Ex-Speaker, may ambisyong tumakbo sa mataas na posisyon sa 2022...

Nakipag-“friends” sa mga nasa drug watchlist

ni Chit Luna - @Yari Ka! | December 29, 2020

Isang dating tagapagsalita ang palihim na gumagapang sa paglalatag ng political network para sa kanyang tangkang pag-angat sa puwesto sa gobyerno.

Ang siste, wala siyang makuhang matinong taong magsisilbing ‘point man’ niya sa local level dahil sa kanyang hindi kagandahang record bilang gov’t. official, kaya naman pinili niyang i-recruit ang mga narco-politicians o ‘yung mga pulitikong nasa drug watchlist.

Sa kanyang paggapang, mukha namang wala sa intensiyon niya ang manalo, lalo pa’t isang tulog na partido ang kanyang sinamahan matapos siyang ideklarang persona non grata ng mga mismong partidong kanyang dating kinabibilangan.

Gamit ang partidong ito, inaasahang makalilikom ng malaking pondo ang nasabing pulitiko.

Isang taong malapit sa kanya ang nakahuntahan natin nitong Sabado. Aniya, plano ng ating bida na kumita ng kaliwa’t kanan mula sa mga tinatawag niyang “dubious characters.”

Pera rin ang katapat para ampunin niya ang mga taong nagnanais kumandidato pero walang partido. Lubhang importante ang maging official candidate ng accredited na political party, lalo pa’t kaakibat ng pagiging official candidate ng partido ay ang karapatang makakuha ng sipi ng election returns at karapatan para makapagtalaga ng mga precinct watchers. Madali rin makapangilak kung nasa official line-up ang kandidato — anumang posisyon ang targetin.

Sayang naman dahil ang taong nagtatag ng partidong nais niyang gamitin sa personal na interes ay kagalang-galang at tunay na iniidolo sa hanay ng mga sundalo.

Sa pagbubuklat ng record nito, hindi rin mabilang ang kinasangkutan nitong sigalot — at lahat ng ito’y hindi barya!

Manyakis na lider ng sekta...

Buking ang mga kawalanghiyaan, ‘di makulung-kulong dahil malakas ang kapit… ‘di kay ‘Lord’ kundi sa mataas na opisyal ng bansa

ni Chit Luna - @Yari Ka! | December 24, 2020

Sa gitna ng kawalang pag-asa, kadalasang takbuhan natin ay ang Panginoong kinakatawan ng mga tulad nating tao, maliban sa kanilang titulo bilang ‘alagad ng pababa pala tat’.

Lingid sa kaalaman ng nakararami na mayroong ilang lider ng sekta na nananamantala sa mga ganitong pagkakataon, na sa katunayan, itong kilalang pastor mula sa katimugang bahagi ng bansa ay hindi lamang minsan lumabag sa kanyang mga winiwikang kabanalan.

Bukod sa paglabag sa ‘Sampung Utos’ na kanyang pinangangaral, labag din sa batas ng tao ang pananamantala sa kababaihan.

Sumabit ang tinatawag na pastor ng malaking religious group nang sampahan siya ng kasong rape ng isang miyembro ng kanyang sekta. Batay sa salaysay ng nasabing biktima, bagets pa lamang siya nang siya’y simulang halayin ng nasabing ‘lider’. Ang biktima ay dalaga na ngayon.

Ang siste, sadyang malakas ang nasabing pastor sa mataas na opisyal kaya hindi naging mahirap sa kanyang ipa-dismiss agad ang asunto. Katuwiran ng piskalya, wala umanong ibang tao na puwedeng magpatunay na siya ay ginahasa.

Tila ang hanap ng piskalya sa biktima ay ang pangalan ng mga nanonood habang siya ay hinahalay. Tsk! Hindi rin daw pumalag man lang ang biktimang noong mga panahon na ‘yun. Sa mahabang panahon ay ginawa siyang parausan, bukod pa sa pilitan din siyang pinangingilak ng salapi para sa kanilang sekta.

Bukod sa kanya, biktima rin nito ang kanyang ka-relasyong staff na pilit na pinaamin ang money laundering case na naganap sa ibang bansa. Nasintensiyahan ang kanyang staff ng pagkakakulong — at siya naman ay hayahay, sa piling ng kanyang pinakabagong biktima —menor-de-edad na naman.

At hindi pa roon natatapos ang kabulastugan ng balasubas nating bida dahil bukod sa money laundering, pasok din siya na human trafficking. Gamit ang kanyang sekta, madali niyang naikukuha ng visa ang mga kliyenteng kanyang ginagawang bahagi ng entourage sa tuwing ito’y mangingibang-bansa para “mangaral kuno ng mga salita ng Diyos.”

Hindi nakapagtatakang sukdulan siya ng yaman ngayon — na katas ng kawalanghiyaan. Pwe!

Sikat at powerful si Brader na religious leader...

Bait-baitan ang peg sa publiko, patung-patong naman ang kaso!

ni Chit Luna - @Yari Ka! | December 22, 2020

Sino ang mag-aakalang nagkalat pa rin magpahanggang ngayon ang mga bulaang propeta?

Sa katunayan, sa ‘Pinas ay mayroong kilalang personalidad na ginagamit ang pagiging ‘religious leader’ nang sa gayun ay pagtakpan ang kanyang mga kaso ng panunuba sa kapwa.

Si ‘Brader’ na ating bida ay may warrant of arrest pala mula sa southern Metro Manila.

Siya ay nahaharap sa patung-patong na kaso ng estafa kaugnay ng kanyang real estate business. Ang mga warrant of arrest ay ipinalabas na may 20 taon na ang nakararaan at hindi maipatupad dahil siya ay kilalang “all-weather VIP” dahil sa impluwensiya nito sa sinumang nakaupo.

Isa siya sa limang pinakatanyag na religious leaders sa bansa. Isa rin siya sa mga nilalapitan ng mga pulitikong hangad ay makuha ang suporta ng kanyang sekta. Interesante ring malamang may katumbas na pabor itong nakukuha sa mga pulitikong hanap ay kanyang basbas.

Sa pagdalo pa lang sa kanyang prayer meeting, kargado na. Iba pa ang karga kung ang pulitiko ay kakain ng oras sa gitna ng entablado upang magsalita. Pinakamalaki ang ‘ayuda’ kung nais pa nilang itaas ang kanilang kamay ni ‘Brader’.

Walang masamang magpakalat ng mga ‘mabuting balitang’ mula sa Bibliya, pero ang gamitin ang relihiyon para sa malakihang delihensiya at pagtakpan ang warrant of arrest ay sobrang mali!