Foreign tourists patuloy na bumibisita sa Boracay

ni Jasmin Joy Evangelista | February 26, 2022

Patuloy na tumataas ang bilang ng mga turista sa Boracay matapos ang pagluwag ng restrictions at pagpasok ng foreign tourists sa bansa.

Nasa 53,787 tourists ang bumisita sa sikat na island-resort simula nitong Pebrero hanggang nitong Miyerkules, ayon sa datos mula sa municipal tourism office ng Malay sa Aklan kung saan matatagpuan ang Boracay.

Kabilang dito ang 242 foreign tourists na karamihan ay mula sa United States (85), Germany (25) at United Kingdom (21), ayon sa municipal tourism office.

Noong nakaraang linggo, umabot sa 3,000 kada araw ang tourist arrival dito. Ang mga fully COVID-19 vaccinated foreign tourists mula sa visa-free countries ay pinayagan nang makapasok sa bansa mula noong Feb. 10 habang ang mga domestic tourists na fully vaccinated ay puwede ring bumisita sa Boracay at kailangan lang ipakita ang vaccination certificates o cards maliban sa confirmed hotel booking.

Samantala, patuloy ang pagbibigay ng free COVID-19 booster shots ng LGU para sa lahat ng turista sa isla.

Boracay nag-aalok ng libreng booster shots sa mga residente at foreign tourists

ni Jasmin Joy Evangelista | February 13, 2022

Nag-o-offer ang isla ng Boracay ng COVID-19 booster shots para sa mga residente at foreign tourists nito.

Sa launching ng Resbakuna sa Botika at Resbakuna Kids sa Boracay nitong Biyernes, sinabi ni Tourism Secretary Bernadette Romulo-Puyat na puwedeng magpa-booster shots kontra COVID-19 ang mga turista habang nag-e-enjoy sa kanilang bakasyon.

"Ang maganda, pupunta lang sila dito, tapos libre pa ang booster. [Mayroon pang] sand, beach, napakasarap na pagkain at bakunado lahat ng tao," ani Puyat.

Ayon kay Puyat, nasa 1,000 tourists pa ang inaasahang darating sa bansa hanggang sa Biyernes matapos buksan ang borders sa mga fully vaccinated foreign travelers.

Inire-require sa Boracay ang negative RT-PCR test results at proof of vaccination sa mga foreigners, at local tourists.

"Ang maganda sa Boracay, 100% vaccinated ang population at ang tourism workers ay walang vaccine hesitancy,” ayon pa kay Puyat.

Samantala, sinabi ni National Task Force Against COVID-19 chief implementer at vaccine czar Sec. Carlito Galvez, na puwedeng maging role model para sa iba pang tourist destinations at areas sa bansa dahil sa vaccination rollout at coverage nito.

"You now harvest the fruits of your labor, first time now that we heard na zero ang COVID-19 cases dito. Despite the movement of people, talagang nakikita natin ‘yung effect ng vaccine na it really saves lives and prevents severe [cases] and hospitalization," ani Galvez.

"Dahil 100% na ang ating vaccination dito, we encourage the people of Boracay and Aklan, na kayo ulit ang maging model ng 100% na boosted [population]."

Kahit walang swab test result... Fully vax travelers, oks na sa Boracay at Puerto Galera

ni Lolet Abania | February 2, 2022

Hindi na kinakailangang magprisinta ng negative RT-PCR test ang mga fully vaccinated travelers kung bibisita sila sa tanyag na tourist destinations gaya ng Boracay at Puerto Galera.

Sa inisyung executive order ni Aklan Governor Florencio Miraflores, nakasaad na pinapayagan na ang mga fully vaccinated tourists na pumasok sa lalawigan kahit walang ipinakitang negative COVID-19 test simula ngayong Miyerkules.

Gayunman, kailangan lamang magprisinta ng mga biyahero ng proof of vaccination gaya ng VaxcertPH, locally-issued vaccination card, World Health Organization International Certificates of Vaccination and Prophylaxis, at vaccination cards o certificates na inisyu abroad.

Para naman sa fully vaccinated na mga turista na patungong Puerto Galera, kailangang magprisinta sila ng isang proof of vaccination at Safe, Swift and Smart Passage (S-PASS).

Sa isang interview ngayong Miyerkules kay Department of Tourism (DOT) Secretary Bernadette Romulo-Puyat, sinabi nitong nasa 100% ng mga tourism workers ang nabakunahan na kontra-COVID-19.

Ayon pa kay Puyat, patuloy ang DOT na nakikipagtulungan sa mga lokal na gobyerno para tiyakin na ang minimum health protocols ay sinusunod ng mga establisimyentong kanilang nasasakop.

“We have to work closely with different LGUs kasi dapat talaga sila ‘yung nag-i-implement ng minimum health safety protocols,” ani Puyat.