Nag-picnic malapit sa waterfall... Tinangay ng flash flood, 3 patay

ni Lolet Abania | September 28, 2021

Tatlo ang patay, kabilang ang isang 7-anyos na bata matapos na iragasa ng flash flood mula sa Tinubdan Falls sa Catmon, Cebu, kamakalawa.

Sa isang regional television report, makikita sa video ang mga kalapit na mga residente sa lugar ay sinusubukan pang sagipin si Kent Jude Monterola na na-stuck habang nakahawak ito sa isang bato sa kabila ng matindi at malakas ng agos ng tubig.

Gumamit pa ang mga residente ng lubid para mahila ang biktima at maiahon ito sa tubig subalit bigo silang mailigtas si Monterola.

Sa ulat, si Monterola ay nagpi- picnic kasama ang kanyang kaanak na si Jacel Alastra, 32 at anak nitong babae na si Princess Alastra, kung saan malapit sa waterfalls.

Nang matapos ang kanilang picnic, nag-swimming ang mga ito malapit sa waterfalls nang biglang rumagasa ang malaking agos ng tubig na tumangay sa kanilang lahat.

Nawala si Jacel habang ang katawan nina Princess at Monterola ay narekober na ng mga awtoridad.

Ang saksing si Carlos Japitana Dolendo na siyang kumuha ng video ay labis ang pagkatakot nang makita niya ang malakas na water current na umaagos.

“That was the most unforgettable moment that happened in my life. Na sobrang killer, killer talaga, killer talaga ‘yung tubig,” salaysay ni Dolendo.

Samantala, isa pang katawan ang natagpuan matapos ang insidente sa naturang waterfall noong Linggo, pahayag ng isa sa mga rescuer ng Catmon Police Station.

Ayon kay Police Senior Master Sergeant Ben Naveles, nakatanggap sila ng report mula sa Carmen Police Station ngayong Martes nang umaga na nakakita ang isang mangingisda ng isang katawan ng babae.

“May natanggap rin kaming report galing sa Carmen Police Station na may mangingisdang nakatagpo ng babaeng patay na palutang-lutang sa karagatan ng Barangay Luyang, Carmen, Cebu,” sabi ni Naveles.

Ayon sa Catmon police, ang malakas na pagbuhos ng ulan mula sa mga bundok ang sanhi ng flash flood.

Nagsasagawa na ng imbestigasyon ang gobyerno ng Catmon sa lugar kung saan naganap ang picnic dahil ang naturang establisimyento ay wala umanong license to operate.

Wa' paki na nagtapon lang daw ng pera sa dagat… "Dolomite is beautiful" – P-Duterte

ni Lolet Abania | August 27, 2021

Ipinagtanggol ni Pangulong Rodrigo Duterte ang multimillion-peso project na crushed dolomite na inilagay sa bahagi ng Manila Bay, kung saan aniya ang naging resulta nito ay maganda.

“Dolomite is beautiful to the eyes, period. ‘Wag ka na magtanong kasi hindi naman ninyo kaya kung kayo,” ani Pangulong Duterte nitong Huwebes nang gabi sa kanyang ikalawang public address ngayong linggo.

“You had your chance, actually. For so many years, you had every chance to do it. Was there anybody willing to take the problem by its horns? Si Cimatu lang (Department of Environment and Natural Resources Secretary Roy Cimatu),” dagdag ng Pangulo.

Bilang bahagi ng P389-milyon Manila Bay rehabilitation program, sinimulan ng DENR noong nakaraang taon ang paglalagay ng tone-toneladang white sand — na gawa sa crushed dolomite boulders na ipinadala sa lugar na galing sa probinsiya ng Cebu — sa maliit na bahagi sa kahabaan ng bay’s shoreline.

Si Cimatu na ipinrisinta ang natapos na proyekto ng DENR sa isang televised briefing ay nagsabing kaya ng dolomite sand na mapigilan ang maaaring coastal erosion, ma-filter ang tubig nito at madagdagan ang beach width ng Manila Bay.

“It is considered a beach nourishment kasi malaking bagay ang nagagawa niya diyan. Nililinis niya ‘yung… na-prevent niya rin ang erosion at saka, ‘yung mga luwag ng beach ay napaluwagan nito,” ani Cimatu.

Nauna na ring sinabi ng DENR na ang beach project ay mag-eengganyo sa mga tao na huwag magkalat sa paligid nito.

Gayunman, umani ito ng mga kritisismo mula sa iba’t ibang sektor gaya ng environmental at fishing groups na tinawag nilang isang “cover-up” sa tunay na problema sa polusyon ng nasabing bay.

Matatandaang tinangay din ang artificial white sand ng malakas na buhos ng ulan na tumama sa nasabing lungsod. Gayundin, nang magkaroon ng bagyo, matapos nito ay napuno ng tone-toneladang basura ang paligid ng Manila Bay.

Isang grupo naman ng mga scientists ang nagpahayag na ang gobyerno ay “literal na nagtapon ng pera sa dagat” dahil anila, ang pondo para rito ay maaari pa sanang magamit sa pagpapabuti ng mga hospital facilities, vaccine procurement, at financial assistance sa panahon ng pandemya para sa mga Pilipino.

Higit 365,000 doses ng Pfizer, dumating na

ni Ronalyn Seminiano Reonico | August 19, 2021

Dumating na sa bansa ang 365,040 doses ng Pfizer COVID-19 vaccine na binili ng pamahalaan noong Miyerkules.

Ayon sa National Task Force Against COVID-19, ang 313,560 doses ay dumating sa Ninoy Aquino International Airport (NAIA) Terminal 3 bandang alas-8 nang gabi. Una namang dumating sa Cebu ang 51,480 doses ng Pfizer vaccines bandang alas-6 nang gabi.

Samantala, sina Vaccine Czar Carlito Galvez Jr. at United States Chargé d’Affaires John Law ang sumalubong sa pagdating ng naturang bakuna.

Saad pa ni Galvez, “‘Yung karamihan dito, ‘yung bibigyan natin are those areas na hindi pa nabibigyan ng Pfizer. We are trying to roll out to them so that in the future, once Pfizer picks up their deliveries, they are well aware and they are already well trained on how to handle the sensitivities of Pfizer.”