Suarez nakaabang sa rematch kay Navarrete

ni Gerard Arce @Sports | October 30, 2025

Maghihintay hanggang Pebrero ang kampo ni Olympian boxer at unbeaten Filipino challenger Charly “The Kings Warrior” Suarez kung maitutulak pa ang susunod na rematch fight kay Mexican champion Emanuel “El Vaquero” Navarrete. 

Pinaka-aabangan ni Suarez kung mabibigyan ito ng tsansa ng Top Rank Promotions na matupad ang laban kasunod ng kautusan ng World Boxing Organization (WBO), Subalit sakaling walang mangyari ay maaaring mahubaran umano ng korona ang Mexican boxer matapos ipag-utos ng California State Athletic Commission (CSAC) na desisyunang “No Contest” para sa junior-lightweight title sa pagitan nila ni Navarette na naganap noong Mayo 10 sa Pechanga Arena sa San Diego, California. 

Itinakda ang panibagong tapatan kasunod ng kontrobersyal na unang pataw na technical decision matapos magtamo ng cut ang Mexican boxer dulot umano ng accidental headbutt nang ipatigil ni referee Edward Collantes ang laban.

"Hintay lang kami hanggang Pebrero kung tuloy ang rematch kasi kung hindi mahuhubaran na siya ng title," pahayag ng head coach ni Suarez na si Delfin Boholst sa panayam ng BULGAR Sports sa ginanap na world title fight ni Pedro Taduran kontra Pinoy boxer Christian Balunan para sa International Boxing Federation (IBF) minimumweight title noong nagdaang Linggo ng gabi sa San Andres Sports Complex sa Malate, Maynila. 

Nais namang magkaroon ng tune-up fight si Suarez na nananatiling nakatali sa rankings ng WBO, kung saan hawak pa rin ang No.1 contender. Inaalala ng kampo ng Pinoy boxer ang mawala ang hinahawakan nitong ranggo tulad ng naging karanasan sa ibang boxing organization, kung saan nawala ang rankings nito.

Tapales panalo sa knockout, Bacosa undefeated sa Thrilla

ni Gerard Arce @Sports | October 30, 2025

Umiskor si Eman Bacosa ng panalo sa unanimous decision laban kay Nico Salado sa Thrilla in Manila II 50th Anniversary sa Smart Araneta Coliseum kahapon. (fbpix)

Nagamit ni dating unified junior featherweight champion Marlon "Nightmare" Tapales ang  malawak na kaalaman laban kay Venezuelan boxer Fernando Toro sa 6th round knockout sa 8th-round super-bantamweight bout, habang napanatili ni Eman Bacosa ang unbeaten na marka sa undercard matches ng Manny Pacquiao Presents: Blow-By-Blow Thrilla in Manila II sa Smart Araneta Coliseum kagabi. 

Bumanat ng matinding kumbinasyon ang 33-anyos na tubong Tubod, Lanao del Norte upang makamit ang ika-4 na sunod na panalo upang mapaluhod ang Venezuelan boxer na tuluyang sumuko sa ika-anim na round. 

Patuloy na nagpapataas ng kanyang pwesto sa world rankings si Tapales sa No.2 sa World Boxing Council (WBC), No,3 sa IBF, No.4 sa World Boxing Organization (WBO), No.7 sa WBA at No.1.

Napanatili ni Bacosa ang unbeaten na marka sa 7-0-1 matapos makuha ang unanimous decision na panalo laban kay Nico Salado (2-2-1, 1KOs). Naka-puntos ang anak ni Pacquiao ng pagpabor sa mga huradong sina Elmo Coloma at Eddie Nobleza ng 60-53 at kay Danilo Lopez ng 58-55 para sa ikalawang sunod na panalo ngayong taon.

Impresibo sa apat na laban si Bacosa na may malinis na 5-0-1 rekord kasama ang apat na panalo mula sa knockouts.  Sa ibang resulta, pinatumba naman ni Ronerick Ballesteros si Speedy Boy Acope sa 5th round para sa Philippine Youth lightweight bout, tabla ang laban nina Albert Francisco at Ramel Macado Jr. para sa bakanteng WBC International flyweight belt.

Taduran tatapatan daw ng lakas ni Balunan

ni Gerard Arce @Sports | October 26, 2025

Hindi natatakot sa mas matangkad na katapat si reigning at defending International Boxing Federation (IBF) minimumweight champion Pedro “Kid Pedro Heneral” Taduran na masusubok kontra sa undefeated at No.3 Pinoy contender Christian “Punchtian” Balunan sa main event ng Prelude to “Thrilla in Manila II Countdown” ngayong gabi sa San Andres Sports Complex sa Malate, Maynila.

Aminado ang 28-anyos na southpaw na napaghandaan at napag-aralan nilang maigi ang isitilo at galaw, gayundin ang taas na 3 pulgada ni Balunan. “Sanay naman ako lumaban ng matangkad na tulad ni Balunan. Maganda ang gameplan namin ni coach Carl Penalosa,” pahayag ni Taduran sa press-conference kahapon at official weigh sa Orchid Gardens Suites na kapwa tumapak sa 104.3 pounds.

“Kailangan ko ring iwasan yung mga malalakas na suntok niya pero kung mabibigyan naman ako ng pagkakataon na ma-knockout siya, darating yun,” paliwanag ni Taduran sa Bulgar Sports, na muling sasabak sa world title fight sa bansa, kung saan unang nagkampeon kontra Samuel “Silent Assassin” Salva sa 4th round stoppage sa Philippine Marine Corp sa Taguig City noong Set. 3, 2019, ngunit dalawang beses namang nabigo kontra Rene Mark “Mighty Mouse” Cuarto noong Pebrero, 2021 sa General Santos City at rematch noong Peb. 2022 sa Digos City dulot ng accidental headbutt.