Traslacion, hinangaan sa buong mundo

ni Bong Revilla @Anak ng Teteng | January 12, 2023

Wala talagang puwedeng kumuwestiyon sa ilalim ng pananampalataya ng ating mga kababayan kung Poong Nazareno ang pag-uusapan matapos maging banner story ang naganap na Traslacion 2024 sa lahat ng radyo, diyaryo at telebisyon sa buong mundo noong January 9.

Tinawag pa ngang milagro ng ibang bansa ang naganap na Traslacion dahil sa hindi kayang tularan ang pangyayaring ito na kung hindi umano nakadokumento ay hindi paniniwalaan.

Marami tayong mga kababayan sa abroad ang nagsipagtawagan para lamang ipaabot sa atin na ‘proud na proud’ sila sa pananampalataya ng ating mga kababayan na nagsidalo sa Traslacion dahil labis-labis umano ang paghanga ng mga taga-ibang bansa sa kaganapang ito.

Ito ay matapos na dumugin ng tinatayang nasa 6.5 milyon nating kababayan ang bumuhos at pumuno sa lahat ng kalye sa Quiapo, Maynila upang lumahok lamang sa Traslacion 2024 o prusisyon para sa pista ng Itim na Poong Nazareno noong nakaraang Martes.

Nauna nang sinabi ng mga otoridad na inaasahan nila ang pagdagsa ng mga deboto sa pagbabalik ng tradisyunal na prusisyon matapos itong matigil ng tatlong taon dahil sa kasagsagan ng pandemya ng COVID-19.

Hanggang alas-10:00 nang umaga kahapon, sinabi ng pamunuan ng Minor Basilica of the Black Nazarene o Quiapo Church na umabot na sa 6,532,501 deboto ang sumama sa prusisyon na nagsimula ganap na alas-8 ng umaga.

Bukod dito, sa datos ng Philippine National Police (PNP) nasa 60,500 deboto ang nagsimba sa Basilica na kilala rin bilang Parish of Saint John the Baptist sa pareho ring oras.

Sinabi ni Rev. Fr. Hans Magdurulang, spokesperson para sa Nazareno 2024, na maaaring mas mataas pa ang bilang ng mga nakiisa sa prusisyon dahil sa Quirino Grandstand pa lang ay 1.3 milyon na ang dumagsa simula ng Pahalik hanggang umalis dito ang 400-taong imahe ng Poon ng alas-4:45 ng madaling-araw para sa prusisyon pabalik sa simbahan.

Samantala, sinabi ni PNP spokesperson Police Colonel Jean Fajardo na payapa at walang anumang insidente ng karahasan ang prusisyon.

Sa isinagawang press briefing, iniulat ni Fajardo na nagtala ang Department of Health (DOH) ng 290 kaso ng mga minor injury, tulad ng pagkasugat, pagkahilo at inatake ng hika na agad namang nalapatan ng lunas.

Naging mabilis din umano ang daloy ng prusisyon dahil sa binagong disenyo ng andas.

Sa pahayag ni Fajardo, sinabihan nila ang mga deboto na hindi na kailangang sumampa, habang napabilis ang usad nito pero may mga kababayang nagpilit pa ring sumampa.

Kaugnay nito, mayroon pa rin umanong mga pasaway na nagbitbit ng mga matatalas na bagay na nakumpiska ng pulisya.

Mahigit sa 18,000 pulis, mga miyembro ng Armed Forces of the Philippines (AFP) at iba pang force multiplier ang ipinakalat sa paligid ng Quiapo dahilan para masakote ang mga lumabag sa panuntunang inilabas ng PNP.

Hindi rin nasunod ang paggamit ng face mask sa prusisyon bilang pag-iingat sa banta ng COVID. Dahil dito, nangangamba ang DOH ng posibleng pagsipa ng COVID-19 sa mga darating na araw lalo pa at marami na namang nahahawa sa naturang sakit.

Matatandaang naglabas ng pahayag mismong si Pangulong Ferdinand Bongbong Marcos Jr. (P-BBM) na nagpositibo ito sa COVID-19 dahil sa sumisirit din ang kaso ng ubo, sipon at lagnat sa maraming lugar sa Pilipinas. Kaya huwag masyadong kumpiyansa baka tayo ay matsambahan.

