Bgy. officials na pasimuno sa paglabag sa Bayanihan to Heal As One Act, kastiguhin!

Ryan B. Sison / Boses

Sa panahon ng COVID-19 pandemic, napakahalaga ng pamumuno ng mga lider sa kanilang nasasakupan.

Mula sa nasyonal na pamahalaan hanggang sa lokal na pamahalaan at maging sa mga barangay, kailangang masunod ang ipinatutupad na batas, gayundin, silang mga lider ang dapat manguna sa pagsunod sa mga ito para tularan ng mga residente sa nasasakupan.

Pero paano kung lider mismo ang lalabag sa batas, at ang masaklap, umaabot sa punto na may maaagrabiyado?

Kaugnay nito, apat na opisyal ng barangay ang sinampolan ng Bayanihan to Heal As One Act matapos arestuhin dahil sa pag-padlock at pagkulong sa mister na suspected COVID-19 patient sa sariling bahay sa Sampaloc, Manila.

Batay sa ulat, pumunta sa tanggapan ng Special Mayor’s Reaction Team (SMaRT) ang kaibigan ng mister at sinabing ini-lock ito kasama ang apat na menor-de-edad na anak at asawa. Arestado ang dalawang kagawad, ex-bgy. official, tanod, habang hinahanap ng mga awtoridad ang isa pang tanod.

Ayon sa pulisya, lumabag ang mga suspek sa City Ordinance No. 8624 o discriminating against a person suspected of having COVID-19 at arbitrary detention ng Article 124 ng Revised Penal Code at Republic Act 11469 o Bayanihan to Heal As One Act.

Ini-lock ng mga suspek ang pamilya sa kanilang bahay, upang hindi umano makahawa dahil pinaghihinalaang may COVID-19 ang padre-de-pamilya kahit dumaan ito sa swab test at nag-negatibo.

Nakakadismaya dahil kung sino pa ang lider, sila ang nangungunang lumabag sa batas.

Porke may posisyon, matapang at dedma na sa karapatan ng ibang tao?

‘Wag ganu’n, mga sir. Sa panahon ngayon, hindi nalilimutan ng taumbayan ang bawat kilos na ginagawa n’yo kaya kung patuloy kayong mambabastos at lalabag sa batas, wala kayong lugar sa gobyerno!

Kung totoong concern kayo sa inyong nasasakupan, umaksiyon kayo nang tama, hindi ‘yung depende lang sa trip ninyo.

Panawagan sa kinauukulan, patuloy na parusahan ang mga tulad nilang opisyal. Ipakita na may ngipin ang batas at wala itong sasantuhin.

Nasa serbisyo-publiko kayo, kaya kayo dapat ay alam n’yo ang tamang paraan sa paghawak ng kaso ng COVID-19 sa inyong nasasakupan.

‘Ika nga, bawat hakbang ng mga lider ay maaaring makasama o makabuti sa nasasakupan, kaya magsilbi kayong mabuting ehemplo para tularan ng publiko.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Kawalan ng trabaho, gutom at pandemya, malalampasan din, tiwala lang!

Ryan B. Sison / Boses

Halos isang linggo mula nang ipatupad ang general community quarantine (GCQ) sa Metro Manila, unti-unting dumami ang industriyang nagbukas.

Nagsimula nang bumiyahe ang ilang pampublikong transportasyon, mas maraming tindahan sa mall ang nagbukas, habang unti-unti na ring nag-o-operate ang iba’t ibang establisimyento.

Maraming manggagawa ang nagsikap na makabalik ng trabaho sa kabila ng limitadong transportasyon—marami sa kanila ang nagtiyagang mag-abang ng masasakyan, nagbisikleta at naglakad alang-alang sa kikitain.

Kaugnay nito, kumpiyansa ang Department of Labor and Employment (DOLE) na makakabawi na ang ilang mga negosyo at mababawasan ang pagtaas ng bilang ng mga walang trabaho sa bansa dahil sa GCQ.

