Paglayas sa 'Pinas ng mga nars, good news — CHED

ni Mai Ancheta @News | July 12, 2023

Maituturing pa ring good news ang pag-alis ng mga Filipino nurses para mag-abroad kahit nahaharap ang Pilipinas sa kakulangan sa nars.

Ayon kay Commission on Higher Education (CHED) Chairperson Prospero de Vera, kahit may exodus, maituturing pa ring magandang balita ito dahil nangangahulugan lamang na pang-world class ang mga Pinoy nurse.

Mas mag-aalala aniya ang gobyerno kung hindi tatanggapin ang mga Filipino nurse sa abroad.

"The fact that our nurses are in-demand abroad is actually good news because that means we produce world-class nurses," ani De Vera.

Indikasyon umano ito na maganda ang kalidad ng sistema sa edukasyon ng Pilipinas dahil nakakapagpatapos ng magagaling na nars ang bansa.

Matatandaang nagtakda ng limitasyon ang Department of Labor and Employment (DOLE) ng mula 5,000 hanggang 7,000 sa deployment ng Filipino nurses sa ibang bansa dahil nauubusan na sa mga pampublikong ospital.

Ang iba namang nurse na nasa pribadong pagamutan ay kumukuha lamang ng kanilang karanasan at training bilang paghahanda sa kanilang pag-a-abroad.

Mga nurse, nag-aalisan ng 'Pinas.. P-BBM sa CHED: Galaw-galaw

ni Mylene Alfonso | March 31, 2023

Pinakilos ni Pangulong Ferdinand Marcos, Jr., ang Commission on Higher Education (CHED) na agad na tugunan ang kakulangan ng mga nurses sa bansa dahil sa pag-a-abroad na nakaaapekto sa pagbibigay ng epektibong healthcare sa Pilipinas.

"We have to be clever about the healthcare manpower. Our nurses are the best,” pahayag ni Marcos sa pulong kasama ang Private Sector Advisory Council (PSAC) Healthcare Sector group sa Malacañang noong Miyerkules.

"Lahat ng nakakausap kong President, Prime Minister, ang hinihingi is more nurses from the Philippines,” punto pa ng Pangulo habang humihingi siya ng mga kongkretong hakbang sa CHED upang mapanatiling nagtatrabaho ang mga Filipino nurse sa bansa.

Bilang tugon, sinabi ni CHED Chairperson Prospero de Vera III na may ginagawa na silang paraan upang maparami ang mga nurse sa bansa.

Kabilang na ang retooling board non-passers, adopting nursing curriculum with exit credentials, redirecting non-practicing nurses at pagsasagawa ng exchange programs sa ibang bansa.

"Under the nursing curriculum with exit credentials, students could have several options: exit at the end of Level I or II, obtain the certificate or diploma in Nursing, or choose to continue and finish the four-year nursing program to become a registered nurse," paliwanag ni De Vera.

Inaayos na rin umano ng CHED ang flexible short-term masteral program upang matugunan ang kakulangan ng mga instructors sa nursing at medical schools.

Binanggit naman ni Department of Health (DOH) Officer-in-Charge Undersecretary Rosario Vergeire na ina-assess na ng kanilang hanay ang panukalang Magna Carta for Public Health Care Workers at Philippine Nursing Act habang pinag-aaralan ang

standardization ng suweldo ng mga nurse, doktor at healthcare workers.

2M Pinoy student, nabigyan ng libreng college education — CHED

ni Lolet Abania | May 31, 2022

Mahigit sa dalawang milyong estudyanteng Pilipino ang nabenepisyuhan mula sa Universal Access to Quality Tertiary Education Act, na nilagdaan at naisabatas sa ilalim ng administrasyong Duterte, ayon sa Commission on Higher Education (CHED) ngayong Martes.

Ginawa ni CHED Chairman Prospero de Vera III ang anunsiyo sa Day 2 ng Duterte Legacy Summit, na nagpapahayag ng mga naging tagumpay o accomplishment ng administrasyon ni Pangulong Rodrigo Duterte.

Sa nasabing bilang, ayon kay De Vera s, 1.97 milyong estudyante mula sa 220 state at local universities at mga kolehiyo ang naka-avail ng libreng tuition at miscellaneous fees.

Gayundin, 364,168 estudyante ang nabenepisyuhan mula naman sa Tertiary Education Subsidy at Tulong Dunong Program, na nai-provide din sa ilalim ng Universal Access to Quality Tertiary Education law.

Binanggit naman ni De Vera na ang mga rehiyon na may pinakamataas na poverty incidence ang may pinakamaraming bilang ng mga benepisyaryo para sa Tertiary Education Subsidy at Tulong Dunong Program.

Ang Bangsamoro region, na may pinakamataas na poverty incidence para sa first semester ng 2021 na nasa 39.4%, ay umabot sa 17,021 benepisyaryo para sa Tertiary Education Subsidy at Tulong Dunong Program sa parehong panahon.

Sa Region 13 o Caraga, na may poverty incidence na 31%, nabigyan ang 21,172 benepisyaryo. Sa Region 9 o Zamboanga Peninsula nasa 30.9%, sa Region 8 o Eastern Visayas nasa 28.9%, sa Region 12 o Soccsckargen nasa 27.1%, at sa Region 7 o Central Visayas nasa 26.8%, na kung ira-round up ang top six regions ang may pinakamarami ring benepisyaryo.

Sa Region 12 umabot sa 43,360 benepisyaryo habang sa Region 7 ay mayroong 25,995 beneficiaries. Sa Region 8, may 21,389 beneficiaries at sa Region 9 ay nasa 18,295 benepisyaryo. “There is a direct correlation between poverty incidence and the number of grantees. This shows that clearly, this is an anti-poverty program,” sabi pa ni De Vera.