Gov’t. official na todo-epal noon sa isyu ng napasarang bigtime network...

Todo-PR na ngayon dahil bumuwelta at nagbabalik ang istasyon

ni Chit Luna - @Yari Ka! | December 19, 2020

Tila nayanig ang matabil na pulitiko sa posibleng buwelta ng ‘malaking istasyon’ sa kanya dahil sa malaking papel na kanyang ginampanan dahilan kaya tuluyang nabasura ang prangkisa ng istasyon nito lamang Mayo.

Ang panakot ng matabil na pulitiko ay ang kanyang pagiging miyembro ng powerful na ‘religion’, pero biglang-kambyo ito ilang linggo makaraang mabalitaan ang posibilidad na muling talakayin sa plenaryo ang prangkisa ng malaking network.

Posible umanong makakuha ng prangkisa ang istasyon, lalo pa’t mayroon ng bagong pamunuan ang Mababang Kapulungan.

Sinundan pa ito ng maugong na bulung-bulungan hinggil sa naghihintay na kapalaran ng mga kongresistang masigasig na nagsulong ng mga pagkilos kontra sa istasyon.

Ang siste, nagawan ng paraan ng istasyon na makabalik sa ere makaraang payagang iere ang mga programa nito bilang blocktimers.

Sa madaling salita, bigo silang tuluyang patahimikin ang istasyon na ngayon ay balik-ere sa telebisyon. Kaya ngayon, sa takot ng matabil nating bida, nagpalabas na rin siya ng sariling pahayag sa mamamahayag.

Siya nga pala, kilala ang nasabing pulitiko na kunwari’y kumakatawan sa marginalized sector, bilang congressman dahil may katapat na halaga ang kanyang pirma sa bawat bill sa Kamara, lalo pa’t may involved na pera. ‘Yun marahil ang ikinatakot niya — ang pagsambulat ng kanyang katakawan sa pera habang nasa Kamara.

Ayon sa opisyal ng gobyerno na mahusay mangolekta, puwedeng mabigyan ng prangkisa ang istasyon sa ilalim ng bagong Speaker kung maitutuwid aniya ang isyung ipinupukol hinggil sa manggagawa.

‘Susmaryosep, maka-epal lang, maski gastadong linya gagamitin sa kanyang press release. Oh, hayan, ha, pinatulan na namin ang press release mo. Tsk!

Bagitong pulitiko, protektor ng bigtime drug lord kaya bongga palagi ang kampanya at proyekto

ni Chit Luna - @Yari Ka! | December 13, 2020

Nananatiling bigo ang mga law enforcement agencies na masukol ang most wanted na drug lord, hindi dahil siya ay mala-palos sa dulas kundi dahil siya ay patuloy na kinakanlong ng kanyang kamag-anak na malakas ang kapit sa itaas.

Unang lumutang ang pagiging malapit ng drug lord sa bagitong pulitiko nang naglutangan sa social media ang sandamakmak na litratong nagpapakita sa kanilang dalawa sa maraming pagkakataon.

Sa pagsasaliksik sa background ng wanted na Tsekwa, hindi lang pala siya sa Pilipinas nagtatago sa batas kundi maging sa China kung saan siya ay nahaharap din sa patung-patong na kaso na may kaugnayan sa ilegal na droga.

Gayunman, hindi rin naman argabyado si bagitong pulitiko na nagbibigay-proteksiyon dahil malaki umano ang iniambag nito sa kampanya noong ito’y sumabak sa pulitika.

At hindi pa riyan natapos dahil hangga’t napoprotektahan nito ang pinakamalaking tulak ng ilegal na droga sa bansa ay patuloy ang buhos ng suporta sa kanyang mga proyekto.

Malabo ring maubusan ito ng pera dahil patuloy lang ang operasyon ng sindikato sa ilegal na droga. Sa katunayan, isa marahil ang drug lord sa ilang may monopoly sa kalakalan ng ipinagbabawal na gamot.

Sa sobrang lakas nito sa bagitong pulitiko, ilang opisyal ng pamahalaan ang nasakripisyo matapos sumingaw ang impormasyon hingil sa malalaking shipment nitong nakalusot sa mahigpit na pagbabantay ng mga awtoridad.

Sobrang hinayupak talaga ng Intsik na ‘yan lalo pa’t patuloy pa rin niyang sinisira ang buhay ng maraming Pilipino.

Direktor sa ahensiyang may kinalaman sa kalikasan...

Malupit na protektor ng mining activities kaya tiba-tiba na sa delihensiya, pinangakuan pa ng mataas na posisyon!

ni Chit Luna - @Yari Ka! | December 8, 2020

Kabi-kabila kung sumahod ang isang opisyal mula sa mahalagang departamento ng gobyerno — mula sa tanggapan ng ahensiya kung saan siya’y ang amo hanggang sa mga kumpanyang kanyang pinoprotektahan.

Patunay nito ang kanyang pagbalewala sa memorandum na inilabas ng gobernador ng lalawigang lubhang nasalanta ng matinding pagbaha dulot ng mga bagyo nito lamang Nobyembre.

Sa nasabing memorandum na may petsang Nobyembre 26, pinatitigil ng gobernador ang lahat ng mining activities sa kanyang nasasakupan. Disyembre na subalit walang anumang ginagawang hakbang ang direktor.

Ang dahilan ng kanyang pagdedma sa direktiba — makasasama aniya sa infrastructure program ng gobyerno para sa Metro Manila ang tigil-operasyon sa pagmimina sa nasabing lalawigan na pinagmumulan ng malaking bahagi ng mga graba’t buhangin na gamit sa mga pagawaing bayan sa kabisera.

Dagdag pa niya, hindi pa siya nakatatanggap ng kopya ng nasabing pag-uutos.

‘Susmaryosep, hindi bahagi ng iyong trabaho ang mag-alala sa construction industry, at lalong wala kang pakialam sa usapin hinggil sa imprastruktura ng Metro Manila dahil ikaw ay namumuno sa panlalawigang tanggapan ng ahensiya na ang mandato ay protektahan ang integridad ng kalikasan, hindi ng mga lintek na sumisira sa kabundukan!

Ayon sa kasangga natin sa panulat, nakikinabang umano ang ating sa mga kumpanyang nag-o-operate sa naturang lalawigan. Kabilang sa mga kinukunan niya ng delihensiya ay ang mining companies na pag-aari ng kongresista at maging ang ilegal quarry sites na hawak naman ng alkalde ng bayang nasalanta.

Bukod sa regular na delihensiya ay nabahagian na rin pala siya ng shares sa ilang mining companies. Pinangakuan pang kukunin bilang miyembro ng board of directors sa sandaling ito’y magretiro.

Sa kabilang banda, tama siya na protektahan ang mga sumisira ng kabundukan dahil lubhang malaki ang kanyang ganansiya sa mga ito. Mapapa-OMG ka sa laki ng ganansiya ng kumag!