Sa pagtatapos ng termino Duterte, binigyan ng departure honors

ni Lolet Abania | June 30, 2022

Umalis na si Pangulong Rodrigo Duterte sa Malacañang ngayong Huwebes ng umaga, isang oras bago magtapos ang kanyang termino ng Hunyo 30.

Sa pag-alis ni Duterte sa Malacañang, binigyan siya ng departure honors mula sa military sa loob ng Palace grounds. Tumanggap din si Duterte ng pagkilala mula sa kanyang successor na si Ferdinand “Bongbong” Marcos. Jr., na naging saksi sa recognition nito.

Nagkamay naman sina Duterte at Marcos, bago tuluyang umalis ang dating pangulo sa Palasyo patungo sa kanyang hometown sa Davao City.

Si Marcos ay dumating ng Malacañang pasado alas-10:00 ng umaga at nagbigay ng courtesy call kay Duterte para sa tradisyonal na “salubong” bago nagtungo sa National Museum of the Philippines upang manumpa bilang ika-17 pangulo ng Pilipinas ngayong araw.

Samantala, sa huling pagkakataon pinulong ni Duterte ang mga miyembro ng kanyang gabinete ngayong umaga ng Huwebes. Ayon kay Sen. Bong Go, pinasalamatan ni Duterte ang mga opisyal na tumulong sa kanyang magsilbi sa bansa sa nakalipas na anim na taon.

“Well... I am a student of government. Alam mo matagal ako sa gobyerno. I think I assembled one of the best Cabinet... Totoo. Piling-pili ko,” pahayag ni Duterte sa isang video message na kinuhanan sa kanilang final gathering, at nai-share sa press ni acting spokesman at Communications Secretary Martin Andanar.

Hinimok din ni Duterte ang publiko na suportahan ang administrasyon ni Pangulong Bongbong Marcos. “Let us give all our support to the new administration. Tulungan natin sila. Tulungan natin si Marcos,” pahayag ni dating Pangulong Duterte.

Sa kanyang inagurasyon.. ‘Ang pangarap n’yo ay pangarap ko’ — Pangulong Bongbong Marcos

ni Lolet Abania | June 30, 2022

Tatlumpu’t anim na taon matapos na si yumaong dating Pangulong Ferdinand Marcos Sr. at kanyang pamilya ay umalis ng Pilipinas sa gitna ng EDSA People Power Revolution na nagpatalsik sa kanya sa posisyon, ang anak niyang si Ferdinand “Bongbong” Marcos, Jr. ay nagbabalik sa Malacañang bilang Chief Executive ng bansa, kung saan inihalal ng mahigit sa 31 milyong Pilipino.

Ngayong Huwebes, nanumpa ang 64-anyos na si Bongbong Marcos bilang ika-17 pangulo ng Pilipinas sa ginanap na inagurasyon sa National Museum.

Sa kanyang journey sa pagka-pangulo, ang dating senador ang nag-dominate sa mga pre-election surveys, nagpatatag sa kanyang pangunguna at kay Davao City Mayor Sara Duterte bilang kanyang running mate, at noong Mayo 9 ay nakakuha ng 31,629,783 boto na tumalo kay Vice President Leni Robredo at walong iba pang presidential bets.

Nagtala ng 58% ng mga boto sa Eleksyon 2022, si Marcos ang unang pangulo ng Pilipinas na nahalal ng majority mula noong EDSA Revolution.

Sa mga nagdaang araw simula ng kanyang proklamasyon noong Mayo 25, kinilala ng ibang mga bansa ang tagumpay ni Marcos, kung saan ang mga foreign emissaries ay nagbigay ng kanilang courtesy calls sa nahalal na pangulo upang batiin ito sa kanyang pagkapanalo.

Matapos ang isang military at civic parade, kasabay ding makikita sa himpapawid ang maraming jet at choppers ng bansa, binasa ni Senate President Vicente Sotto III ang proklamasyon ng electoral victory ni Marcos.

Kasunod nito, ipinatong ni Marcos ang kanyang kamay sa Bibliya na hawak ng asawa niyang si Liza at isinagawa ang kanyang panunumpa kay Chief Justice Alexander Gesmundo.

“We’ve been through times of bitter division but united we came through to this when we shall begin again. But better,” pahayag ni Marcos sa kanyang inaugural address.

“I’ve listened to you and this is what I have heard. We all want peace in our land. You and your children want a chance at a better hope in a safer and more prosperous country,” saad niya.

“All that is within reach of a hard-working, warm and giving race. Your dreams are mine. Ang pangarap n’yo ay pangarap ko,” deklarasyon ni Pangulong Bongbong Marcos.

Disqualification at COC cancellation petitions kay Marcos, ibinasura na ng SC

ni Lolet Abania | June 28, 2022

Nagkakaisang ibinasura ng Supreme Court (SC) ngayong Martes, ang mga petisyon para idiskwalipika at ikansela ang certificate of candidacy (COC) ni President-elect Ferdinand “Bongbong” Marcos Jr., ng May 2022 elections.

May botong 13-0, ayon sa high court, nabatid na si Marcos ay qualified na tumakbo at mahalal sa public office. “Likewise, his COC, being valid and in accord with the pertinent law, was rightfully upheld by the Comelec (Commission on Elections),” pahayag ng SC sa isang press briefer.

Ayon sa SC, “Justice Henri Inting and Justice Antonio Kho did not take part in the deliberations as Inting’s sibling is incumbent Comelec Commissioner Socorro Inting while Kho is a former Comelec commissioner.”

Gayundin anila, ang member-in-charge ay si Justice Rodil Zalameda. Matatandaan na nais ng isang grupo ng mga petitioners na alisin si Marcos sa May 2022 presidential race dahil sa kabiguan nitong mag-file ng income tax returns (ITRs) mula 1982 hanggang 1985, kung saan anila ay katumbas ng moral turpitude at ground para sa disqualification, ang nagtungo sa Supreme Court noong Mayo matapos na ibinasura ng Comelec ang kanilang mga petisyon.

Isa pang grupo ng mga petitioners na binubuo ng mga Martial Law survivor ang naghain din ng isang petisyon na humihimok naman sa SC na ideklarang perpetually disqualified si Marcos mula sa public office at hindi maaaring tumakbo kahit pa sa pinakamababang elective position.

Gayunman, si Marcos na anak ng yumaong dating Pangulong Ferdinand Marcos Sr. ay pinalad na manalo noong May 2022 elections, kung saan nagkaroon ng mahigit na 31 milyong boto, habang nakatakdang manumpa bilang ika-17 pangulo ng Pilipinas sa Huwebes, Hunyo 30.