500,000 Sinovac COVID-19 vaccine, dumating na sa ‘Pinas

ni Ronalyn Seminiano Reonico | April 22, 2021

Dumating na sa bansa ang karagdagang 500,000 doses ng Sinovac COVID-19 vaccine mula sa China ngayong Huwebes.

Lumapag sa NAIA Terminal 2 ang Philippine Airlines flight na may lulang Sinovac vaccine doses bandang alas-5 nang hapon.

Ayon kay Vaccine Czar Carlito Galvez, Jr., 100,000 sa 500,000 doses ang inaasahang ipamamahagi sa Metro Manila.

Saad pa ni Galvez, "Inaasahan po natin na iyong administration nito is within one week, matatapos po kaagad."

Unang nabanggit ni Galvez na inaasahang darating sa bansa ang 1.5 million COVID-19 vaccines sa bansa ngayong Abril.

Samantala, ayon kay Galvez, umabot na sa 1,612,420 ang naipamahagi nang bakuna laban sa COVID-19 sa bansa.

COVID-19 vaccine na gawang China, oks nang gamitin — Galvez

ni Thea Janica Teh | January 5, 2021

Nilinaw ni COVID-19 National Policy Chief Implementer at vaccine czar Sec. Carlito Galvez, Jr. na maaari nang gamitin ang Sinopharm bilang bakuna kontra COVID-19 dahil may basbas na umano ito ng pamahalaan ng China.

Ang Sinopharm ang vaccine na binanggit ni Pangulong Rodrigo Duterte kamakailan na ginamit umanong bakuna sa mga miyembro ng Presidential Security Group (PSG). Marami ang umalma rito dahil hindi pa ito awtorisado ng Food and Drug Administration (FDA).

Ayon kay Galvez, "Para mawala ang ating misconception sa mga Chinese vaccine, noong last January po, ang China po ay nag-approve ng EUA of Sinopharm for general use. Dalawa po kasi ang ginagawa po ng China, 'yung tinatawag nating emergency authorization for limited use at saka po mayroon tayong emergency utilization for general use.”

Sa inilabas na update ni Galvez kay Pangulong Duterte, sinabi nito na nasa 100 vaccine ang tinitingnan ng pamahalaan kung saan ang ilan dito ay malapit na sa phase 3 trial kabilang ang Sinovac, Sinopharm, AstraZeneca at Pfizer.

“Ang Sinovac at saka 'yung Sinopharm ay nabigyan po sila ng EUA or 'yung emergency use for limited use, katulad po ng Sinovac, limited use for tinatawag nating elderly at saka tinatawag nating 'yung vulnerable sector," dagdag ni Galvez.

Samantala, ibinahagi rin ni Galvez na nagkaroon na rin ng “stringent authority” sa US at UK ang vaccine na gawang Pfizer na sinundan ng Moderna at AstraZeneca.

Para sure na safe... Bong Go: Duque at Galvez, mauna kayong magpa-COVID vaccine

ni Ronalyn Seminiano Reonico | December 6, 2020

Hinamon ni Senator Bong Go ang vaccine czar na si Secretary Carlito Galvez, Jr. at si Health Secretary Francisco Duque III na maunang magpaturok ng COVID-19 vaccine upang masiguro ang publiko na ligtas ito.

Aniya, "Napakaimportante na safe ito, at ang efficacy nito. Dahil marami pa pong takot. Sa kakaikot ko, tinatanong ko sila, may mga nagtataas ng kamay, may mga nag-aalanganin pa. Kaya dapat unahin ang safety ng vaccine na ito.

"I’m challenging Secretary Galvez, once available na po 'yung safe na vaccine, ipapakita niya, along with Secretary Duque, sila po ang unang magpapaturok ng vaccine to encourage naman po.”

Kung mapatunayan ang pagiging epektibo ng vaccine, saad ni Go, "Dapat unahin ang poor, vulnerable, frontliners of course, sila ang nangunguna sa labang ito, mga sundalo, mga guro natin, mga senior citizens po na talagang vulnerable at especially po 'yung mga indigent Filipino people.” Paalala pa ni Go, "Dapat po'y maging libre po ito sa mga mahihirap.”