2 complaints ng vote buying, natanggap ng Comelec

ni Lolet Abania | April 5, 2022

Nakatanggap ang Commission on Elections (Comelec) ng dalawang complaints ng vote buying matapos ang nabuo nilang task force na layong mapigilan ang anumang election offense.

Ayon kay Comelec Commissioner George Erwin Garcia, ang isa sa mga reklamo ay inihain ng grupong Kowalisyong Novaleno Kontra Korapsyon laban kay Rose Nono Lin, na tatakbo para sa congressional seat sa Quezon City.

Naimbestigahan din si Lin sa Senado kaugnay sa umano’y maling paggamit o misuse ng pandemic response funds ng gobyerno.

“I was informed about the filing. One of the first cases after the activation of the the task force,” saad ni Garcia, na hindi naman binanggit ang detalye ng isa pang reklamo.

Ayon sa Comelec official, ang mga naturang complaints ay magsisilbing babala para sa magsasagawa ng vote buying.

“These initial cases are the beginning of everything, a warning to one and all that we have an awakened citizenry with the highest sense of maturity,” giit ni Garcia.

“However, presumption of innocence should never be compromised as mandated by the Constitution,” dagdag niya.

Binigyan-diin naman ni Garcia ang kahalagahan ng pagsusumite ng mga ebidensiya, partikular na ang mga larawan at video.

“We will immediately issue the subpoena to immediately proceed with the preliminary investigation. We will afford due process to all. And we will not allow our judgment be swayed by publicity or popularism. Ours will be guided only by the evidence presented

and the law applicable based on the given facts,” sabi ni Garcia.

Una nang bumuo ang Comelec ng inter-agency task force na pinamumunuan ni Commissioner Aimee Ferolino, kung saan sila ang mag-iimbestiga at magpo-prosecute sa mga kaso ng vote buying at pagbebenta nito.

Batay sa Section 261 ng Omnibus Election Code, ipinagbabawal ang vote buying at vote selling, kung saan ang mga offenders o nagkasala ay mahaharap sa posibleng pagkakakulong, at aalisan ng karapatan na tumakbo sa public office at bumoto.

300 posibleng “areas of concern” isinumite ng PNP sa DILG

ni Lolet Abania | April 4, 2022

Nakapagsumite ang Philippine National Police (PNP) ng mahigit sa 300 posibleng “areas of concern” kaugnay sa nalalapit na 2022 elections, ayon sa Department of the Interior and Local Government (DILG).

Sa Laging Handa public briefing ngayong Lunes, sinabi ni DILG Undersecretary Epimaco Densing III na ang mga “election hotspots” ay tinatawag na ngayong “areas of concern.”

“Mayroon po sinubmit ‘yung ating PNP na mahigit 300 na possible areas of concern. ‘Yun po ‘yung tawag natin rather than election hotspots,” ani Densing.

Ayon kay Densing, ang deklarasyon para sa areas of concern ng Commission on Elections (Comelec) ay naantala dahil masusing bineberipika pa ng poll body ang kondisyon ng mga naturang lugar.

Noong nakaraang linggo, nabanggit ni Comelec Commissioner George Garcia na ang mga areas of concern ay kanilang iaanunsiyo sa Marso 31.

Iniuri naman ng PNP ang mga lugar sa bansa sa apat na color-coded categories: berde, dilaw, kahel o orange at pula.

Ayon sa PNP, ang mga lugar na klinasipika bilang berde o green ay kinokonsiderang generally peaceful o mapayapa sa pangkalahatan para magsagawa ng eleksyon.

Para sa mga dilaw o yellow areas, may nai-report na hinihinalang election-related incidents sa nakalipas na dalawang eleksyon, posibleng presensiya ng mga armed groups, at matinding political rivalries. Ang mga yellow areas ay kinokonsiderang “areas of concern”.

Ang mga orange areas naman ay may naitalang presensiya ng armed groups gaya ng New People’s Army (NPA) na maaaring gumambala sa eleksyon. Ito ay kinokonsiderang “areas of immediate concern”.

Ang mga red areas ay pasok sa parameters o kondisyon para sa yellow at orange areas. Isasailalim ang mga ito sa Comelec control. Gayundin, ang mga security forces ay nakapokus sa pagmo-monitor sa mga naturang lugar na may posibilidad ng pagkakaroon ng karahasan at matinding political fights sa pagitan ng lokal na mga kandidato.

OT pay ng mga guro sa May 9 elections, suportado ng Comelec

ni Lolet Abania | April 4, 2022

Tutulungan ng Commission on Elections (Comelec) ang mga guro kaugnay sa kanilang apela sa overtime pay para sa kanilang duty sa araw ng eleksyon gayundin sa pag-aalis ng tax sa kanilang honorarium.

Sa isang interviewed ngayong Lunes, sinabi ni Comelec Commissioner George Garcia na tinitingnan na ng poll body ang inihaing apela ng mga guro at ieendorso nila ito sa mga concerned agencies gaya ng Bureau of Internal Revenue (BIR).

“Baka sakaling ‘yung kanilang saloobin na ‘yan, sana makatulong din ang Comelec para maiparating sa ating BIR na baka naman pupuwedeng pag-isipan nga na ‘yung in-impose na tax lalo dito sa paglilingkod nila sa araw ng halalan baka naman ma-waive na,” giit ni Garcia.

Sa isang pulong kasama ang Teachers’ Dignity Coalition (TDC) nitong Linggo, binanggit ni Garcia na ang apela para sa overtime pay ay kanila ring tinalakay.

Ayon sa opisyal, batay sa isang joint memorandum circular sa pagitan ng Civil Service Commission (CSC) at ng Department of Budget and Management (DBM) nakasaad na ang Comelec ay hindi pinapayagang magbigay ng overtime pay sa mga manggagawa na hindi nila mga empleyado.

Iminungkahi naman ni Garcia ang pagpapasa ng apela ng mga guro sa CSC at DBM.

“Kung ako lang ang boboto, I will vote for grant of overtime para po sa ating mga guro,” sabi ni Garcia.