Panata sa Our Lady of Peñafrancia

ni Bong Revilla @Anak ng Teteng | Sep. 25, 2024

Hindi mahulugang karayom ang tinatayang nasa 1.5 milyong deboto na dumalo sa naganap na Peñafrancia Festival noong nakaraang Setyembre 2. Naroon kasi tayo para sa taun-taon nating panata sa isinagawang traslasyon na bahagi ng pagdiriwang sa kapistahan ng Naga City.

Sa kabila ng ating iniindang injury sa Achilles tendon, mapalad tayong muli ay nabigyan ng pagkakataong madalaw at mahawakan ang Our Lady of Peñafrancia. Mula’t sapul nga bago pa man tayo pumalaot sa paglilingkod-bayan ay kinalakhan kong maging deboto sa Mahal na Ina dahil sa aking nanay.

Ang siyam na araw na novena ay sinimulan noong Setyembre 13, 2024 at nagtapos noong Setyembre 21 kung saan tayo dumalo, kasabay ng paggunita sa ika-100 taon ng canonical coronation ng imahe ng Nuestra Señora de Peñafrancia.

Ang tema ng naturang pagdiriwang ay tinawag na ‘Se Siempre La Reina, Pamanang Banal: Atamanon: Padanayon: Palakupon’ o ang ‘Be Always the Queen, Nourish, Preserve and Share our divine inheritance’.

Mula Manila ay dumating kami ng Naga City bandang alas-8 ng umaga, dito ay sinalubong kami ni Naga Mayor Nelson Legacion at Pili Mayor Thomas Bangalonta Jr. at agad kaming sinamahan sa Naga Cathedral at nakipagkita kami kay Monsignor Zosimo Ma. Sañado bago nagsimula ang dinaluhan naming misa. 

Ganap na alas-10:45 ng umaga ay binisita naman namin ang City College of Naga at naging mainit ang pagtanggap sa atin ng mga estudyante at mga guro na hindi magkamayaw sa pagyakap sa atin at halos lahat ay nais magpakuha ng litrato na atin namang pinagbigyan.

Kasunod nito ay pinaunlakan naman natin ang mga nagsidalong media na nais tayong kapanayamin sa naturang selebrasyon.

Walang halong pulitika ang pagbisita natin sa Naga dahil bahagi lang talaga ito ng ating debosyon sa Nuestra Señora de Peñafrancia. Sa taun-taon nating pamamanata ay naging matalik nga nating kaibigan ang nasirang mayor ng Naga na si dati ring DILG Secretary Jesse Robredo, na taun-taon din tayong pinatutuloy sa kanilang tahanan para mananghalian. 

Kaya’t sa pagpapatuloy ng ating nakasanayan, bandang alas-12 ng tanghali ay tumuloy tayo at pinaunlakan ang inihandang tanghalian ni dating Bise Presidente Leni Robredo sa kanilang tahanan.

Makaraan ang tanghalian, tumuloy tayo sa iba pang mga pagpupulong, at meeting ng iba nating mga kaibigan at supporter sa Bicol hanggang sa tayo’y lumisan pabalik ng Maynila na punung-puno ng pag-asa dahil naisakatuparan ang ating panata na nakatakda nating ulitin next year.

Hinding-hindi ko matatalikuran ang Our Lady of Peñafrancia na palaging kong tinatakbuhan sa panahon ng aking mga pagsubok sa buhay na ilang ulit ko nang napatunayan na hindi niya ako pinababayaan, gayundin na pasalamatan sa kanyang mga biyaya.

Nakayanan ko ang isa sa pinakamabigat na pagsubok sa aking buhay nang sampahan ako ng imbentong kaso at pansamantala akong napiit sa PNP Custodial sa Camp Crame sa loob ng mahigit apat na taon.

Wala akong kasama sa loob ng piitan kundi ang imahe ng Our Lady of Peñafrancia. At hindi ako nagkamali dahil makaraan ang mahigit apat na taon ay napawalang sala ako ng Sandiganbayan dahil napatunayang hindi totoo ang mga bintang sa akin.

Bukod sa dininig ang aking panalangin ay tinulungan niya akong makayanan ang aking sitwasyon sa piitan hanggang sa ako ay makalaya at muli ay nahalal akong senador -- patunay na walang naniwala sa ibinintang sa akin.