Labis na naapektuhan ang maraming negosyo mula Marso hanggang Mayo dahil sa lockdown kung saan natigil nang mahigit dalawang buwan ang operasyon ng ilang kumpanya at ang maliliit na negosyo ay tuluyan nang nagsara.

Habang may mga negosyo at empleyadong nagsisimulang bumangon, marami ang nanatiling tengga sa bahay, gayundin, may ilang wala nang babalikang hanapbuhay.

Ang ending, umakyat sa 7.3 milyong Pilipino ang nawalan ng trabaho dahil sa pandemya.

Gayunman, hindi ito dahilan para magpaka-nega dahil kung tutuusin, hindi lang Pilipinas ang apektado ng pandemya.

Habang unti-unting nagbabalik-operasyon ang ilang industriya, hamon pa rin para sa gobyerno kung paano tutulungan ang milyun-milyong Pilipinong nawalan ng hanapbuhay.

Kawalan ng trabaho, gutom at pandemya—ito ang ating kalaban ngayon at kailangan nating maging matatag at magtiwala na malalampasan ang mga ito.

Malayo pa ang lalakbayin natin para tuluyang makabangon ang ekonomiya at magkaroon ng hanapbuhay ang manggagawang natengga, pero sa pagkakataong ito, ang mahalaga ay muling makapagsimula kahit sa maliliit na hakbang.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga batang hindi makapag-aral, tinuturuan ng sekyu habang naka-duty; patunay na may pag-asa ang baya

Ryan B. Sison / Boses

Ang mga security guard ang kadalasang responsable sa seguridad at kaligtasan ng establisimiyentong kanilang pinagtatrabahuhan.

Suot ang uniporme at bitbit ang armas, araw-araw silang humaharap at nagpoprotekta sa publiko.

Gayunman, hindi lang basta pagbabantay sa seguridad ng establisimyento ang ginagampanan ng viral na sekyu sa social media.

Ito ay dahil nagsilbi siyang guro ng mga batang kalye na hindi marunong bumasa at sumulat.

Ayon kay Renz Abelita, viral na sekyu, wala siyang ginagawa at walang kostumer ng mga panahong ‘yun. Nang tanungin niya ang pangalan ng mga bata ay agad naman silang nakasagot, pero nang pagsulatin ay hindi umano marunong ang mga ito, kaya sinumulan niyang ituro ang mga basic.

Matapos matutunang isulat ang pangalan, sunod niyang itinuro na pagbasa at pagsulat. Dagdag pa ni Abelita, nagsimula siyang magturo sa isang bata, ngunit ngayon ay kasama na nito ang kanyang mga pinsan na kapwa nakatira malapit sa kanyang pinagtatrabahuhan.

Aniya, inihahanda niya ang lesson plan sa gabi at nagbibigay din ng exam sa mga bata at araw-araw, nakikita niya ang improvement ng mga ito. Naikuwento umano ng mga bata na pinatigil sila sa pag-aaral dahil sa kawalan ng pera ng kanilang mga magulang.

Ayon sa ama ng isang bata, wala siyang oras para turuan ang kanyang anak dahil mas kailangan niyang tutukan ang paghahanapbuhay para makaraos sa araw-araw. Labis naman ang pasasalamat nito sa sekyu.

Ang mga ganitong eksena ang patunay na may pag-asa. Hindi kailangang maging mayaman at magkaroon ng posisyon sa gobyerno para makatulong sa nangangailangan.

Tipong wala silang inaasahang kapalit basta makapagbigay-kaalaman sa walang kakayahang mag-aral kahit lagpas pa ito sa linya ng kanilang trabaho.

Kung tutuusin, simpleng bagay ito, pero kahanga-hanga ang pagsisikap ng sekyu para makapagturo sa mga bata kahit nagtatrabaho.

‘Ika nga, maraming paraan para makapaghatid ng kaalaman at ang mga kalaamang ito ay tiyak na mapakikinabangan nila pagdating ng panahon.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com