Pagbibigay tulong, walang pinipiling lugar at panahon

ni Bong Revilla @Anak ng Teteng | Oct. 18, 2024

Noong Oktubre 16, 2024, halos hindi kami nakausad nang magtungo kami sa lalawigan ng Negros Occidental dahil sa libu-libong residenteng sumalubong sa amin na lahat ay hindi magkamayaw sa pagyakap, paghalik at pagpapakuha ng litrato.

Tumagal ng halos ilang minuto bago namin narating ang entablado, kailangan naming makaakyat sa entablado dahil doon ako magsasalita bago tayo mamahagi ng tulong.

Malaking tulong naman ang ginawang pagsalubong sa amin nina Governor Bong Lacson, E.B. Magalona Mayor Marvin Malacon, Bacolod City Mayor Albee Benitez, kasama na si Abang Lingkod Partylist Rep. Joseph Stephen Paduano, dahil napabilis ang aming pag-usad at natuloy din ang pakikipagpulong ko sa kanila.

Inalam natin kung ano ang mga pangunahing pangangailangan ng buong probinsya na dapat mabigyan ng agarang aksyon.

Nakakataba ng puso ang mainit na pagsalubong ng mga tao at ramdam ko ang kanilang kasiyahan sa aking pagbisita.

Gayundin, dumalaw tayo sa Negros Occidental upang kumustahin at alamin kung ano ang dapat na unahing proyekto at programa, kasabay ng patuloy nating pagsusumikap na magawaran ng tamang suporta at serbisyo ang ating mga kababayan.

Hindi tayo puro pangako o salita lang, ginagawa natin ang lahat ng ating makakaya upang maihatid ang mga proyektong tunay na may pakinabang sa bawat Pilipino.

Kaya nga umabot sa halos dalawang libong panukalang batas ang ating naisumite at mahigit sa 300 na ang naisabatas at pinakikinabangan ng ating mga kababayan, at marami pa ang mga nakabinbin -- patunay na nais nating ibalik ang tamang serbisyo sa mga kababayan na nagtiwala sa atin para maluklok tayo sa Senado.

Sayang nga lamang at malapit na ang halalan — ayoko sanang makulayan na kaya lamang natin ginagawa ang pagtulong dahil may iba tayong motibo.

Sabagay, mula pa noon hanggang ngayon -- mula nang ako ay maging senador ay regular na tayong naglilibot at bumibisita sa iba’t ibang bahagi ng bansa para magbigay ng tulong -- biktima man ng kalamidad o hindi dahil regular din tayong nagtutungo sa mga lugar na hindi tinamaan ng kalamidad.

May mga staff ako na bumuo ng Bayanihan Relief (BR) Team na walang ginagawa araw at gabi kung hindi ang magbasta ng mga ipamamahagi sa mga lugar na biktima ng kalamidad. Kahon-kahong food packs bukod pa sa cash assistance ang ating inihahanda sa panahong walang kalamidad at kung sakaling dumating ang trahedya ay agad-agad na makapagdadala ng tulong at hindi ‘yung maghahagilap pa ng ipamimigay.

Ngayong malapit na ang midterm elections ay napakahirap nang kumilos, ngunit hindi naman ito hadlang para basta na lamang itigil ang pamamahagi sa mga nangangailangan. Kaya tuluy-tuloy lang tayo kahit ano pa ang kanilang isipin dahil malinis ang ating hangarin.

Sa ating mga kababayan, maaari kayong makipag-ugnayan sa mga lokal na pamahalaang nakakasakop sa inyo upang matiyak kung kailan ako nakatakdang dumalaw sa inyong lahat. 

Wala tayong pinipiling lugar basta nangangailangan ng tulong ay darating ang inyong lingkod bumabaha man o bumabagyo. 

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Tulong sa mga kasamahan sa radyo, telebisyon at pelikula, natupad din

ni Bong Revilla @Anak ng Teteng | Oct. 15, 2024

Pinangunahan natin noong nakaraang Linggo, Okt. 13, 2024, ang pagdaraos ng Bagong Pilipinas Serbisyo Fair (BPSF): Paglinang sa Industriya ng Paglikha sa Philippine Sports Arena sa Pasig City kung saan mahigit sa 13,000 na mga manggagawa sa industriya ng radyo, telebisyon, at pelikula ang direkta nating nabigyan ng tulong mula sa pamahalaan.

Ang BPSF ay ang pinakamalaking convergence caravan sa bansa kung saan lagpas 60 mga ahensya ng pamahalaan ang nagsasama-sama upang makapaghatid ng lagpas 400 programa at serbisyo ng gobyerno.

Natutuwa ako na magkakasama kami sa makasaysayang programa na ito hatid ng ating mahal na Pangulong Ferdinand Bongbong Marcos at ni Speaker Martin Romualdez, kung saan hindi na ang taumbayan ang kailangang kumatok sa gobyerno dahil ang gobyerno na mismo ang lumalapit sa tao. At sa aking ngang pagsama sa BPSF sa pag-ikot nito sa buong Pilipinas, sa bawat lugar na puntahan namin, kitang-kita ang tuwa, saya, at ligaya ng ating mga mamamayan.

Mas ikinagagalak ko lang lalo dahil ang mga kaharap ko ngayon ay ang mga taong malapit na malapit sa puso ko — ang mga kasamahan kong manggagawa sa industriya ng radyo, telebisyon, at pelikula.

Ako mismo ang nanguna sa pagbubukas ng BPSF na ako rin ang nagbigay ng pangunahing talumpati, kung saan binigyan natin ng pagkilala ang iba pa nating kasamahan sa naturang okasyon katulad nina Pasig City Mayor Vico Sotto, at si Cong. Roman Romulo na nakatuwang natin sa pagpasa ng Kabalikat sa Pagtuturo (KaP) Act.

Binigyang-pugay din natin ang mga kinatawan ng Film Development Council of the Philippines (FDCP) na si Dir. Jose Javier Reyes at ng MOWELFUND Film Institute na si Ms. Boots Anson Roa-Rodrigo.

Sa kauna-unahang pagkakataon ay ngayon lamang nakaranas ng ganito ang industriya. Tinipon natin ang mahigit 13,000 kasamahan natin sa industriya para matulungan ng BPSF at ng pamahalaan. Sa kauna-unahang pagkakataon, ang mga creatives, writers, crew, stuntmen, cameramen, mga announcer, at iba pang mga manggagawa, makakatanggap ng direktang suporta mula sa gobyerno. 

Alam naman ng marami nating kababayan na sa industriyang ito ako nagmula bilang isang artista bago pa man ako pumalaot sa larangan ng paglilingkod-bayan.

Lagi ko ngang sinasabi, hindi ako magiging si Senador Ramon “Bong” Revilla, Jr. kung hindi dahil sa industriya ng pelikula, telebisyon, at radyo na kumupkop sa‘kin at naghubog upang ako ay maging artista, na naging daan para ako ay makilala at pagkatiwalaan ng sambayanan upang paglingkuran sila.

Kahit kailan ay hindi ko ikakaila – parte ako ng industriyang ito, at kahit kailanman ay hindi ko pababayaan ang sektor na aking pinagmulan.

Kaya ibang kasiyahan ang aking nararamdaman na ang mga kapatid ko naman sa industriya ang aking nabigyan ng pagkakataong tumanggap ng tulong katuwang ang BPSF.

Matagal ko nang iniisip kung paano matutulungan ang mga kasamahan ko sa industriya ng showbiz at nagpapasalamat ako kay PBBM dahil nagkaroon na ito ng katuparan.

Isa sa nakakaligtaang sektor ang showbiz industry at hindi alam ng marami na napakaraming manggagawa sa likod ng kamera ang nangangailangan din ng tulong at suporta.

Sana lang hindi ito ang una at huli, at sisikapin nating muling maulit ang pamamahaging ito ng tulong sa mga manggagawa sa industriya, maging sa telebisyon man o pelikula.

Lalo pa at alam naman nating halos ngayon lang uli nagkaroon ng trabaho ang ilan sa kanila dahil sa nagdaang pandemya.

Kaya napapanahon talaga ang ayudang ito na marahil ay iniisip ng ilang kasamahan natin sa showbiz na nalimutan natin sila, hindi dahil araw at gabi ay palagi ko kayong naaalala. 

Salamat sa langit at nagkaroon na ito ng katuparan.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Tuloy ang paghahatid ng tulong sa mga kababayan sa Mindanao

ni Bong Revilla @Anak ng Teteng | Oct. 11, 2024

Tuluy-tuloy ang ginawa nating pamamahagi sa mga kababayan sa Mindanao nang magbalik tayo noong nagdaang Huwebes (Oktubre 9) upang manguna ulit sa pagbibigay ng cash assistance sa libu-libong benepisyaryo sa mga lalawigan ng Lanao del Sur, Misamis Oriental, at Bukidnon.

Ito na ang ikatlong pagkakataon na nagtungo ang inyong lingkod sa Mindanao sa loob lamang ng lagpas isang linggo. Noong Setyembre 30 ay nagpunta na tayo sa mga lalawigan ng Maguindanao del Norte, Maguindanao del Sur, at Sultan Kudarat kung saan pinangunahan rin natin ang pamamahagi ng financial assistance sa halos 10,000 na mga benepisyaryo. At nito lamang Oktubre 3 ay nagtungo naman tayo sa Davao Region upang mag-abot ng kaparehong ayuda sa mahigit 6,000 na mga kababayan.

