Emergency polling place, ilalaan sa mga senior, PWDs at buntis — Comelec

ni Lolet Abania | February 23, 2022

Naglabas na ang Commission on Elections (Comelec) ng kanilang pangkalahatang panuntunan sa proseso ng pagboto ng mga persons with disability (PWD), senior citizens, at iyong heavily-pregnant o malaki nang nagbubuntis para sa 2022 elections.

Batay sa Resolution 10761, maglalagay ng mga Emergency Accessible Polling Places (EAPPs) sa mga voting centers at piling lugar na nakalaan para sa mga PWDs, senior citizens, at heavily-pregnant na mga botante.

Ang EAPP ay isang silid o makeshift/temporary polling place na nakalatag sa unang palapag o sa ground floor ng isang voting center o sa labas nito subalit may kalapitan sa botohan, kung saan ang PWD, senior citizen at heavily pregnant voters ay makakaboto sa Election Day.

“The Commission shall ensure that the voting procedures in the EAPP, including the facilities and materials therein are appropriate, accessible and easy to understand and use, and that reasonable accommodation shall be granted to persons with disabilities, senior citizens and heavily pregnant voters in order that they may fully exercise their right to suffrage,” paliwanag ng Comelec.

Ayon sa Comelec, ang isang EAPP ay dapat na itayo sa mga lugar na mayroong isa hanggang pitong barangay, dalawa para sa walo hanggang 14 barangay, at tatlo para sa 15 at pataas na mga barangay.

“All EAPPs must have an ample space capable of accommodating at least 10 PWD, SC, and/or heavily pregnant voters, including wheelchair-users and assistors, at any given time,” pahayag pa ng komisyon.

Sinabi rin ng Comelec na mahalagang accessible ang EAPPs sa mga naturang botante, na dapat mayroon ditong mga rampa, malalaking print signages at mga directional signs naman sa entrance ng voting precinct patungo sa EAPP, madaling makitang mga washroom, at Filipino Sign Language Interpreter kung kakayanin pa nito.

Ayon pa sa poll body, ang isang PWD, senior citizen o heavily-pregnant ay maaaring bumoto sa EAPP o sa polling precinct kung saang presinto siya naka-assign.

Ang pagboto sa EAPP ay magsisimula ng alas-6:00 ng umaga hanggang alas-5:00 ng hapon habang ang pagboto sa mga satellite EAPPs ay mula naman ng alas-6:00 ng umaga hanggang alas-2:00 ng hapon.

Malalaking tarpaulin, nakuha ‘Operation Baklas,’ start na — Comelec

ni Lolet Abania | February 16, 2022

Sinimulan ng Commission on Elections (Comelec) ngayong Miyerkules ang pagbabaklas ng mga campaign posters ng mga kandidato na napakalaki at lagpas sa itinakdang sukat o nakapaskil sa mga maling lugar.

Katuwang ng ahensiya ang Metropolitan Manila Development Authority (MMDA) sa ikinasang “Operation Baklas” sa buong National Capital Region (NCR).

Sa isang livestreaming na ipinalabas ng Comelec’s official Facebook page, pinagbabaklas ng mga awtoridad ang mga campaign poster ng dalawang magka-tandem na mga kandidato sa pagka-pangulo at pangalawang pangulo dahil sa malalaking tarpaulin na nakapaskil na nagpo-promote sa mga ito.

Aabot lamang sa 2 by 3 feet ang pinakamalaking campaign poster na pinapayagan ng Comelec, kahit pa nakapaskil ito sa pribadong pag-aari katulad ng mga tirahan.

Sa isang press conference, ayon kay Comelec spokesperson James Jimenez, “we’re just making steps to ensure that our laws are complied with.”

Itinago naman sa MMDA ang mga binaklas na posters habang hindi ito ibabalik sa mga kandidato dahil maaaring gamitin itong ebidensiya sa pagsasampa ng election offense.

Celeb endorsers, ‘di dapat gamitin ang platforms sa pangangampanya — Comelec

ni Lolet Abania | February 11, 2022

Ipinaalala ng Commission on Elections (Comelec) sa lahat ng celebrity endorsers na hindi dapat gamitin ang kanilang platforms at mga programa upang mangampanya para sa mga political candidates.

Sa isang virtual press briefing ngayong Biyernes, sinabi ni Comelec spokesperson Director James Jimenez na ang paggamit ng mga platforms ay posibleng maging isyu dahil maaari itong ikonsidera bilang aniya, “donated advertising time.”

“Under election laws, candidates who have programs should take a leave from their programs. We do not refer to endorsers but again it’s good practice siguro to not use their platforms to campaign because magiging issue ‘yan in terms of using these platforms for campaign purposes. Magiging considered ‘yan na donated advertising time eh, so magiging issue ‘yan,” paliwanag ni Jimenez.

“So referring to candidates, in the first place, for them to take a leave, but for endorsers to maybe not use their programs or platforms to campaign for candidates because that might be considered donated air time,” dagdag ng opisyal.

Gayunman ayon kay Jimenez, naglaan naman ang Comelec ng isang platform para sa libreng live streaming ng mga online political rallies ng mga national candidates sa gitna ng pandemya ng COVID-19.

Ang Campaign S.A.F.E. Comelec e-Rally Channel sa Facebook ay nagbibigay ng online airtime sa mga kandidato na tatakbo sa pagka-pangulo, bise presidente, senador at party-list groups na tumatagal ng 3 hanggang 10 minuto.