Alternatibong fishing sites para sa mga apektado ng oil spill

ni Mylene Alfonso | April 16, 2023

Ipinag-utos ni Pangulong Ferdinand R. Marcos, Jr., sa Department of the Interior and Local Government na makipag-usap sa local government units upang maikasa ang alternatibong fishing grounds sa mga apektadong mangingisda dahil sa oil spill sa Oriental Mindoro.

Ginawa ng Pangulo ang kautusan matapos magsagawa kahapon ng aerial inspection, situation briefing at bisitahin ang mga apektadong residente sa Pola.

Kabilang sa mga alternatibong fishing sites ay sa Regions 4-A at 4-B kasama na ang Mindoro Strait; Cuyo Pass sa Batangas; Tablas Strait sa Romblon at Tayabas Bay sa Quezon.

Tiniyak din ni Marcos na patuloy na babantayan ng national government sa pamamagitan ng Bureau of Fisheries and Aquatic Resources (BFAR), Department of Agriculture (DA), at Department of Environment and Natural Resources (DENR) ang oil

spill.

Tuloy din aniya ang clean-up operations ng Philippine Coast Guard.

Sunod naman aniyang tututukan ng pamahalaan ay ang makarekober naman ang ekonomiya sa mga apektadong lugar.

‘Wag mag-alala sa PH-US military bases.. Marcos sa China: ‘Di namin kayo lalabanan

ni Mylene Alfonso | April 11, 2023

Wala umanong dapat ikapangamba ang China kaugnay sa mga karagdagang site sa ilalim ng Pilipinas at ng Enhanced Defense Cooperation Agreement (EDCA) ng Estados Unidos.

Ito ang mensahe ni Pangulong Ferdinand Marcos, Jr., sa China lalo na kung wala naman aniyang nangyaring pag-atake.

“Kaya’t kung wala naman sumusugod sa atin, hindi na sila kailangan mag-alala dahil hindi naman sila natin lalabanan. Ang ginagawa lamang natin ay ipagpatuloy natin na pinapatibay natin ang depensa ng ating teritoryo, ang pagdepensa ng Republika,” sabi ni

Marcos sa sidelines ng Araw ng Kagitingan na ginanap sa Mount Samat National Shrine.

Kabilang sa apat na bagong EDCA sites ay ang Naval Base Camilo Osias at Lal-lo Airport na nasa Cagayan, Camp Melchor Dela Cruz sa Gamu, Isabela, at Balabac Island sa Palawan.

Hindi rin aniya papayagan ng Pilipinas na gamitin ng mga tropang Amerikano ang mga base bilang bahagi ng EDCA para sa paglulunsad ng mga opensibang pag-atake.

“Ngayon, ang reaction ng China ay hindi naman siguro kataka-taka dahil nag-aalala sila.

Pero hindi naman tayo, hindi naman gagamitin, hindi tayo papayag, ang Pilipinas, hindi tayo papayag na gamitin ang mga bases natin para sa kahit anong offensive na action.

Ito ay para lamang tulungan ang Pilipinas, kapag nangangailangan ng tulong ang Pilipinas,” diin ni Marcos.

Ngayong Semana Santa.. P-BBM, magninilay-nilay

ni Mylene Alfonso | April 1, 2023

Plano ni Pangulong Ferdinand Marcos, Jr., na magkaroon ng quiet time para sa kanyang sarili at sa kanyang pamilya ngayong Semana Santa.

Sinabi ni Marcos na balak niyang mag-retreat ng ilang araw at gugulin ang Linggo ng Pagkabuhay kasama ang kanyang pamilya na siyang ginagawa nila tuwing Semana Santa kada taon.

Samantala, nagtungo ang Pangulo sa Mariveles, Bataan upang pangunahan ang Bataan-Cavite Interlink Bridge (BCIB) Milestone Ceremony.

Nauna rito, nagtungo si Marcos sa Limay, Bataan para sa Kadiwa ng Pangulo, pamimigay ng government assistance at ang inagurasyon ng San Miguel Global Power Battery Energy Storage System (BESS).