Martial Law sa Mindanao, sablay daw kaya pinagpipilitan ang “Anti-Terror” Bill, hmmm…

Pablo L. Hernandez III / Prangkahan

MARTIAL LAW SA MINDANAO, SABLAY?—Matatandaang, nagdeklara si P-Duterte ng Martial Law noong May 23, 2017 sa Mindanao para puksain ang mga terorista at ang deklarasyong ito ay suportado ng Senado at Kamara.

Ayon sa Pangulo, hindi niya aalisin ang Batas-Militar hangga’t may natitirang terorista sa Mindanao at makalipas ang mahigit dalawang taon ay tinuldukan na ni P-Duterte ang Martial Law sa nasabing rehiyon.

Kaya ang tanong: Sablay ba ang Martial Law ng Duterte gov’t sa pagpuksa sa mga terorista sa Mindanao kaya ipina-urgent sa Kongreso ang “Anti-Terror” Bill? Boom!

◘◘◘

KORTE ANG DAPAT MAGDEDETERMINA KUNG SINO ANG MGA TERORISTA, HINDI ANG MGA TAO NI P-DUTERTE—Lahat naman ng law abiding citizens Pinoy, kahit ang iba pang lahi ay tutol sa terorismo at ang may gusto lang ng gawaing ito ay mga terorista.

Ang nakakabahala lamang sa nilalaman ng “Anti-Terror” Bill ay hindi ang korte, kundi ang mga taong itatalaga ng Pangulo sa Anti-Terrorism Council (ATC) ang magdedetermina kung ang isang tao o grupo ay terorista.

Baka ang mangyari riyan, lahat ng pupuna o babatikos sa mga maling polisiya ng gobyerno ay paratangan na mga terorista at ipadampot sa mga awtoridad, ‘katakot!

◘◘◘

MARAMI ANG NAGKA-VIRUS AT NAWALAN NG WORK, PERO “ANTI-TERROR” BILL ANG INAASIKASO NG GOV’T.—Sa latest data ng Department of Health (DOH), pumalo na sa mahigit 21K ang mga nagka-virus sa bansa, habang ayon naman sa tala ng Philippine Statistics Authority (PSA), dahil sa krisis ay pumalo na sa 7.3 milyong Pinoy ang nawalan ng trabaho mula noong Abril 2020.

Ito ang dapag pagtuunan nang pansin ng gobyerno, paano masasawata ang paglaganap ng deadly virus at paano matutulungan ang milyun-milyong Pinoy na nawalan ng trabaho at hindi ang “Anti-Terror” Bill, period!

◘◘◘

KUNG BATAS NA ANG ANTI-TERROR BILL, BAKA INAKUSAHAN NG TERORISTA ANG INARESTONG 6 NA TSUPER AT 7 ESTUDYANTE—Sa panahong binabatikos ng iba’t ibang sektor ang urgent bill na “Anti-Terror” ni P-Duterte ay magkasunod na inaresto ng mga parak ang anim na tsuper na nagprotesta’t nananawagan sa pamahalaan na sila ay payagan nang mamasada at pitong estudyante ng University of the Philippines (UP)-Cebu na mapayapang nagpu-protesta laban sa nasabing batas.

Mabuti na lang, nang arestuhin sila ay hindi pa ito batas dahil kung hindi malamang ay inakusahan na sila ng gobyerno na mga terorista, boom!

Oks na ang batas kontra terorismo ni ex-P-GMA, ‘di na kailangan ng Anti-Terror Bill, period!

Pablo L. Hernandez III / Prangkahan

MAY BATAS NA KONTRA TERORISMO SI EX-P-GMA KAYA HINDI NA KAILANGAN ANG ANTI-TERROR BILL NA BERSIYON NI P-DUTERTE — May batas na laban sa mga terorista at ito ay ang Republic Act 9372 o mas kilala sa tawag na “Human Security Act of 2007” na isinabatas ni dating Pres. Gloria Macapagal-Arroyo.

Sa Anti-Terror Act ni ex-P-GMA, ang ilan sa nakasaad dito ay tatlong araw lang ang warrantless detention, ihaharap sa korte ang akusado at P500K kada araw ang ibabayad ng mga awtoridad sa maling bintang sa taong kanilang ikinulong at tanging korte lang magdedetermina kung terorista o hindi ang tao o grupo.

Samantala, sa Anti-Terror ni P-Duterte, 14-24 days ang warrantless detention, hindi kailangang iharap sa korte ang inaresto, walang pananagutan ang mga awtoridad kapag hindi terorista kanilang nadampot at hindi na korte, kundi mga tao na ni P-Duterte na itatalaga niya sa Anti-Terrorism Council (ATC) ang magdedetermina kung terorista ang indibidwal o grupo, period!

◘◘◘

BAGO NAG-BREAK AY NAG-IWAN NG “GIFT” NA ANTI-TERROR BILL ANG KONGRESO KAY P-DUTERTE — Bago mag-break o mag-recess nitong June 5 ay ipinasa ng mga pro-Duterte congressman noong June 4 ang hirit na Anti-Terror Bill.

