Seksing opisyal ng gobyerno na nabuntis kuno ng pamilyadong aktor...

Totoong nabuntis pero ng ibang lalaki

ni Chit Luna - @Yari Ka! | February 2, 2021

Halos magwala ang esmi ng sikat na aktor na kilala sa maaksiyong pelikula makaraang sumambulat ang isyu hinggil sa nabuntis umano ng mister niya ang babaeng presidential appointee.

Subalit lingid sa kaalaman ng marami ang dalawang bagay. Una, wala na palang laman ang sinapupunan ng lady presidential appointee. At higit sa lahat, hindi ang aktor ang ama kundi ang batambata nitong jowa.

Palibhasa’y may edad na, naging maselan ang kanyang pagdadalantao kaya naging komplikado ang pagbubuntis nito na naging dahilan ng miscarriage.

Makaraang makapagpahinga mula sa pagkalaglag ng sanggol, agad siyang lumutang upang linisin ang pangalan ng aktor.

Nag-post siya ng picture habang naka-sports bra at leggings na lutang ang tiyan.

Truly na flat ito at mukhang walang lumalaking baby—dahil wala na!

Pero dahil duda ang marami, hamon ngayon ng kanyang mga social media stalkers na mag-live ito sa kanyang social media accounts para patunayang walang nangyari sa kanila ng mister ng kapwa aktres.

Bilang opisyal ng gobyerno, dapat ay may ‘Code of Ethical Conduct’ siyang sinusunod.

Sa maiksing kuwentuhan sa isang kapwa peryodista, sinabi nitong dumalang talaga ang pagpasok sa opisina ng nasabing opisyal na madalas binibisita ng kanyang jowa na nasa early 20’s lang!

Well, busog na busog din aniya sa kapritso ang boylet nito. ‘Kalokah, ang dating sexy star ay isa na palang ‘sugar mommy’ ngayon. Sino ka d’yan, ‘teh?

Pasaway na opisyal ng gobyerno, nakuha na ang gusto kaya dedma na sa utang na loob sa ‘boss’

ni Chit Luna - @Yari Ka! | January 28, 2021

Ganu’n yata talaga ang pulitika, matapos makuha ang gusto ay biglang kambiyo. Tulad nitong isang opisyal ng gobyerno na lubos na pinanggagalaitihan ng kanilang ‘boss’.

Bulung-bulungan ngayon ang pagtalikod ng ating bida sa pamilya ng kanilang powerful na ‘boss’ na siyang tumulong upang siya ay maabsuwelto sa kasong kanyang kinaharap.

Ilang araw pa lamang ang nakalilipas mula nang mabasura ang kaso laban sa kanya, tinalikuran na niya ang pangakong tutulong sa napipintong pagsabak sa 2022 election anak ng kanilang ‘boss’.

Sa halip, siya ngayon ay harapang nagpahayag na susuportahan ng kanyang partido ang kandidatura ng kapwa opisyal ng gobyerno na kilala rin sa larangan ng sports.

Ang siste, buong akala ni ‘boss’ na pahuhupahin ng inggratong opisyal ang ambisyon ng kapwa gov’t. official at hihimukin na lamang itong tumakbo sa mas mababang posisyon.

Lingid sa kaalaman ni ‘boss’, ito pa pala ang nagbuyo na asintahin ang pinakamataas na posisyon dahil baka matulad lang ito sa kasalukuyang nakaupo na sinikil ng administrasyon.

Bukod sa mahahati ang botong magmumula sa katimugang bahagi ng bansa, nawalan din sila ng malaking sponsor.

Sinisisi ngayon ng mga taga-Mindanao ang inggratong opisyal ng gobyerno. Wala dapat agam-agam ang administrasyon sa pagkawala ng mga dating tagasuportang nabibilang sa mga makakaliwang puwersa kung papanig sa kanila ang ‘manok’ na atleta.

Bagama’t kilala ang ating bida na may kamandag sa kinabibilangang lapian, pangako ng mga taga-Mindanao na wala itong makukuhang suporta mula sa kanila.

Kasalukuyan na rin niyang ginagapang ang partidong pinamumunuan ng mayamang mag-asawa na kapwa niya opisyal ng gobyerno.

Tigasin at hindi kayang salingin na general, kapalmuks na nang-aagaw ng lupa sa South

ni Chit Luna - @Yari Ka! | January 23, 2021

Bagama’t nananatiling kabilang sa talaan ng mga lungsod na agresibo ang real estate business, hindi natin mairerekomenda ang pagbili ng lupa sa South kung saan kabi-kabila ang mga insidente ng land grabbing.

Sa likod ng kahabaan ng luntiang highway ay nakaambang peligrong dala ng sindikatong pinamumunuan ng tanyag na retiradong heneral.

Sa pinakahuling kaganapan, 29 katao, kabilang sa isang grupo ng lot owners ng yayamaning Valley Golf Subdivision ng nasabing siyudad ang nabiktima ng nasabing heneral.

Noong Biyernes, dumating ang sasakyang lulan ng pulutong ng mga armadong kalalakihang humahangos pang tumungo sa dulong bahagi ng ‘valley golf’ at doo’y tinakot at pinalayas ang mga lot owners, caretakers at blue guards ng naturang subdivision dahil pagmamay-ari daw ng kanilang among heneral ang naturang lugar.

Mayroon mga ibinahaging dokumentong pinadala ang mga biktimang inagawan ng lupa ng bruskong retired general.

Tumambad ang pangalang “General Yacap” na umano’y nag-utos sa mga armadong pulutong na pasukin at i-take-over ang lugar.

‘Susmaryosep… 29 ang lumalabas na parang inagawan lang ng kendi ni General! Tinangka na rin umano nilang humingi ng tulong sa lokal na gobyerno na agad namang nagbigay-direktiba sa PNP na iproseso ang reklamo laban sa nasabing retired PNP general.

Ang siste, nang malaman nilang si General ang irereklamo ay parang bulang nawala ang mga imbestigador at maging ang hepe na siyang personal na pinakisuyuan ng kinatawan ng city government na unang nilapitan ng mga biktima.

Wala ni isa man sa pulisya ang naglakas-loob na marinig o tugunan man lamang ang kanilang hinaing.

Huli na raw nang mabatid nila mula sa iba pang naging biktima ng land grabbing na si “General Yacap” pala’y sadyang tigasin at hindi kayang salingin sa kanyang walang humpay na agaw-lupa sa nasabing lungsod, maging sa karatig-bayan.

Lumalabas ding may mga sapagkat si General sa mga sangay ng gobyernong nangangasiwa sa paggagawad ng titulo ng lupa.

Mantakin mong may hawak na titulo ng lupa ang mga biktima, pero heto siya na bukod sa sariling titulo ay mayroon ding ilang kaduda-dudang dokumento pa itong pinangangalandakan na nagsasabing kanselado na ang mga titulong iginawad ng nasabi ring ahensiya sa mga taong na-osdo niya.

Walang nagawa ang mga kaawa-awang naagawan ng lupa makaraang makaranas ng matinding banta, dahilan upang kalimutan na lamang nila ang pundar na lupa na mula sa dugo’t pawis ng pagtatrabaho sa mahabang panahon.