DOT, tiniyak na hindi babagsak ang turismo kahit nawala ang mga turistang Chinese

Bobi Tiglao / Banat

Kahit may banta ng Coronavirus Disease (COVID-19) sa bansa, matatag pa rin ang ekonomiya ng Pilipinas at kakayanin nito ang mga bagong pagsubok.

Mataas ang tinatayang pag-unlad ng ekonomiya ngayong taon, salamat sa sektor ng imprastruktura, kalakal, pinansiyal at serbisyo. Bumaba na rin ang presyo ng gasolina at matibay ang ating piso (foreign exchange rate).

Ang forecast ng gobyerno ay 5.5 hanggang 6.5 porsiyento ang makikitang pag-unlad sa gross domestic product (GDP) ng bansa kahit humina ang sektor ng turismo dahil sa epekto ng COVID-19.

Gayunman, tiniyak ng Department of Tourism (DOT) na makakayanan naman daw ng domestic tourism na punuin ang pagkawala ng mga Chinese tourist na may pinakamalaking bilang ng turista sa bansa.

Mas maraming lokal na turista ngayon ang hinihikayat na tangkilikin ang ating sariling bayan sa halip na pumunta abroad para mamasyal.

Halos 22 porsiyento ng bilang ng mga foreign tourist na pumupunta sa Pilipinas ay nanggaling ng China kabilang ang Macau.

Marami rin tayong turista na galing sa South Korea na isa rin sa mga bansa na matinding tinamaan ng COVID-19.

Mabuti na lang at mabilis na nagresponde ang gobyerno sa banta ng nasabing sakit. Nagbaba agad ng travel ban sa China, South Korea at iba pang mga lugar kung saan matindi ang pagkalat nito.

Nagdeklara na rin ang gobyerno ng “state of public health emergency” para mabilis nitong maagapan ang krisis.

Sa ngayon, habang isinusulat ang pitak na ito, nasa 33 na ang bilang ng kumpirmadong kaso ng COVID-19 sa bansa.

Nahahawig diumano ang COVID-19 sa Severe Acute Respiratory Syndrome (SARS) na kumalat noong 2002 hanggang 2004.

Tulad ng SARS, ang tama nito ay sa baga at lalamunan at ang pasyente ay magkakaroon ng sintomas ng lagnat, ubo, sipon at iba pa.

Ayon sa mga eksperto, kumakalat ang sakit sa pamamagitan ng “droplet” na mailalabas ng taong may impeksiyon.

Kaya ang abiso ng Department of Health (DOH), ugaliin ang paghuhugas ng mga kamay at ang pag-iwas sa mga lugar na maraming tao lalo na kung edad 65 o pataas at may ibang sakit tulad ng diabetes at sakit sa puso.

Kaugnay nito, alam ba ninyo na ang buong Italy ay naka-lockdown na? Ibig sabihin, hindi maaaring lumabas ng mga bahay, bawal magbiyahe o mag-iikot sa bayan. At ang sinumang lalabag sa bagong kautusan ng lockdown ay mumultahan.

Istrikto sa Italy matapos ang patuloy na pagtaas ng bilang ng mga taong may impeksiyon kung saan maging si Pope Francis ay may sakit pero nilinaw naman na hindi ito COVID-19.

Samantala, sa Pilipinas, ang mga bagong kaso ng COVID-19 ay nakita sa mga lungsod sa Metro Manila. Kaya may mga nag-uudyok d’yan na i-lockdown na ang mga lugar na ito.

Gayunman, masyado pang maaga para magdesisyon ng ganito. Ayon kay Pangulong Rodrigo Duterte, aabot sa ganitong punto kapag dumami ng libu-libo ang bilang ng mga kumpirmadong kaso ng COVID-19 sa bansa.

Pagkalat ng COVID-19, unahan na!

Bobi Tiglao / Banat

Sa pagdeklara ni Pangulong Rodrigo Duterte ng “state of public health emergency” sa bansa kaugnay ng coronavirus (COVID-19) ay nakikita nating talagang seryoso na ang isyu at kinakailangan na rin ng karagdagang pag-iingat.

Kung noon, sa China lang kumakalat ang COVID-19, ngayon ay pataas na rin nang pataas ang bilang ng kaso nito sa buong mundo.

Sa Pilipinas, ang naunang dalawang kaso nito ay kapwa Chinese na turista na galing ng Wuhan at pumunta rito.

Pero ngayon, habang isinusulat ang pitak na ito, 6 na ang kumpirmadong kaso nito sa bansa.

Nagdesisyon ang pangulo na magdeklara ng “state of public health emergency” alinsunod sa rekomendasyon ng Department of Health (DOH) at ni Senator Christopher “Bong” Go, ang chairman ng Senate Committee on Health.

Layunin nitong mapabilis ang pagkilos ng gobyerno sa paggamit ng pondo at iba pang kagamitan at mga tauhan para matapatan ang problema ng COVID-19.

Itinaas na rin ng DOH ang “code red, sub-level 1” matapos nilang makumpirma ang pang-anim na kaso ng coronavirus sa bansa.

Ang pang-anim na pasyente ay 59-anyos na babae at naka-confine na sa Research Institute for Tropical Medicine. Ang asawa ng babae ang panlimang kaso ng Covid-19.

Ang lalaki ay hindi nanggaling sa ibang bansa pero napag-alamang madalas itong bumibisita sa isang dasalan para sa mga Muslim sa Greenhills, San Juan City.

Ang ganitong klaseng pagkahawa na hindi galing abroad o ibang bansa na may COVID-19 ay tinatawag na “local transmission”.

Ang delikado ay kung maging “community transmission” ang sakit — ibig sabihin, pagkalat ng sakit sa komunidad, barangay o malaking grupo ng mga tao.

Ayon kay Health Secretary Francisco Duque III, nag-iingat lang ang gobyerno sa pagtaas nito ng alert level.

Ginawa nila ito para makapaghanda ang mga health worker sa mga ospital, gayundin ang iba pang pasilidad kung sakaling dumami ang kaso nito sa bansa.

Sa deklarasyon ng “health emergency”, mapabibilis ang pagbili ng gobyerno ng mga supply ng gamot at iba pang gamit para sa kalusugan ng mga pasyente o sinumang magkakasakit.

Sinabi rin ni Sen. “Bong” Go na ang deklarasyon ng pangulo ng emergency ay para maunahan ang sakit at maging “pro-active” ang gobyerno.

“Huwag na nating hintaying mas kumalat pa ito. Lahat ng ahensiya ng gobyerno, lokal at nasyunal ay tutulong dito,” dagdag pa ni Sen. Go.

Ayon sa Republic Act 10121, kapag may deklarasyon na “state of public health emergency” ay maaaring magamit ng mga lokal na gobyerno ang kanilang pondo na nakalaan para sa local disaster risk reduction management.

Kaya naman, sa kabila ng patuloy na pagkalat ng sakit ay umaasa tayong magiging katuwang ng mamamayan ang gobyerno nang sa gayun ay sabay-sabay nating malampasan ang problemang ito.