Ibang klase talaga ang mga pro-Duterte congressman, bago sila “nagsipagbakasyon”, binigyan nila ng regalong batas na pang-“terror” sa mamamayan ang gobyernong Duterte, buwisit!

◘◘◘

MGA MAMBABATAS, NAGAWA PANG MAGBAKASYON KAHIT MAY PANDEMYA — Ang balik-trabaho ng mga senador at kongresista matapos silang mag-recess nitong June 5 ay sa July 27 na, sa pang-limang SONA (State of the Nation Address) ni P-Duterte.

Ok lang sana ang break nila nakaugalian na ‘yan, pero ang hindi katanggap-tanggap ay nagawa pa ng mga lingkod-bayan na mag-recess o “magbakasyon-grande” ng 50-days sa panahon ng krisis, mga pwe!

◘◘◘

BAKA MAY MGA DAMPUTIN KAHIT HINDI TERORISTA DAHIL SA “FAKE NEWS” NI MOCHA AT TROPA NIYA — Marami talaga ang nangangamba sa bersiyon ng Anti-Terror Bill ng kasalukuyang gobyerno lalo na at ang mga tao niya sa ATC ang magdedetermina kung terorista ang indibidwal o grupo.

Ang pangamba ng karamihan, baka magpakalat ng fake news sa social media ang mga DDS bloggers sa pangunguna ni Mocha na terorista ang tao o grupong kanilang kinaiinisan, at ang gawin naman ng ATC ay ipaaresto ang mga ito, ‘kakatakot!

Mass testing at contact tracing sa COVID-19, iprayoridad kaysa sa Anti-Terror Bill, period!

Pablo L. Hernandez III / Prangkahan

HIRIT NI MOCHA USON, TERORISTA UMANO ANG MGA TUTOL SA “ANTI-TERROR” BILL—Mayoryang Pinoy ang tutol sa “Anti-Terror” Bill na ipina-urgent ni P-Duterte sa Kongreso dahil posibleng akusahang terorista ang mga babatikos sa gobyerno.

Kaugnay nito, habang nagsasagawa ng protesta ang iba’t ibang sektor ay nag-retweet sa isang post sa social media si OWWA Deputy Adm. Mocha Uson na may caption na, “Hahahahaha galit na galit na mga terorista nagtipon tipon na sila” kung saan malinaw na ang pinatutungkulan nito ay ang mga nagra-rally.

‘Yan ang nakakabahala dahil sa pagiging “powerful” ni Mocha sa gobyerno, baka ang sinumang kainisan nito ay i-post sa social media na mga terorista na maging dahilan upang dakpin ito ng mga awtoridad, ‘kakatakot!

◘◘◘

SA MASS TESTING AT CONTACT TRACING, DAPAT MAG-POKUS ANG GOBYERNO, HINDI SA “ANTI-TERROR” BILL—Sa ngayon ay pang-38 na sa ranking ang Pilipinas sa mga bansa na may pinakamaraming nadale ng COVID-19.

Nakakabahala ‘yan lalo na’t imbes magsagawa ng mass testing at malawakang contact tracing ang gobyerno, eh, tila ang pokus ng mga ito ay ang pagsasabatas ng “Anti-Terror” Bill, buwisit!

◘◘◘

IMBES NA SOLUSYUNAN NG MMDA ANG PROBLEMA SA PUBLIC TRANSPORT, SI KIM CHIU ANG PINAG-AKSAYAHAN NILA NG PANAHON—Itinuloy ni MMDA General Manager Jojo Garcia ang pagpapatawag kay Kim Chiu kaugnay sa nag-viral na pagsayaw nito sa labas ng kanyang kotse at ang kinalabasan ng imbestigasyon nila ay absuwelto ang aktres kasi sa parking lot lang ng isang restaurant nito isinayaw ang kanta niyang “Bawal Lumabas”, at fake news ang kumalat sa social media na sa EDSA ito sumayaw.

Ibang klase ang MMDA, imbes na hanapan nila ng solusyon ang problema sa public transport ng mamamayan, eh, ang sayaw ni Kim Chiu ang pinag-aksayahan ng panahon, mga pwe!

◘◘◘

PROMISE NI P-DUTERTE NA CASH ASSISTANCE SA MGA HEALTH WORKERS, BUKING NA HINDI PA NAIBIBIGAY—Nagalit si P-Duterte nang malamang hindi pa naibibigay ang promise niyang P1-M sa mga mamamatay at P300-K sa mga magkakasakit na health workers sa pagganap sa tungkulin sa paglaban sa COVID-19.

Nagalit? O baka naggalit-galitan lang kasi nabuking ng Senado na hindi pa naibibigay sa pamilya ng mga namatay at nagkasakit na health workers ang mga halagang ito, period!