Anak ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

‘Pinas handa vs. HIV, mga positibo, ‘wag magdalawang-isip magpagamot

ni Bong Revilla @Anak ng Teteng | December 10, 2023

Nagpamalas ng kahandaan ang pamahalaan hinggil sa hindi na mapigilang pagtaas ng kaso ng human immunodeficiency virus (HIV) makaraang ianunsyo ng Philippine Charity Sweepstakes Office (PCSO) na nakahanda ang gobyerno laban sa lumalalang sitwasyon ng sakit na ito.

Hinimok ng PCSO ang mga Filipino HIV infected na huwag magdalawang-isip na lumapit sa ahensya ng gobyerno, kabilang na ang kagawaran upang makapagbigay ng kaukulang tulong sa mga ito.

Ang anunsyong ito ay nagsilbing kislap sa dilim na nagbigay liwanag sa marami nating kababayan na nagdurusa sa sakit na HIV at wala nang mapuntahan matapos ang pangambang dinanas nila sa tila hindi na maresolbang pagtaas ng kasong HIV sa bansa.

Ang pamahalaan ay gumagawa ng aktibong pamamaraan upang makasiguro na ang mga HIV infected na mga Pilipino ay nabibigyan ng kaukulang gamutan.

Ipinahayag pa ng PCSO na si Pangulong Ferdinand R. Marcos, Jr. at ang Department of Health (DOH) ay magkatuwang na nagtatrabaho para magkaroon ng maraming treatment hubs sa iba’t ibang lugar sa bansa sa gitna ng pagtaas ng HIV cases.

Kamakailan lang, inanunsyo ng DOH na nakapagtayo ang ahensya ng dalawang HIV treatment hubs sa Cordillera Administrative Region (CAR).

Base sa ulat ng DOH, mayroong 50 bagong HIV cases na naitatala sa bansa araw-araw, na lubhang tumaas kumpara sa 22 daily cases noong taong 2022.

Lubhang nakaaalarma ang ganitong ratio ng pagtaas ng HIV at kinakailangang mapagtuunan ng pansin ng ating pamahalaan.

Ang PCSO ay nagbibigay ng tulong para sa gamutan sa pamamagitan ng kanilang Medical Access Program.

Kung susuriin, mahal talaga ang gamutan sa sakit na HIV kaya’t ipinapaalala natin sa ating mga kababayan na ang PCSO ay nagbibigay din ng tulong pinansyal para sa mga HIV patients.

Hinihimok natin ang mga HIV-positive Pinoy na humingi ng tulong sa mga kinauukulang ahensya upang matugunan at mabigyang liwanag na mayroon pa ring halaga ang kanilang buhay sa kabila ng kanilang kinakaharap na sakit.

Ani nga ng mga eksperto, “People living with HIV (PLHIV) could still have a good life,” at hindi ito isang death sentence na nararanasan katulad noong mga nakalipas na wala pang iginagawad na treatment, kumpara ngayon na sa maagap na diagnosis at treatment, magkakaroon pa rin sila ng maayos na buhay.

Positibong pananaw at pagharap sa katotohanan para agad na maresolba at masimulan ang gamutan. Ang paghingi ng tulong sa pamilya, kaibigan, katrabaho ay isang positibong hakbang.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Maayos at maunlad na Pilipinas sa 2024

ni Bong Revilla @Anak ng Teteng | December 29, 2023

Ito na ang huling artikulong isusulat natin para sa taong ito at sa susunod na taon na tayo muling magkakasama-sama at sa lahat ng ating mga tagasubaybay, nawa ay magkaroon kayo ng masaganang Bagong Taon.

Sana ay magtuluy-tuloy ang mga biyayang pumapasok sa ating bansa bunga ng labis na pagpupunyagi ng kasalukuyang pamahalaan na hindi tumitigil upang mabigyan ng magandang kinabukasan ang ating mga kababayan.

Dapat nating bigyang-pugay ang kasalukuyang administrasyon hinggil sa maayos at maunlad na pagsalubong sa 2024 dahil sa pagsisikap nitong makapag-angkat ng trabaho at karagdagang hanapbuhay sa nagdaang buong taon.

Nais ko lang ibahagi ang katuwaan nating ito kasunod ng survey na inilabas ng Pulse Asia na mas marami sa ating mga kababayan ang umaasa na magiging mas maayos at maunlad pa ang ating bansa sa pagpasok ng taong 2024.

Base sa statistics, 92% ng ating populasyon ang nananatiling positibo na kayang-kaya nating harapin ang panibagong taon ng may nakikitang pag-asa at ang pagiging optimistiko ng ating mga kababayan ay isang magandang basehan upang lalong magsumikap ang pamahalaan.

Mataas ang kumpiyansa ng bawat Pilipino na magiging maganda ang pasok ng taon dahil sa pagsusumikap ng ating Pangulong Ferdinand Bongbong Marcos, Jr.(P-BBM) na paigtingin pa ang pagdami ng mga trabaho rito sa ating bansa sa pamamagitan ng pag-secure ng mga oportunidad galing sa ibang bansa.

Nabatid na hindi lamang bilyong pisong halaga ng investment pledges ang naiuwi ni P-BBM kundi mahigit sa 200,000 job opportunities para sa ating mga kababayan sa kanyang opisyal na foreign trips mula sa huling quarter ng 2022 hanggang 2023.

Ayon sa Department of Trade and Industry (DTI) ang mga biyahe ni P-BBM noong nakaraang taon ay lumikha ng 7,100 job opportunities mula Indonesia noong Setyembre 4-6; 14,932 naman mula sa Singapore noong Setyembre 6-7; at 98,000 mula New York noong Setyembre 18-24.

Nag-uwi rin si P-BBM ng 5,500 job opportunities mula sa pagbisita nito sa Thailand noong Nobyembre 16-17; 6,480 trabaho naman mula sa Belgium noong Disyembre 11-14; at 730 trabaho mula sa Netherlands noong nakaraang Disyembre 15-17 na bahagi ng department investment mission.

Para sa taong 2023, binisita rin ni P-BBM ang China noong nakaraang Enero 3-5 na nagresulta sa 32,722 trabaho; 24,000 job opportunities din ang naiuwi mula sa Japan nitong nagdaang Pebrero 8-12; 6,386 naman mula sa Washington, DC noong Abril 30 hanggang Mayo 4; at 8,365 trabaho pa mula Malaysia noong Hulyo 25-27.  

Nagbitbit din si P-BBM ng 450 karagdagang trabaho nang bumisita ito sa Singapore noong Setyembre 14-17; dagdag 2,550 trabaho pa mula naman sa pagbisita nito sa U.S.

noong Nobyembre 14-17; at 15,750 ang nakuha sa Japan noong Disyembre 15-18.

Ayon kay Presidential Adviser on Investment and Economic Affairs Frederick Go, ang sinasabing PhP169 bilyong halaga ng investment pledges sa isinagawang pagbisita ni P-BBM sa Japan ay naisakatuparan na at naipagkaloob na sa ating mga kababayan ang libu-libong trabaho.

Kumbaga, hindi lang basta pangako ang nakalap ni P-BBM dahil sa pinakikinabangan na ito sa kasalukuyan ng marami sa ating mga kababayan at inaasahang madaragdagan pa ang mga oportunidad na ito sa mga darating na panahon.

Nasa tamang direksyon ang tinatahak nating landas tungo sa maayos at maunlad na bansa dahil sa walang humpay na pagsisikap ng ating pamahalaan para mag-angkat ng karagdagang negosyo at trabaho na kailangang-kailangan ng ating bansa.

Sana lang ay magtuluy-tuloy pa ang mga ganitong hakbangin at mas dumami pa ang mga pumapasok na investment at trabahong mabubuksan para sa ating mga kababayan na napakagandang simula nang pagpasok ng panibagong taon.

Malaking bagay na mapababa ng pamahalaan ang unemployment rate sa bansa at dahil sa ipinakikitang pag-asa ng ating mga kababayan ay hindi malayong mas maayos at maunlad na Pilipinas pa ang ating mararating.

Sa lahat ng ating mga kababayan na buung-buo ang pag-asa na tuluyan na tayong makaaahon sa kahirapan ay kaisa ninyo ang inyong lingkod sa pagsalubong sa Bagong Taon.

Gawin nating ligtas at masaya ang pagpasok ng taong 2024 at nawa ay katigan tayo ng Maykapal ng isang masaganang ‘Pinas. Happy New Year!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com