Huwag natin iwan sa ere ang mga empleyado ng OMB

ni Bong Revilla @Anak ng Teteng | Nov. 15, 2024

Hindi masama ang pagbabago, pero dapat walang maiiwan sa ere — dapat na unahin muna ang kapakanan ng mga empleyado ng Optical Media Board (OMB) na biglang mababago ang takbo ng buhay dahil lamang sa biglang pagre-resign ng dating namumuno.

Nadiskubre kasi sa budget hearing sa Senado noong nakaraang Lunes na walang lumalagda ngayon sa mga voucher para sa suweldo, benepisyo at iba pang dokumento ng mga empleyado ng OMB matapos magbitiw bilang OIC-CEO si James Ronald Macasero na naghain ng kandidatura para sa darating na eleksyon.

Dahil dito, nanganganib na walang sasahurin ang mga empleyado ng OMB ngayong Disyembre kung kailan nalalapit na ang pagdiriwang ng Pasko.

Bukod dito, may panukala na rin ang mga kasama kong senador na tuluyan nang buwagin ang OMB dahil wala na umanong function ang ahensya kung saan wala nang namimirata ng mga pelikula ngayong online streaming na ang uso.

Ang inyong lingkod ay dating chairman ng Videogram Regulatory Board na naging OMB, at ngayon at chairman ng Senate Committee on Civil Service, Government Reorganization and Professional Regulation, na nakikisimpatya sa mga kawani ng pamahalaan na maaaring mawalan ng trabaho sakaling matuloy ang panukalang pagbuwag sa OMB. 

Nakakaawa kasi ang sitwasyon ng mga empleyado ng OMB dahil sa pagkawala ng namumuno sa kanila na nagbibigay ng direksyon. Nandiyan din ang pangamba na tuluyan nang buwagin ang kanilang ahensya. Ang sa akin lang, kung talagang aabot man doon ay hindi dapat pabayaan ang mga empleyado. 

Dapat munang isaayos ang kalagayan ng mga empleyado bago pa man ituloy ang anumang uri ng pagbabago para masigurong nasa maayos na sitwasyon ang mga empleyado. Puwede silang bigyan ng training para mailipat sa ibang mga ahensya ng pamahalaan. Huwag lang natin sila iwan sa ere ng basta-basta.

Ramdam ko ang mga empleyado na mawawalan ng trabaho sakaling matuloy ang pagbuwag dito — lalo na ‘yung mga padre de pamilya at mga breadwinner na sila lamang ang inaasahan sa kanilang pamilya na ang tanging nalalaman lang naman ay manatiling tapat sa naturang ahensya.

Hindi magandang balita ito para sa kanila lalo pa’t ilang linggo na lamang ay Pasko na at nahaharap ang lahat sa mga gastusin.

Marahil, ilan sa mga empleyado na mawawalan ng trabaho ay kilala ko pa at naisaayos natin ang kanilang sitwasyon noong tayo pa ang namumuno sa OMB. Kaya masakit din sa akin kung aabot sa ganito ang kahihinatnan.

Napakarami ng accomplishments natin noong tayo pa ang namumuno sa OMB. Ilang matagumpay na pagsalakay ang dating isinagawa sa mga bentahan at gawaan ng piniratang pelikula na ipinagbibili sa pamamagitan ng DVD at VCD.

Ilang ulit nating pinasagasaan sa pison sa loob ng Camp Crame ang mga nakumpiska nating DVD at VCD upang masigurong hindi na babalik sa pamilihan ang mga nasamsam nating piniratang pelikula at kanta.

Dahil sa sunud-sunod na pagsalakay natin sa mga ito ay muling sumigla ang paggawa ng mga pelikula at napakalaki talaga ng naitulong ng OMB sa entertainment industry. Kasama natin sa pagtatrabaho ang mga empleyadong ngayon ay nanganganib na mawalan ng hanapbuhay.

‘Yung ilan sa kanila ay itinaya pa ang buhay para lamang sa mga isinagawa nating pagsalakay at dahil nga sa pagre-resign ng namumuno sa kanila ay bigla na lamang silang mapapariwara.

Sa kapasidad ko bilang senador ay hindi ako papayag na basta na lamang mauwi sa wala ang kanilang pagsisikap at sana ay makumbinsi ko ang mga kasamahan kong senador na unahin muna ang mga empleyado bago magdesisyon sa nais nilang pagbabago. Sana, maitawid ko ito!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Revilla, inalerto ang DPWH at LGUs sa paghahanda sa pagpasok ng Bagyong Pepito

by Info @Brand Zone | Nov. 15, 2024

Nalulungkot si Revilla dahil hindi pa man nakakabangon ang Northern Luzon ay isang bagyo na naman ang papasok kaya mahalaga na may pre-positioning na ng mga emergency at relief goods at umaasa na walang magiging matinding pinsala sa buhay at ari-arian.

Inalerto ni Senador Ramon Bong Revilla Jr. ang Department of Public Works and Highways (DPWH) at mga Local Government Units na tiyaking nakalatag na ang mga paghahanda pagpasok ng bagyong Pepito sa Sabado.

Ayon kay Revilla na chairman ng Senate Committee on Public Works, dapat paspasan ang clearing operations sa mga lugar na nagkaroon ng landslide at pagguho ng mga puno matapos hagupitin ng bagyong Ofel.