Kaya heto at buong puso kong tinutupad ang aking panata bilang pasasalamat sa himalang ginawa niya sa aking buhay.

Nais ko ring pasalamatan si Mayor Legacion na hindi tayo iniwan sa buong panahon ng pananatili natin sa Naga City para dumalo sa paggunita sa Our Lady of Peñafrancia. 

Maraming salamat sa lahat ng mga taga-Naga. Magkita-kita uli tayo sa susunod na taon at sa marami pang mga taon dahil tulad ninyo ay sa kanya rin ako humuhugot ng lakas sa buhay. Kaya happy fiesta uli sa Naga City — ang puso ng buong Bicolandia.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Publiko, huwag magpadala sa mga black propaganda

ni Bong Revilla @Anak ng Teteng | Sep. 23, 2024

Nakakatuwang malaman na ang nangungunang political party na Lakas-Christian Muslim Democrats (Lakas-CMD) ay isinama ang inyong lingkod sa listahan ng mga opisyal na kakandidatong senador sa 2025 midterm elections.

Sa isang resolusyon na kinandili ng national convention ng partido na isinagawa sa Malacañang, ang inyong lingkod ay nominado bilang nag-iisang kandidato ng Lakas-CMD na kanilang isasabak sa Mataas na Kapulungan ng Kongreso.

Bilang chairperson ng partido ay tinanggap natin ang endorsement at agad nating pinasalamatan si Lakas-CMD President House Speaker Ferdinand Martin Romualdez at ang buong partido dahil sa muling pagtitiwala sa atin.

Hangad ko na patuloy kaming magtutulungan para sa mas maliwanag na kinabukasan ng ating bayan. Ang tiwala na muling ibinigay nila sa akin ay isang responsibilidad na buong puso kong tatanggapin at dadalhin.

Sa ilalim ng liderato ni Speaker Martin, ang aming partido ay mas lalong naging buo at narating namin ang mataas na lebel ng pagkakaisa. Dahil sa kanya, ang aming pananagutan sa aming misyon bilang isang partido ay mas lalong tumibay at lumakas.

Siya ang naging dahilan kung bakit ang Lakas-CMD ang nangungunang partido sa bansa — at dahil diyan ay masasabi kong nasa mabuti akong kamay.

Alam naman ng lahat na simula ng ako ay pumasok sa pulitika — simula pa noong bise gobernador pa lamang ako ng Cavite ay nasa Lakas-CMD na ako — nasa 30 taon na akong miyembro nito.

Mula sa aking unang hakbang sa paglilingkod, ang ating partido ang nagbigay sa akin ng lakas at inspirasyon upang tumindig at magserbisyo. Hindi ko iniwan ang ating samahan, kahit sa mga panahong hindi maginhawa at puno ng pagsubok. Sa bawat laban, sa bawat pagkakataon, I remained steadfast – because I am a loyal soldier of the party, but more importantly, I am a loyal servant of the people. 

Ang Lakas-CMD ay isa sa major political parties na kaalyansa ni Pangulong Ferdinand R. Marcos sa kanyang Partido Federal ng Pilipinas, bilang paghahanda sa susunod na eleksyon.

Napakabilis ng panahon, kamakailan lamang ay kumakandidato tayo, at papalapit na naman ang eleksyon, at ngayon ay hangad natin ang ikaapat na termino sa Senado -- hindi naman tayo nagbutas lang ng upuan sa Senado.

Katunayan ay napakarami nating panukala na naging ganap na batas tulad ng ‘Kabalikat sa Pagtuturo Act’ (RA 11997), ‘Expanded Centenarians Act’ (RA 11982), ‘No Permit, No Exam Prohibition Act’ (RA 11984), ‘Free College Entrance Examinations Act’ (RA 12006), and ‘Permanent Validity of the Certificates of Live Birthday, Death, and Marriage Act’ (RA 11909). 

Napakarami pa nating nakabinbing panukala na hanggang ngayon ay ipinaglalaban natin sa Senado at ayokong amagin na lamang ang lahat ng kapaki-pakinabang kong panukala kung hindi na ako tatakbo sa darating na eleksyon — nakapanghihinayang.

Lalo pa at puro sa kapakanan ng mga overseas Filipino workers (OFWs), mga manggagawa at mga teacher ang kasalukuyan nating tinatrabaho na masasayang kung hindi ako magpapatuloy sa Senado.

Huwag na ring malungkot ang ating mga tagasuporta dahil hindi ko kayo basta iiwan sa ere —ako pa rin ang inyong lingkod-bayan na palaging bibisita sa inyong mga lugar sa oras ng pangangailangan lalo na sa mga sinalanta ng kalamidad, hindi ko kayo matitiis.

Napakarami rin ng umaasa sa atin dahil sa panunungkulan natin sa Senado at hindi ko ito tatalikuran dahil lamang sa ibang plano sa buhay. Inihatid ninyo ako sa Senado kaya hinding-hindi ko kayo tatalikdan.

Sama-sama pa rin nating itatawid ang paparating na eleksyon upang manatili ang ating samahan at mas marami pang batas ang ating maisulong na lahat ay para sa kapakanan ng ating mga kababayan.

Kung paano ako nananatili sa aking partido simula noon hanggang ngayon ay ganyan din ako naninindigan sa aking mga tagasuporta at mga umaasa akin -- kaya hanggang sa dulo ay hindi ko kayo ipagpapalit sa ano pa man dahil kayo ang aking prayoridad.

Ngayon, buong puso kong inaanunsiyo sa inyong lahat na kasama ako sa opisyal na listahan ng Lakas-CMD na pambato bilang senador. Pagkatapos ng filing ng candidacy sa susunod na buwan ay simula na ng kampanya kaya siyempre excited na ang lahat.

Ipagpaumanhin ninyo dahil tiyak na darami na naman ang mga mukha ng kandidato sa iba’t ibang lugar dahil sa mga poster at tarpaulin. Magiging maingay din dahil sa mga campaign jingle ng mga kandidato, pero saglit lang naman ito para makapamili kayo ng inyong iboboto.

Mag-ingat lang sa mga fake news dahil tiyak na may mga masasamang loob na magpapakalat niyan para pagkakitaan at guluhin ang isip ng mga botante!

Huwag magpadala sa mga black propaganda. Tiyak na maglalabasan ang iba’t ibang klase nito --nakakalungkot nga at nagiging kultura na natin ang ganitong klase ng pangangampanya na sobrang dumi na minsan!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Salamat sa pagmamahal at pagtanggap ng mga taga-QC

ni Bong Revilla @Anak ng Teteng | Sep. 20, 2024

Naging matagumpay ang isinagawa nating bloodletting na tinawag nating ‘Dugong Alay, Pandugtong Buhay’ na ginanap sa Amoranto Sport Complex at dinaluhan ng maraming taga-Quezon City kabilang na si Mayor Joy Belmonte at ng kanilang mga lokal na opisyales.

Taun-taon nating pinangungunahan ang paghahandog ng dugo bilang bahagi ng ating kaarawan tuwing ika-25 ng Setyembre upang makaipon ng maraming dugo at tuloy ay makatulong sa mga kababayan nating nangangailangan nito sa oras ng kagipitan.

Tulad ng dati ay nakipagtulungan  ang Chinese General Hospital and Medical Center at Lung Center of the Philippines na silang nanguna sa pagkuha ng dugo sa mga donor.

Nais din nating pasalamatan ang mga regular na nagbigay ng dugo gaya ng mga grupong Alpha Phi Omega, Agimat Riders, AFP, Phil. Marines,  Phil. Navy, Phil. Air Force, BFP, BJMP at PNP.

Ilang ulit na nating napatunayan na malaking tulong ang may ipon tayong dugo dahil sa maraming pagkakataon ay naisasalba natin sa tiyak na kamatayan ang ating mga kababayan na walang makuhang dugo.

Naging panata ko na taun-taon na bahagi ng aking kaarawan ang magsagawa ng bloodletting dahil naranasan ko ang kahalagahan nito lalo pa’t palagi tayong nakadalo sa pangangailangan ng marami nating kababayan.

Noong isang araw, bago naganap ang bloodletting ay binisita rin natin ang mga kababayan natin sa Brgy. Batasan Hills sa Quezon City upang alalayan naman sila at doon ay namahagi tayo ng cash assistance sa pamamagitan ng Assistance for Individual in Crisis Situation (AICS) kung saan tumanggap ng tig-P2,000 ang bawat dumalo.

