Isang magandang ideya ang pagkakaroon ng mobile application at color coding sa ID ng persons with disabilities (PWDs). Ito ang ideya ng thesis ni Bb. Aia Arkoncel, na isa ring PWD.
Ayon sa kanya, “eye-opening” na karanasan ang diskriminasyong nararanasan ng ilang PWD dahil hindi agad makita ang kanilang kapansanan.
Ang kanyang ni-redesigned at color-coded na PWD ID ay may mga icon at visual cues upang madaling malaman ang kapansanan ng isang PWD. Samantala, ang kaakibat na app ay mayroon datos tungkol sa medical profile, transactions, reminders para sa mga gamot at check-up, at maaaring magkonekta sa isang PWD sa komunidad sakaling kailangan niya ng karagdagang medical o social support.
☻☻☻
Ang app at ID ay konektado. Maaari ring mag-apply ng PWD ID sa pamamagitan ng app, dahil may mga PWD na hindi nakakapunta sa kanilang munisipyo o city hall upang personal na mag-apply.
Hinihikayat ko ang mga kinauukulan na tingnan at ikonsidera ang mga ideya ni Bb. Arkoncel, lalo na ang color-coding ng mga ID upang madaling makita at ma-identify ang disability ng tao. Maaari ring pag-aralan pa ang paglalagay ng karagdagang security features upang hindi mapeke ang ID, tulad ng iniulat nitong mga nakaraang mga araw.
Ang mga ideyang ito ay nagpapatunay na kung patuloy nating i-empower ang ating mga kababayang PWD na lumahok sa governance ay makakatulong sila upang lalo pang mapaginhawa ang buhay nila. Mabuhay ka Bb. Arkoncel!
☻☻☻
Sa kabilang banda, dismayado tayo sa pagtugon ng ilang ahensiya ng pamahalaan kaugnay sa COVID-19 pandemic. Inaasahan nating sa ilang buwan na tayo ay nasa iba’t ibang lebel ng community quarantine ay naplantsa na at nailatag ng maayos ang mga programa at polisiya na tutugon sa pangangailangan ng ating mga kababayan.
Isa sa mga sinasabing dahilan ay ang kawalan ng implementing rules and regulations (IRR) upang maipahagi ang ayudang ito. Sinabi naman ng kalihim ng Department of Health ay mabagal ang naging aksiyon ng mga taong nasa ilalim niya.
Tulad halimbawa ng pagkakaloob ng P1 milyon sa mga kaanak ng mga healthcare workers na namatay sa COVID-19. Ito po ay nakapaloob sa Bayanihan to Heal as One Act na noon pang Marso naging batas. Matatandaang binilisan namin sa Senado ang pagpasa ng batas na ito upang maagap na tumugon sa krisis.
☻☻☻
Paalala lamang sa lahat na manatili sa loob ng bahay, ugaliing maghugas ng mga kamay, bigyang pahalaga ang kalusugan at huwag kalilimutang magdasal.
Malalagpasan din natin ito.
Be Safe. Be Well. Be Nice! ☻
Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.
Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US! Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay