65.5 M botante, sasabak sa 2022 elections – Comelec

ni Lolet Abania | November 25, 2021

Nasa tinatayang 65.5 milyong voters ang inaasahang boboto para sa 2022 national at local elections, ayon sa Commission on Elections (Comelec).

Sa isang hybrid press conference ngayong Huwebes, sinabi ni Comelec Spokesperson James Jimenez na nakapagdagdag sa registration period para sa eleksyon sa susunod na taon ng 8,147,080 voters. Kabilang dito iyong mga nag-reactivate ng kanilang registration sa Comelec.

“As of today, the projected number of voters for 2022 stands at 65.5 million. Throughout the entire registration process, we added to the list of voters a total of 8,147,080,” sabi ni Jimenez.

Para naman sa mga bagong rehistradong botante, ayon kay Jimenez mayroong 4,094,614 new voters na nasa edad 18 hanggang 21.

Karamihan sa mga bagong registrants ay nasa age group na 21-anyos, kung saan 750,578 ang mga lalaki at 796,891 naman ang mga babae.

Ang bilang naman ng mga bagong registrants na kaka-18-anyos pa lamang ay umabot sa 171,033.

Ito ang pinaka-latest na datos ng Comelec na kanilang inilabas hanggang sa magtapos ang voter registration period.

Sa Mayo 9, 2022, ang nakatakdang 2022 national at local elections.

Acting election officer, patay sa pamamaril

ni Lolet Abania | November 19, 2021

Kinondena ng Commission on Elections (Comelec) ang naganap na pagpatay sa isang acting election officer sa Catarman, Northern Samar, kahapon.

Sa isang statement ni Comelec spokesperson James Jimenez, “The commission condemns the craven killing of acting Election Officer James Diaz Maghanoy.”

“The entire Commission calls on authorities to leave no stone unturned in its probe of the murder of Maghanoy, and to ensure that those responsible are brought swiftly to justice,” ani Jimenez.

Batay sa isang police report, si Maghanoy, na isang municipal election officer ng Lope de Vega, Samar, ay pauwi na ng kanyang bahay nang barilin ng hindi nakikilalang suspek sa national highway sa Barangay Samoge, Catarman, bandang alas-5:00 ng hapon nitong Huwebes.

Nagtamo si Maghanoy ng dalawang tama ng bala ng baril, isa sa kanyang ulo at isa pa sa katawan.

Agad na isinugod sa Northern Samar Provincial Hospital ang biktima, subalit idineklara ring patay habang ginagamot sa naturang ospital.

Nagsasagawa na ang Catarman Municipal Police Office ng isang follow-up investigation para sa ikadarakip ng naturang salarin.

126 party-list groups, out na sa 2022 elections — Comelec

ni Lolet Abania | November 17, 2021

Tinanggihan ng Commission on Elections (Comelec) ang aplikasyon ng 126 grupo na gustong sumabak sa party-list elections sa susunod na taon.

“126 applicants for [party-list] registration were denied by Comelec,” ani Comelec Commissioner Atty. Rowena Guanzon sa isang tweet ngayong Miyerkules.

Gayunman, hindi pa naglalabas ang Comelec ng listahan ng mga party-list groups na naghain ng kanilang aplikasyon na ni-reject ng poll body.

Hanggang nitong Oktubre 8, umabot na sa 270 grupo ang naghain ng kanilang certificates of nomination and acceptance sa Comelec.

Subalit, ang mga botante ay papayagan na mamili ng isa lamang party-list group para sa national at local elections sa Mayo 9, 2022.