Suarez papalagan si Lomachenko, kapag naantala ang laban kay Navarrete

by Gerard Arce @Sports News | August 19, 2026

Photo: SUAREZ AT LOMACHENKO (photo by fightnews/wallpaperaccess)

Hindi magdadalawang-isip si Olympian at unbeaten pro boxer Charly “The King’s Warrior” Suarez na muling makalaban si two-time Olympic champion at three-division world titlist Vasily “Loma” Lomachenko sakaling pagtagpuin ulit ang landas kasunod ng panibagong paghihintay sa naaantalang pagsuntok sa world title fight kay unified super-featherweight titlist Emanuel “Vaquero” Navarrete ng Mexico.

Nanatiling nakabinbin ang rematch ng 37-anyos na 2016 Summer Olympian at mandatory challenger sa pamunuan ng World Boxing Organization (WBO) kontra Navarrete kasunod ng panibagong report na maaaring magbigay ng unification match sa Mexican champion kontra World Boxing Council title holder O’Shaquie Foster sa hinaharap.

Hindi naman ito nagustuhan ng kampo ni Suarez at muling iginiit ang kanilang karapatan bilang mandatory challenger kay Navarrete kasunod ng kontrobersyal na matchup noong Mayo 10, 2025 na nauwi sa technical decision pabor sa Mexican boxer, na kinalauna’y napagdesisyunang gawing ‘No Contest’ ng California State Athletic Commission (CSAC) matapos ang maling desisyon na accidental headbutt ni referee Edward Collantes.

“Grabe na talaga. More Politics ang boxing,” pahayag ng head trainer at manager ni Suarez na si Delfin Boholst sa panayam ng Bulgar Sports.

“Walang kwenta ang mandatory hindi naman nasusunod. [Pero] wala pa din final hangga’t walang pang official galing sa WBO. Inaantay namin ang promoter,” dagdag ng dating national team boxer patungkol sa promoter na si Sampson Lewkowicz. Naungkat naman ang panibagong landas sa rematch nina Suarez at Lomachenko, na magsisilbi umanong No.1 contender sa magwawagi sa unification match nina Navarrete at Foster.

Minsang nagtapat ang dating three-time Southeast Asian Games champion at dating two-time World Championships gold medalist sa isang semi-pro sa AIBA World Series of Boxing noong 2013, kung saan nanaig ang Ukrainian sa fifth round unanimous decision. “Yes naman,” bulalas ni Boholst sa naturang hamon.

“Wala naman kami pinipili na kalaban. Kapag my opportunity, go si Charly.” Ayon naman umano sa WBO, naabisuhan na ang kanilang pamunuan ng kampo ni Navarrete na desidido itong harapin si Foster, na kapwa hawak ng Top Rank Promotions, para sa unification match.

Subalit, ito’y rerepasuhin at pag-aaralang mabuti ng WBO. “Navarrete-Foster is unquestionably one of the most significant and compelling matchups that can be made in the 130-pound division. However, the WBO must carefully review and consider the respective arguments and positions of all parties involved and, pursuant to its governing policies, rules and regulations, render the applicable ruling,” ayon sa statement ng WBO.

“Accordingly, the matter will now be referred to the WBO championship committee for its consideration and determination in accordance with the WBO’s established procedures.”

Santisima tagumpay sa TKO vs. Ogun

by Gerard Arce @Sports News | August 18, 2026

Photo: Santisima (seagnetworkpix)

Babalik ng bansa si Pinoy top super-bantamweight prospect Alex “Savage” Santisima Jr. hawak ang malaking upset victory kontra kay dating world champion at highly-rated Japanese boxer Yukinori Ogun isa bisa ng eight round technical knockout nitong weekend na ginanap sa Korakuen Hall sa Tokyo, Japan.

Hindi inaasahan ng kampo ng 26-anyos na si Santisima mula Cebu City ang magulpi ang dating International Boxing Federation (IBF) super bantamweight champion matapos ipahinto ni referee Katsuhiro Nakamura ang laban sa 1:08 ng eighth round, kasunod ng serye ng mga kumbinasyong upak na binitawan ni Santisima sa naturang round, kabilang ang mabigat na kanang hook na tuluyang nagbigay ng senyales sa Japanese referee.

“Winning every round lang talaga ang plano namin at i-out box siya (Oguni). Wala sa plano na ma-knockout si Oguni. Bonus na lang talaga yung TKO,” pahayag ni head trainer Michael Domingo sa panayam ng Bulgar Sports kahapon.

Naging madiin ang mga binibitawang mga patama ng Cebuano boxer higit na sa nagdaang tatlong round, mga pagkakataon na nahirapang makarekober ang Japanese boxer, na matatandaang tumalo kay dating unified 122-pound champion Marlon “Nightmare” Tapales at nagpahirap kay three-division world champion John Riel “Quadro Alas” Casimero. “Gusto pa yata nila mag-rematch, [pero] pinag iisipan pa namin,” wika ni Domingo.

Fajardo magpapalakas vs. IBF titlist Yabuki sa world fight

by Gerard Arce @Sports News | August 18, 2026

Photo: Miel SIlent Assassin Fajardo - Everlast Philippines

Higit na paghahandaan ni International Boxing Federation (IBF) flyweight top rated contender Miel “Silent Assassin” Fajardo sa kanyang ensayo ang posibleng makakatapat para sa nilulutong upakan kontra reigning titlist Masamichi Yabuki ng Japan.

Kilalang knockout specialist ang 34-anyos na Japanese boxer na tatlong beses na matagumpay na nadedepensahan ang IBF 112-pound title belt kontra kina Angel Ayala Lardizabal ng Mexico, Felix Alvarado ng Nicaragua at Mexican Rene Calixto nito lamang Hunyo 6 na nagtapos sa dominanteng 12-round unanimous decision sa Japan.

Tulad ni Yabuki, makokonsidera ring isang knockout artist ang 26-anyos na Agusan del Sur na nakakuha ng dalawa sa tatlong huling laban, kabilang ang first-round technical knockout laban kay Tobias “Pitbull” Reyes para sa title eliminator nitong Abril 11 na ginanap sa Argentina.

Dahil sa panalo ay umangat sa pagiging No. 1 contender ang 5-foot-4 Pinoy boxer para hamunin si Yabuki sa hinaharap, kung saan bago ang laban ay nakatayo sa 4th ranked si Fajardo, habang nasa 3rd ranked naman si Reyes, matapos mabakante ang unang at ikalawang ranggo.

“Napanood namin iyong laban n’ya, kaya para sa akin, tingin ko lang mas mahirap ito kasi champion siya,” pahayag ni Fajardo sa mensahe sa Bulgar Sports. “Malakas halos lahat ng nakalaban niya, [pero] na-knockout niya. Kaya pag-iinsayohan ko na lang ito ng maigi.”