Bulkang Kanlaon, tumaas ang seismicity

ni Eli San Miguel - Trainee @News | November 22, 2023

Nakapagtala ng mas mataas na seismic activity ang Bulkang Kanlaon na may 15 volcano-tectonic earthquakes mula 3:58 a.m. hanggang 5 a.m., ayon sa Philippine Institute of Volcanology and Seismology (Phivolcs) ngayong Miyerkules.

"These earthquakes ranged in energy from magnitude 1.4 to 4.2 and occurred at depths of zero to 2 kilometers beneath the northern flank of the Kanlaon range," sabi ng Phivolcs sa isang advisory sa ganap na alas-8 ng umaga.

Napansin din ang pagtaas ng volcanic sulfur dioxide (SO2) emission mula 570 tonelada kada araw noong Mayo 1 hanggang 1,017 tonelada kada araw noong Nobyembre 14.

Pinayuhan ng Phivolcs ang publiko at mga lokal na pamahalaan na mag-ingat at iwasang dumaan sa permanent danger zone na may layong apat na kilometro dahil sa mas mataas na posibilidad ng bigla at delikadong phreatic eruptions na maaaring maganap "nang walang abiso" sa Bulkang Kanlaon, na nananatiling nasa Alert Level 1.

"Should the above uptrend in monitoring parameters persist, the volcano status may be raised to Alert Level 2 to warn of increasing unrest," saad ng Phivolcs.

Bulkang Mayon, tuloy sa pag-aalburoto

ni BRT @News | July 21, 2023

Aabot sa 90 volcanic earthquakes, 169 rockfall events at tatlong pyroclastic density current ang naging aktibidad ng Bulkang Mayon sa nakalipas na 24 oras.

Ayon sa Philippine Institute of Volcanology and Seismology (Phivolcs), may tatlong ashing events na tumagal ng isa hanggang 25 segundo.

Naging mabagal ang daloy ng lava mula sa crater na may haba na 2.8 kilometro sa Mi-isi Gully, 2.4 kilometro sa Bonga Gully at 600 metro sa Basud Gully.

Nasa 2,622 tonelada ng sulfur dioxide ang ibinuga ng bulkan at nasa 1,200 metro ang taas ng plume na napadpad sa timog-kanluran.

Nananatili naman sa Alert Level 3 ang bulkan.

Bulkang Mayon, 24 beses nagpayanig

ni Mai Ancheta | June 26, 2023

Bagama't mabagal, patuloy ang pagpaparamdam ng Bulkang Mayon ng mga aktibidad sa nakalipas na 24 oras.

Ayon sa Philippine Volcanology and Seismology (Phivolcs), nakapagtala sila ng 24 na volcanic earthquake sa nakalipas na 24 oras na sinabayan ng 257 rockfall events at 16 dome-collapse pyroclastic events na tumagal ng tatlong minuto.

Sinabi ng Phivolcs na patuloy na nagpapalabas ng lava ang bulkan at mabagal na dumadaloy ito sa Mi-isi at Bunga gullies.

Nakapagtalaga rin ang Phivolcs ng degassing activity at pagbuga ng sulfur dioxide na umaabot sa average na 663 tonelada.

Nananatiling nakataas sa alert level 3 ang bulkang Mayon.

Nakapagtala naman ang Phivolcs ng anim na pagyanig sa Taal Volcano sa Batangas na tumagal ng dalawa hanggang tatlong minuto.