Nang lumapag tayo sa Laguindingan airport ay agad tayong nagpunta sa Wao, Lanao del Sur kung saan namahagi rin tayo ng ayuda sa halos 2,000 na mga benepisyaryo -- sa pamamagitan ng Assistance to Individual in Crisis Situations (AICS) ng Department of Social Welfare and Development (DSWD) ay pinangunahan natin ang pagbibigay ng cash assistance kasama sina Lanao del Sur Gov. Mamintal Adiong Jr. at Cong. Zia Adiong.

Pagkaraan nito ay nagtungo naman tayo sa lalawigan ng Misamis Oriental kung saan ay sinalubong tayo nina Gov. Peter Unabia at Cong. Christian Unabia para ipagpatuloy ang pagbibigay ng ayuda sa kanilang mga kababayan. Mahigit sa 1,600 ang nabiyayaan ng ayuda na nagkakahalaga ng tig-P3,000 bawat residente.

Bandang hapon naman ay nagpunta tayo sa Bukidnon, at doon ay kasama natin sina Gov. Rogelio Roque at Cong. Laarni Roque, upang muling mamigay ng ayuda sa kanyang mga kababayan doon na may kabuuang halaga na P4 milyon para sa nasabing lalawigan.

Dire-diretso lang tayo sa pagtulong dito sa ating mga kababayan sa Mindanao at talagang sobrang lapit sa puso ko ang lugar na ito. Kaya asahan niyo na hindi rito matatapos ang ating paghahatid ng tulong at malasakit sa ating mga kababayan.

Gaya nga ng lagi kong sinasabi, binibigay lang natin sa ating mga kababayan ang mga dapat naman talaga nilang natatanggap mula sa gobyerno. Nawa ay makatulong ito sa inyong mga pang-araw-araw na pangangailangan hanggang sa tuluyang umunlad ang inyong mga buhay.

Nakakalungkot lamang dahil sa papalapit na ang halalan at marami na ang gumagalaw na pulitiko kahit malayo pa ang kampanya kaya hindi malayong isipin ng iba na pulitika lamang ang lahat sa kabila ng napakatagal na natin itong ginagawa kahit noong wala pang eleksyon.

Sabagay, kung iintindihin natin ang sasabihin ng ating mga kalaban sa pulitika ay wala tayong magagawa kaya mas mabuting kumilos na lamang tayo nang kumilos at bahala na ang mga basher sa sasabihin nila.

Ang mahalaga ay seryoso tayo sa ating ginagawa at hangad lang natin ay ang kapakanan ng ating mga kababayan at kahit ang mga basher ay tinutulungan din naman natin dahil hindi tayo namimili ng tutulungan.

Nakatakda rin akong magpunta sa Aklan at Antique ngayong araw na ito para ikutin natin ang mga bayan sa mga nasabing lalawigan upang maipamahagi rin ang AICS sa lahat ng ating mga nangangailangang kababayan.

Magbibigay din ako ng tig-P2,000 bawat residente na dadalo sa mga lugar na aming pupuntahan kasama si Gov. Joen Miraflores na aabot sa mahigit P8 milyon sa kabuuan na mula rin sa AICS o posibleng tumaas pa.

Sa susunod na labas natin ay ikukuwento ko sa inyo ang naging karanasan namin sa Aklan at Antique dahil alam kong excited na ang ating mga kababayan bago pa man tayo magtungo roon – tulad ko rin, excited  na ako makadaupang-palad ngayong araw ang ating mga kababayan doon.

Marami pa tayong mga lalawigang pupuntahan sa mga darating na araw at marami tayong mga kababayang mapapasaya bago pa sumapit ang Pasko.

Kaya bantayan n’yo lang ang schedule ng ating ikot upang sakaling magawi tayo sa inyong lugar ay magkita-kita tayo at mabahaginan kayo ng mga biyaya na matagal na nating ginagawa at hindi ito papansin lang. 

Nakakataba ng puso nang magtungo tayo sa Mindanao dahil halos hindi tayo makalakad sa dami ng taong sumalabong sa atin na lahat ay gusto tayong halikan at yakapin bukod pa sa mga nais magpakuha ng larawan.

Dahil sa sobrang pagmamahal na naranasan natin sa Mindanao ay hindi malayong magpabalik-balik ako sa lugar na ito para makasama natin ang ating mga kababayan na nagmamahal din sa atin.

May mga kababayan talaga tayong maganda ang tingin sa ating ginagawa ngunit hindi rin talaga maiiwasan na may mga kababayan tayong minamasama pa ginagawa natin lalo na sa social media. Ngunit hindi tayo magpapaapekto — tuloy lang ang mabuting gawa! 

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com