong assistance program para sa mga informal workers at nagbibigay ng cash aid sa mga formal workers na apektado ng pandemya ng COVID-19. Maaari ring mag-avail ng cash assistance ang mga overseas Filipino workers (OFWs) mula sa ahensiya.

Isa si Bello sa maraming public officials, kabilang din ang mga miyembro ng gabinete na tinamaan ng COVID-19.

Magulang, negative sa test… Beybi, patay sa COVID-19 sa Cagayan

ni Lolet Abania | August 17, 2021

Isang 11-buwang gulang na sanggol ang namatay dahil sa COVID-19 sa bayan ng Santa Praxedes, Cagayan.

Ayon sa Santa Praxedes Rural Health Unit and Birthing Center, ito ang unang kaso ng nasawi dahil sa COVID-19 sa nasabing bayan.

Batay sa nai-post sa Facebook ng SPRHU, nasawi ang beybi nito lamang Sabado, Agosto 14.

Unang isinugod ang sanggol noong Agosto 3 sa Northern Cagayan District Hospital matapos na makaranas ng pag-ubo, sipon at hirap sa paghinga.

Noong Agosto 6, isinailalim ang beybi sa RT-PCR test at makalipas ang tatlong araw, lumabas ang resulta nito na positibo sa COVID-19.

Nitong Sabado, tuluyang namatay ang sanggol habang ginagamot sa naturang ospital.

Patuloy naman ang ginagawang contact tracing ng municipal health office ng Cagayan para matukoy ang mga posibleng nakasalamuha pa ng beybi.

Gayunman, lumabas sa mga swab tests na negatibo sa COVID-19 ang pamilya, kaanak at mga close contact ng sanggol kaya palaisipan pa rin kung paano nito nakuha ang nakamamatay na sakit.

Pinayuhan naman ng lokal na pamahalaan ng Cagayan ang mga residente lalo na ang mga authorized person outside residence o APOR na dobleng ingat ang kanilang gawin kontra-COVID-19.

Samantala, hanggang nitong Linggo, Agosto 15, nakapagtala ng 23 bagong kaso ng COVID-19 sa Santa Praxedes kung saan umakyat na sa 38 ang aktibong kaso ng sakit.

Imus Mayor Maliksi, nagpositibo sa COVID-19

ni Ronalyn Seminiano Reonico | August 17, 2021

Nagpositibo sa COVID-19 si Imus, Cavite Mayor Emmanuel Maliksi, ayon mismo sa kanyang inianunsiyo sa social media noong Lunes.

Aniya sa kanyang Facebook post, "Sa kabila ng ating labis na pag-iingat habang nagseserbisyo sa ating mga kababayan, ikinalulungkot ko pong ibalita na ang inyong lingkod ay positibo sa COVID-19.

“Ganoon pa man, tuloy ang serbisyo para sa ating mga kababayang Imuseño habang tayo ay naka-isolate at kasalukuyang nagpapagaling sa South Imus Specialist Hospital.”

Mensahe rin ni Maliksi sa publiko, “Pagtutulungan at panalangin ng kagalingan at maayos na kalusugan ang tanging hiling natin para sa lahat.”