"Eto pa lang nga si Ofel, paparating naman agad itong si Pepito," Revilla said. "So we must spare no time in cleaning up after Ofel and bracing for Pepito, ayon pa sa Senador.

Sinabi ni Revilla na hindi inaalis ng PAGASA na maging super typhoon si Pepito kaya kailangang masiguro na ngayon pa lang malinis at maluwag na ang mga daluyan ng tubig at malinis ang lahat ng mga maaring maging debris.

Nalulungkot si Revilla dahil hindi pa man nakakabangon ang Northern Luzon ay isang bagyo na naman ang papasok kaya mahalaga na may pre-positioning na ng mga emergency at relief goods oras na kailanganin.

Umaasa ang Senador na walang magiging matinding pinsala sa buhay at ari-arian kung ang publiko ay nakahanda.

"We are hoping na wala masyadong pinsala. Preparations are in place," he said. "Pero dapat handa pa rin tayo for whatever that may come. Dapat safe on ground na lahat ng kailangan at mga tauhan, para anuman ang mangyari, agad natin itong matutugunan,” dagdag pa ng Mambabatas.

Lolo’t lola, magdoble-ingat para iwas-budol

ni Bong Revilla @Anak ng Teteng | Nov. 11, 2024

Habang abala tayo sa pagsisikap kung paano mapapagaan ang buhay ng ating mga senior citizen ay sumasabay naman ang mga masasamang-loob na ang biktima mismo ay ang ating mga lolo at lola kaya kailangan ng ibayong pag-iingat.

Kamakailan lang ay nasabat ang hindi bababa sa P5 milyong halaga ng pekeng gatas para sa mga senior citizen at diabetic sa isang bodega sa Cainta, Rizal kasunod ng reklamo ng isang brand.

Sinalakay ng mga tauhan ng National Bureau of Investigation Intellectual Property Rights Division (NBI-IPRD) ang bodega sa loob ng isang subdivision, ayon sa ulat.

Inabot ng mga operatiba ang mga pekeng produkto na naka-pack at handa nang i-deliver sa mga nag-order sa mga ito online sa mas mababang presyo.

Ayon sa NBI, dumulog sa kanilang tanggapan ang isang pagawaan ng espesyal na gatas at nagsumbong na may namemeke ng kanilang produkto.

Nang makumpirma ng NBI-IPRD, agad na ikinasa ang operasyon kung saan nasa 4,000 milk cans ang nakumpiska.

Sa pekeng produkto, nakadikit lamang sa lata ang sticker o label hindi tulad sa orihinal na produkto na nakaimprenta mismo sa lata.

Sasampahan ng reklamong trademark infringement at unfair competition ang kumpanya na nasa likod ng pamemeke sa produkto.

Naghain din ang NBI ng motion for destruction para sirain ang lahat ng pekeng milk products.

Kaya kailangan ng dobleng pag-iingat at tiyaking bumili lamang ng mga produkto mula sa lehitimong supermarkets o tindahan. 

Sayang ang mga benepisyong makukuha ng ating mga lolo at lola katulad ng cash gift para sa mga senior citizen na sasapit sa edad na 80, 85, 90, kung mapupunta lamang sa mga masasamang-loob na nagbebenta ng mga pekeng produkto at posible pang ikamatay ng ating mga senior citizen.

Kaya nga sinikap nating mabigyan ng mga karagdagang benepisyo ang mga senior citizen dahil sa marami sa kanila ang retirado na at wala ng hanapbuhay, kaya napakasakit malaman na sila pa ang puntirya ng mga masasamang-loob.

Sa darating na Enero ay puwede nang simulan ang pamamahagi ng karagdagang benepisyo para sa ating mga lolo at lola -- sisikapin kong ako mismo ang unang magbibigay sa sinumang matatapat ang edad sa 80, 85, 90 at 95 at pagkakalooban natin ng P10,000 dahil umiiral na itong batas na ito.

Kumbaga, ang matagal na paghihintay ng ating mga lolo at lola ay maiibsan na dahil popondohan na ito sa darating na Enero at tuwang-tuwa rin ako dahil ako mismo ang may-akda ng panukalang ito na ngayon ay isa nang ganap na batas.

Napakarami pa nating plano para sa ikagaganda at ikagagaan pa ng buhay ng ating mga senior citizen.

Kasama na ang kapakanan ng mga manggagawa, nurses, teacher at mga overseas Filipino worker (OFWs) na lahat ay araw-araw nating iniisip kung paano mabibigyan ng magandang buhay.

Lahat ng ikabubuti at ikagagaan ng buhay ng ating mga kababayan ay pinagsusumikapan natin sa Senado at napakarami pang nakabinbin na ipagpapatuloy naman natin sa mga darating na panahon.

Sa ngayon ay medyo naagaw lang ang aking pansin hinggil sa pagkakaaresto ng sindikatong nambibiktima ng mga senior citizen kaya mabilis tayong nagpapaalala dahil kahit nasakote na ang mga namumuno sa sindikatong ito ay tiyak na may nakakalat pa rin itong galamay na inaasahang mambibiktima sa panahon ng Kapaskuhan.

Anak ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com