Wala nang aktibong NPA guerilla fronts sa ‘Pinas — Marcos

ni Eli San Miguel - Trainee @News | January 13, 2024

Nagbigay ng papuri si Pangulong Ferdinand "Bongbong" Marcos sa isang video na ini-upload sa kanyang mga social media accounts ngayong Sabado, para sa mga tagapagtanggol ng batas dahil sa kanilang pagganap ng mga tungkulin upang labanan ang mga banta sa internal security.

Ayon sa Pangulo, hanggang Disyembre 2023, na-neutralize ng gobyerno ang 1,399 na miyembro ng mga komunista at lokal na teroristang grupo.

Iniulat din niya na hanggang sa nakaraang buwan, nakumpiska ng gobyerno ang 1,751 na armas sa pamamagitan ng pag-aresto at pagsuko.

Dahil dito, sinabi ni Pangulong Marcos na hindi titigil ang gobyerno sa kanilang kampanya laban sa rebelyon.

“Maaari na nating mai-report na wala nang active NPA guerilla front as of December 2023. Kaya patuloy nating ipaglalaban ito,” aniya.

“These commitments underscore our steadfast commitment to peace and stability,” dagdag niya.

Buwanang pagsusuri sa nationwide clean-up, ipinatutupad

ni Eli San Miguel - Trainee @News | January 9, 2024

Ipinahayag ni Pangulong Ferdinand “Bongbong” Marcos ang buwanang pagsusuri para sa mga barangay sa buong bansa bilang kaakibat ng pagpapatupad ng clean-up program, na nagbibigay-diin sa kanyang masusing pagmamatyag.

Sa isang video message ngayong Martes, sinabi ni Marcos na masusing susubaybayan at palalakasin niya ang positibong momentum ng 'Kalinisan sa Bagong Pilipinas' nationwide clean-up drive na nagmumula sa mga pagsisikap ng mga opisyal ng barangay at kabataan sa buong bansa.

"Ang kaayusan at kalinisan sa bawat barangay ay gagawin nating tuloy-tuloy; buwan-buwan na susukatin ang performance ng Barangay Council, at kikilalanin natin at pararangalan natin ang mga outstanding na performance,” ani Marcos.

“Higit sa lahat, ang kaayusan at kalinisan sa bawat barangay ay tututukan ng inyong Pangulo,” dagdag niya.

Binigyang-diin din ng Pangulo ang kahalagahan ng pagiging matiyaga sa mga pagsisikap ng 'bayanihan,' lalo na sa paglilinis ng kalsada, kanal, palengke, at paaralan tungo sa mas luntian, mas malusog, at mas ligtas na mga pamayanan sa buong bansa.

200k trabaho para sa mga Pinoy, nagbukas dahil kay P-BBM

ni Angela Fernando - Trainee @News | December 27, 2023

Nagpahayag ang Department of Trade and Industry (DTI) na inaalok sa mga Pinoy ang umaabot sa 200k na job opportunities dahil sa mga naging opisyal na biyahe ni Pangulong Ferdinand "Bongbong" Marcos Jr. mula sa huling quarter ng 2022 hanggang sa taon ng 2023.

Batay sa datos mula sa DTI, inilabas ng Presidential Communications Office na ang mga biyahe ni Marcos nu'ng 2022 ay nagdulot ng 7, 100 job opportunities mula sa Indonesia (Setyembre 4-6); hindi bababa sa 14, 932 job opportunities mula sa Singapore (Setyembre 6-7); at 98, 000 job opportunities mula sa New York (Setyembre 18-24).

Nagdala rin nu'ng nagdaang taon si Marcos ng 5,500 job opportunities mula sa kanyang pagbisita sa Thailand nu'ng Nobyembre 16-19; hindi bababa sa 6,480 job opportunities mula sa Belgium (Disyembre 11-14); at 730 job opportunities mula sa Netherlands (Disyembre 15-17).

Ang pagbisita ni Marcos sa China sa taong 2023 nu'ng Enero 3-5 ay nagbukas ng 32, 722 job opportunities; 24, 000 job opportunities mula sa Japan (Pebrero 8-12); 6, 386 job opportunities mula sa Washington, DC (Abril 30-Mayo 4); at 8, 365 job opportunities mula sa Malaysia (Hulyo 25-27).

Ang biyahe ni Marcos sa Singapore nu'ng Setyembre 14-17 ay nagresulta rin ng 450 job opportunities; 2, 550 job opportunities mula sa Estados Unidos (Nobyembre 14-17); at 15, 750 job opportunities mula sa Japan (Disyembre 15-18).