Lagpas sa limit — DOT... 20K turista, dumagsa sa Boracay noong Huwebes at Biyernes Santo

ni Lolet Abania | April 18, 2022

Ipinahayag ng Department of Tourism (DOT) ngayong Lunes na umaasa sila sa mga awtoridad na mareresolbahan ang umano’y paglabag sa Boracay Island kung saan lumagpas ito sa nararapat na kapasidad matapos na mahigit sa 20,000 turista ang bumisita sa naturang tourist destination noong Huwebes Santo at Biyernes Santo.

Ayon sa DOT, inabisuhan na nila ang Department of the Interior and Local Government (DILG) at Department of Environment and Natural Resources (DENR) kaugnay sa isyu at hinimok na magsagawa ng nararapat na aksiyon ang mga ahensiya upang maiwasan ang katulad na insidente na muling mangyari.

“We continue our coordination with them, especially the DILG, which has jurisdiction over the LGU (local government unit), to address this concern and prevent similar incidents from happening in the future,” saad ng DOT.

Nang matapos ang rehabilitasyon ng Boracay, inirekomenda lamang sa 19,215 ang daily limit ng mga turista para maiwasan ang over-tourism at maprotektahan pa ang isla.

Subalit, ayon sa report ng Malay Tourism Office sa DOT, ang bilang ng mga turista sa isla ay umabot sa 21, 252 noong Abril 14 habang 22,519 noong Abril 15, na mas mataas sa daily limit nito.

“Gusto natin malaman sa ating mayor at sa ating governor, bakit nila pinayagan ito. Hindi ito by air dahil ang by air, talagang limited number of [travelers] dumating by air. This is all by land. We are waiting now for the mayor because he is answerable to this,” sabi ni DOT Secretary Bernadette Romulo-Puyat.

“Maling-mali kasi may pandemic pa,” dagdag ng opisyal.

Sinabi pa ng DOT na kahit unti-unti nang nakababawi ang industriya mula sa pandemya dapat pa ring tandaan na kailangang ipatupad ang mga health at safety protocols.

“Kailangan natin, maintindihan nating lahat na we are in the midst of a pandemic. Gusto natin magkatrabaho lahat pero hindi i-compromise ang health and safety,” giit pa ni Puyat.

Sa ngayon, wala pang pahayag si DILG Secretary Eduardo Año hinggil sa nasabing isyu.

Pinakamataas mula nang mag-pandemya… Boracay tourist arrivals pumalo sa higit 150K nitong Marso

ni Jasmin Joy Evangelista | April 5, 2022

Umabot sa 150,597 o nasa average na 4,858 kada araw ang tourist arrivals sa Boracay Island noong nakaraang buwan, ang pinakamataas makalipas ang dalawang taon mula nang ideklara ang COVID-19 pandemic noong March 2020.

Ngunit sa kabila nito, nanatiling mababa ang bilang ng foreign visutory, mahigit isang buwan matapos payagang makapasok sa bansa ang fully vaccinated tourists mula sa visa-free countries.

Karamihan sa mga bumibisita sa isla ng Boracay — na nasa 146,440 — ay mga domestic tourists habang ang mga Pinoy na nakabase sa ibang bansa ay nasa 1,624 ang bumisita.

Ang mga foreign tourists naman ay nasa 2,533 o 1.68 percent.

Bahagyang mababa ang bilang ng tourist arrivals noong nakaraang buwan kumpara sa pre-pandemic figures — 160,070 noong January 2020 at 103, 834 noong sumunod na buwan, base sa datos mula sa tourism office ng Malay, Aklan.

Algae sa Boracay beach, ‘di toxic — BIARMG

ni Lolet Abania | March 5, 2022

Hindi senyales na may mababang antas ng kalidad ng tubig ang pagkakaroon ng green algae sa baybaying isla ng Boracay dahil ito ay tinatawag lamang na natural phenomenon, ayon sa Boracay Interagency Rehabilitation Management Group (BIARMG) ngayong Sabado.

Sa isang statement, sinabi ng BIARMG na ang algae ay normal na dumarami sa tuwing dry season o tag-init. “This is non-toxic and should not be a cause for concern. In fact, the volume of algae has naturally subsided significantly in the past 2 weeks,” pahayag ng BIARMG.

Paliwanag pa ng BIARMG, ang fecal coliform levels sa front beach ng isla ay nasa pagitan ng 8 hanggang 11 mpn (most probable number) kada 100 milliliters mula Enero hanggang Pebrero 2022. Anila, nakamit naman nito ang water quality standards para makapag-swimming na nasa 100 mpn kada 100 ml.

“The tourists are assured that Boracay’s waters are clean and safe for swimming and BIARMG is steadfast in its mandate to provide accurate information to the public,” sabi ni BIARMG general manager Martin Jose V. Despi.

Ayon sa Boracay city environment and natural resources office, inaasahan na magtatagal ang mga algae doon hanggang Abril o Mayo.