Election equipments sinimulan nang i-deploy

ni Jasmin Joy Evangelista | February 11, 2022

Sinimulan na ng Commission on Elections (Comelec) ang pagdi-dispatch ng mga election equipments, peripherals, forms at supplies na siyang gagamitin sa May 2022 elections.

“Election items that are ongoing deployment from the Comelec warehouse in Sta. Rosa Laguna to local hubs nationwide include the vote counting machine external batteries, until 31 March, and ballot boxes, until 10 April," ayon sa komisyon nitong Huwebes.

Ang mga non-accountable forms at supplies ay idi-dispatch sa February 16 mula Comelec warehouse sa Quezon City patungong provincial at city treasurers sa mga prayoridad na lugar sa bansa

Ang mga VCMs, consolidation at canvassing system (CCS) machines at transmission equipment ay ide-deploy naman mula April 2 hanggang 19.

Sinabi rin ng Comelec na ang mga official ballots at indelible ink mula sa National Printing Office ay ipapadala sa mga city at municipal treasurers mula April 20 hanggang May 5.

Sa report ng News5 noong February 8, nasa 17,502,631 ballots na ang na-print as of February 8.

“Notice has been given to all political parties, political candidates, party-list groups and accredited citizens’ arms of the Commission through the modes mandated by law," dagdag pa nito.

Ang official campaign season para sa mga kandidato sa national posts ay nagsimula noong February 8.

Samantala, sinimulan na rin ng Comelec representatives ang pagbabaklas ng campaign materials na nakapaskil sa public places sa labas ng common poster areas noong Martes.

Ilang political party umapela sa Comelec na payagan ang selfie sa campaign rallies

ni Jasmin Joy Evangelista | February 10, 2022

Nagpasa ng petisyon ang ilang political parties sa Commission on Elections (Comelec) upang hilingin na payagan ang pakikipag-selfie ng mga kandidato sa campaign rallies, ayon kay Department of the Interior and Local Government spokesperson Jonathan Malaya nitong Huwebes.

Sa isang panayam, sinabi ni Malaya na ang kanilang departamento, na siyang nagmo-monitor ng implementation ng health protocols sa campaign rallies, ay naghihintay lamang ng desisyon mulasa Comelec hinggil sa usaping ito.

“Ang alam ko po may petition na ang ilang political parties sa Commission on Elections, so inaantay na lang po natin yung kanilang magiging decision,” aniya.

"Kami po ay deputized lamang ng Comelec at kami po ay hindi gumagawa ng polisiya," dagdag pa ni Malaya.

Sa ilalim ng Section 14 of Comelec Resolution 10372, kabilang sa mga ipinagbabawal na aktibidad sa in-person campaigns ay pagkuha ng selfie, photographs at mga kahalintulad na aktibidad na magkakaroon ng close proximity sa pagitan ng kandidato, mga kasama nito, at ng publiko.

Anumang election offense ay parurusahan sa ilalim ng Section 264 ng Omnibus Election Code, kung saan ang parusa sa violators ay pagkakakulong ng hindi bababa sa isang taon at hindi lalagpas ng anim na taon.

Sinumang mapapatunayang guilty ay madi-disqualified na magkaroon ng puwesto sa public office at deprivation of voting rights.

Ang mga political party naman na mapapatunayang lumabag ay pagmumultahin ng hindi bababa sa P10,000.

Isa pang petisyon laban kay BBM, ibinasura ng Comelec

ni Lolet Abania | February 8, 2022

Kinumpirma ng Commission on Elections (Comelec) ngayong Martes na isa pang petisyon na inihain laban kay presidential aspirant at dating Senador Ferdinand “Bongbong” Marcos Jr. ang na-dismiss.

Sa isang virtual press conference, sinabi ni Comelec spokesperson James Jimenez na ang petisyon na nai-file ni Tiburcio Marcos ay ibinasura na ng commission.

Sa petisyon ni Tiburcio Marcos, iginiit nitong ang “impostor” na si Bongbong Marcos ay hindi nag-e-exist bilang isang legal person at ang tunay na Marcos Jr. ay patay na noon pang 1975.

Una nang inanunsiyo ni Jimenez na ang petisyon ay na-dismiss na bago pa ang Bagong Taon. Subalit, wala pang ibinibigay ang Comelec na kopya ng desisyon.

Ayon kay Jimenez, mayroong isang petition kay Marcos para ipakansela ang kanyang certificate of candidacy (COC) sa pagka-pangulo at 4 na disqualification cases laban sa dating senador na nananatiling pending sa Comelec.

Noong Disyembre 16, ibinasura ng Comelec ang petisyon na inihain ni Danilo Lihaylihay, kung saan ipinadedeklara nito si Bongbong Marcos bilang isang nuisance candidate.