Bago kami nagtungo sa Amoranto Sports Complex ay namahagi rin kami ng ayuda at nakakataba ng puso dahil mismong si Mayor Joy ay naroon din sa ating pagdiriwang.

Nagbigay tayo ng maikling pananalita at ramdam na ramdam natin ang mainit na pagtanggap ng mga taga-QC. Nais ko ring pasalamatan si Mayor Belmonte nang isigaw niya sa mikropono ang katagang, “Pangako, number one ka (Sen. Bong) sa amin sa Quezon City,” kasunod ng napakahabang palakpakan.

Kaya labis ang aking pasasalamat sa butihing mayor ng QC, habang may ngiti akong natulog dahil sa binitawan niyang salita. 

Kahapon naman, alas-6:15 ng umaga ay lumipad kami patungo sa Tacloban, Southern Leyte, Borongan at Calbayog.

Ganap na alas-7:30 ng umaga ay lumapag kami sa Tacloban City airport at alas-8:00 ng umaga ay nasa People’s Center sa Tacloban City at kasama na si Mayor Alfred Romualdez at namahagi  ng P4M cash assistance sa pamamagitan din ng AICS kung saan tumanggap ng tig-P2,000 bawat residente na dumalo.

Bandang alas-9:30 ng umaga ay nagtungo naman tayo sa Provincial Capitol Gymnasium sa Southern Leyte, Maasin City at doon ay nakasama natin sina Gov. Damian Mercado, Cong. Roger Mercado & Mayor Nino Mercado at namahagi tayo ng panibagong P4M cash assistance at nabahaginan din ng tig-P2,000 bawat residenteng dumalo.

Alas-10:30 ng umaga ay dumiretso kami sa Borongan airport at bumiyahe patungong Eastern Samar, Borongan at doon ay inalalayan kami ni Gov. Ben Evardone, at sa ikatlong pagkakataon ay namahagi kami ng panibagong P4M at nakatanggap din ng tig-P2,000 bawat isa.

Alas-12 ng tanghali ay saglit kaming kumain sa conference hall ng Provincial Capitol ng Borongan City kasama pa rin si Gov. Evardone.

Mga ala-1 ng hapon habang nagpapababa kami ng kinain ay dumalo kami sa groundbreaking ng Medical Arts Bldg. sa Eastern Samar Provincial Hospital kung saan sisimulan na ang proyekto nating ospital.

Ala-1:30 ng hapon ay bumiyahe kami at halos kalahating oras lamang ay nasa Western Samar, Calbayog City at nakasama namin doon si Gov. Sharee Ann Tan.

Mahigit sa 2,000 katao ang inabutan naming naghihintay sa Calbayog Sports Center at muli ay namahagi tayo ng karagdagang P4M sa pamamagitan ng AICS at lahat ay nabigyan natin. 

Lumipad kami pabalik ng Manila at alas-5 ng hapon ay nakauwi na ako sa bahay.

Mahaba pa ang selebrasyon ng aking kaarawan ngunit mas masaya ako na kapiling ko ang ating mga kababayan at kahit paano ay nabigyan natin sila ng pantawid-alalay na ang kanilang mga ngiti at yakap ay malaking ambag sa mga regalong ibinigay sa akin sa mga panahong ito.

Napakarami pa nating lugar na bibisitahin at karaniwang inaanunsiyo ko naman sa pitak kong ito kung saan at kailan kami pupunta. Tumutok lamang para hindi kayo mawala, baka kasi nasa lugar niyo na ako pero hindi niyo pa alam. 

Sa personal kong pagdiriwang sa Setyembre 25 na mismong aking birthday ay wala naman akong malaking selebrasyon, maliban sa pagsasama-sama lang ng buong pamilya at ng aking staff habang balik-trabaho sa pagseserbisyo-publiko.

Pinasasalamatan ko rin siyempre ang mga gobernador, bise gobernadora, mayor at iba pang lokal na opisyal na umalalay sa ating mga pinuntahang lugar. Maraming salamat sa inyo.

Special mention ko lang si Mayor Belmonte dahil ipinaramdam niya sa akin na number one ako sa Quezon City. Hinding-hindi ko makakalimutan ang napakainit na pagtanggap ng mga taga-QC, grabe!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com