“Sunday lockdown” ipinatupad

ni Ronalyn Seminiano Reonico | January 24, 2021

Isasailalim sa lockdown tuwing Linggo ang Barangay Guadalupe, Cebu City simula ngayong araw, January 24 dahil sa dumaraming kaso ng COVID-19.

Ayon kay Barangay Captain Michael Gacasan, tuwing Linggo ay hindi maaaring lumabas ng bahay ang mga residente ng Bgy. Guadalupe. Ang maaari lamang lumabas ay ang mga health workers, authorized persons outside residence (APOR), at ang mga residenteng may emergency needs.

Isasara rin ang mga business establishments maliban na lamang sa mga “essential” businesses katulad ng mga drugstores.

Mananatili namang available ang public transportation sa naturang lugar.

Samantala, ang Sunday lockdown ay inaasahang magtatagal nang dalawang linggo ngunit maaari rin umanong i-extend kung kinakailangan.

Saad din ni Gacasan, “If the number of cases drops, then there’s no need to continue with the lockdown.”

Ayon sa mga local officials ng Barangay Guadalupe, 43 ang aktibong kaso ng COVID-19 at 34 dito ang naitalang bagong kaso sa loob lamang ng isang linggo na naging dahilan ng pagsasailalim sa lockdown.

Bukod sa Guadalupe, nakapagtala rin ang iba pang barangay ng matataas na kaso ng COVID-19 sa loob ng 14 araw katulad ng Basak San Nicolas (32), Lahug (32), Mambaling (27), Talamban (26), Tisa (26), Kasambagan (25), Camputhaw (24), Bacayan (23) at Punta Princesa (23).

Pahayag din ni Cebu City Emergency Operations Center (EOC) Head and Councilor Joel Garganera, “It’s quite alarming because these cases are not only contained in one area. These are actually found in 27 sitios, and they are really spread out.”

Kumandidatong mayor sa Cebu, in-ambush, patay

ni Thea Janica Teh | January 2, 2021

Patay ang isang kumandidatong mayor noong 2019 sa Barangay Apas, Cebu City nitong Biyernes nang gabi matapos tambangan ng limang armadong lalaki.

Ayon kay Police Captain Francis Renz Talosig ng Mabolo Police Station, kinilala ang biktima na si Ruben Feliciano.

Pauwi na sana si Feliciano kasama ang kanyang pamangkin galing sa trabaho nang bigla itong pagbabarilin bandang 6:30 pm sa Fulton Street. Nakasakay umano ang limang kalalakihan sa puting van na walang plate number kaya agad na nakatakas.

Dumating din agad ang rescue ngunit, hindi na nila naabutang buhay si Feliciano. Samantala, dinala naman sa isang pribadong ospital ang pamangkin nito at nasa mabuti nang kalagayan.

Nakuha sa pinangyarihan ng insidente ang 5 cartridge case ng hindi pa matukoy na caliber, 7 rounds ng live ammunition ng hindi pa rin matukoy na caliber, 3 deformed slug at 1 caliber Glock pistol na may 11 bala.

Sa ngayon ay patuloy pa rin ang imbestigasyon ng mga awtoridad sa kung ano ang motibo ng mga suspek at kung sino ang mga ito.

31 lugar sa Cebu, COVID-19-free na

ni Lolet Abania | December 24, 2020

May kabuuang 31 lugar sa lalawigan ng Cebu ang idineklarang COVID-19-free.

Sa inilabas na record ng integrated provincial health office ngayong Huwebes, kabilang sa mga COVID-free areas sa Cebu ang 30 munisipalidad at isang siyudad.

Ayon sa report, nag-improve ang mga naturang lugar dahil sa disiplina at mahigpit na pagsunod ng mga residente sa ipinatutupad na health protocols.

Sa Cebu City, mayroong 52 sa kabuuang 80 barangays ang naitalang COVID-19-free, ayon sa datos ng health office ng siyudad.

Matatandaang nag-anunsiyo si Mayor Edgar Labella ng Cebu City na magbibigay siya ng P100,000 pabuya para sa mga barangay na magagawang maging zero COVID-19 infections ang kanilang lugar simula November hanggang December ngayong taon.

Sa ngayon, may 26 barangays ang makakatanggap ng ipinangakong P100,000 reward.

Patuloy din na hinihimok ng lokal na pamahalaan ang mga residente na sumunod sa itinakdang minimum health standards upang maiwasan ang pagkalat ng sakit.