Pondo vs. COVID.. P70M, napunta sa ibang bulsa — COA

ni Madel Moratillo | May 28, 2023

Halos P70 milyong pondo ng gobyerno para sa COVID-19 response ay hindi umano napunta sa mga dapat na benepisyaryo nito.

Sa Performance Audit Report ng Commission on Audit sa COVID-19 Adjustment Measures Program beneficiaries o CAMP, isang programa ng gobyerno na nagbibigay ng financial support sa mga manggagawang nawalan ng trabaho dahil sa pandemya, lumilitaw na ang P70.26 milyon ng CAMP fund ay ibinigay sa 14,052 beneficiaries. Pero sa bilang na ito, 6,214 umano ang "ineligible" habang ang 7,838 ay "probably ineligible beneficiaries".

Ito ay dahil natukoy na nakatanggap na sila ng financial assistance sa ilalim ng iba pang financial support program ng gobyerno gaya ng Small Business Wage Subsidy Program ng Social Security System at Social Amelioration Program ng Department of Social Welfare and Development.

Ang iba sa kanila ay natukoy na lagpas sa P40K threshold ang monthly gross salary.

Ayon sa COA, dumepende umano ang DOLE sa deklarasyon ng aplikante dahil walang available at kumpletong centralized database na puwede nilang pagbasehan kung ang aplikante ay nakatanggap na ng iba pang financial assistance ng gobyerno.

DOH, nagsumite na ng dokumento ng COVID-19 vax deals sa COA

ni Lolet Abania | December 15, 2022

Nagsumite na ang Department of Health (DOH) ngayong Huwebes ng mga dokumento ng kanilang COVID-19 vaccine procurement deals sa Commission on Audit (COA).

Personal na iprinisinta ni DOH officer-in-charge Maria Rosario Vergeire ang mga dokumento sa COA sa kahilingan na rin ng Senate Blue Ribbon Committee, na una nang nagsiyasat hinggil sa non-disclosure agreements, kung saan pumipigil umano sa mga auditors para alamin ang vaccine procurement.

Ayon kay Vergeire, kabilang sa mga nai-submit na mga dokumento ay supply agreements na magpapagaan sa pag-audit ng multi-billion-peso loans para sa mga vaccines.

“Handa pong harapin ng Kagawaran ng Kalusugan ang anumang katanungan ukol sa ating vaccine procurement sapagkat kampante tayo na lahat ng mga prosesong isinagawa ng ating pamahalaaan sa pagbili ng mga bakuna upang maprotektahan ang ating mga kababayan ay nakaayon sa batas,” saad ni Vergeire sa isang statement.

Kamakailan, nabanggit ng COA na ang DOH ay nag-request ng isang special audit dahil ito ay ini-require ng World Bank at Asian Development Bank, kung saan nagpo-provide ng mga loans para sa pagkuha ng mga COVID-19 vaccines.

“The DOH is confident of the results that the special audit will yield,” ani Vergeire.

“The first time we procured these vaccines, confident tayo dahil alam natin we bought these vaccines to protect Filipino people,” pahayag ni Vergeire sa mga reporters.

Calida, napiling COA chairman sa Marcos Cabinet

ni Lolet Abania | June 29, 2022

Uupo si Solicitor General Jose Calida bilang chairperson ng Commission on Audit (COA) sa ilalim ng administrasyon ni President-elect Ferdinand ‘Bongbong’ Marcos, Jr.

Ito ang inanunsiyo ngayong Miyerkules ni incoming Press Secretary Atty. Trixie Cruz-Angeles.

Matatandaan na si Calida ay na-appoint ni outgoing President Rodrigo Duterte bilang solicitor general noong 2016.

Nagsilbi rin siya bilang undersecretary ng Department of Justice (DOJ) mula 2001 hanggang 2004.

Sa panunungkulan sa ahensiya ni Calida, siya ang in-charge sa National Bureau of Investigation (NBI), Witness Protection, Security and Benefits Program, Office of the Government Corporate Counsel, DOJ National Task Force on Terrorism and

Internal Security, at DOJ Task Force on Financial Fraud and Money Laundering.

Nabigyan din si Calida ng posisyon na executive director ng Dangerous Drugs Board, kung saan kanyang na-conceptualize ang “Barkada Kontra Droga,” ang drug prevention project ng ahensiya.

Ayon sa COA, isa siya sa mga top earners sa gobyerno noong 2021, na nasa rank 12th na umabot ang kanyang income sa P16.59 million.

Sinabi rin Cruz-Angeles na si Jose Arnulfo “Wick” Veloso ang itatalagang presidente ng Government Service Insurance System (GSIS).

Si Veloso ay kasalukuyang pangulo ng Philippine National Bank (PNB).

Unang nagsilbi si Veloso bilang chief executive officer ng HSBC Philippines. Ang malawak na karanasan ni Veloso sa banking at capital markets ay umabot ng mahigit sa 30 taon, kung saan 23 taon siyang tumagal sa HSBC.