Dapat igalang ng China ang soberanya ng Pilipinas

ni Bong Revilla - @Anak ng Teteng | April 14, 2021

Dahil sa pagpapakita na paninindigan ng ating bansa hinggil sa dose-dosenang barko ng Chinese na nahimpil sa Julian Felipe Reef ay naagaw natin ang atensiyon ng Estados Unidos hinggil dito.

Kahanga-hanga ang agad nilang pagpapakita ng paninindigan bilang kaalyado sa panuntunan base sa international maritime order at handa umano silang sumuporta anumang oras bilang pagtupad sa United States-Philippines Mutual Defense Treaty sa South China Sea.

Nagpakita rin nang pag-aalala ang Canada, Australia, Japan at iba pang bansa hinggil sa hindi maipaliwanag na intensiyon ng China sa teritoryo ng Pilipinas.

Nag-ugat ang lahat ng ito matapos hayagang palayasin ni Defense Secretary Delfin Lorenzana ang mahigit sa 200 Chinese vessels na umano’y bahagi ng maritime militia ng China.

Ikinatuwiran ni Chinese Ambassador to the Philippines Huang Xilian na kinailangan lamang umano nila sumilong dahil sa labis na sama ng panahon na siya namang ikinairita ni Lorenzana dahil napakaganda ng paligid at wala kahit banta ng masamang panahon.

Lalo pang nadagdagan ang pagkairita ni Lorenzana dahil hindi pa rin tuluyang nagsialis ang mga ito dahil may nanatili pa ring 44 Chinese ships na dahilan para tuluyan na silang paalisin ni Lorenzana.

Sinabi ni Lorenzana sa kanyang Twitter account na hindi umano siya loko para maniwala sa palusot ng mga Tsino dahil napakaganda ng panahon at wala silang sapat na dahilan para manatili sa ating teritoryo kaya dapat silang umalis.

Dahil dito ay nagpaliwanag ang Chinese Embassy na ang naturang sasakyang pandagat ay hindi Chinese maritime militia ships kundi ordinaryong fishing boats na humanap lamang ng masisilungan at ganito rin ang naging paliwanag ni Huang nang makipagpulong ito kay Pangulong Duterte.

Ang Juan Felipe Reef ay 324 kilometro lang ang layo mula sa Palawan na nasasakupan ng 370-km exclusive economic zone (EEZ) ng ating bansa.

Napakarami umano ng ginagawang paliwanag ni Huang at lantarang pinapalagan ang hiling ng pamahalaan na lisanin ang ating teritoryo na kung tutuusin ay hindi nararapat para sa bansa na itinuturing na kaibigan ng ating bansa.

Nasundan pa ito ng isa namang insidente nang tugusin ng Chinese Navy military vessels ang isang Pinoy vessel na minamaneho ng ilang sibilyan lulan ang team ng ABS-CBN habang binabaybay ang ilang bahagi ng West Philippine Sea malapit sa mainland ng Palawan.

Dahil dito ay umani na ng napakaraming negatibong komento ang hakbang na ito ng mga Tsino na tila inaabuso na ang kabaitan ng ating bansa at katunayan ay tinanggap pa natin kamakailan ang handog nilang bakuna bilang tanda nang mabuti nilang pakikitungo sa atin.

Ngunit kahit sa normal na magkaibigan ay tila hindi tamang habang nakikipagmabutihan ang isa ay naninira naman ang isa at posible itong humantong sa away-magkaibigan.

Wala rin itong iniwan sa isang baboy na mahal na mahal ng nag-aaruga, araw-araw pinaliliguan, binibigyan ng bitamina, tinuturukan ng mga pangontra sa sakit at pinakakain sa tamang oras pero pagsapit ng takdang panahon ay gagawin din palang litson o ipagbibili.

Kung ganito ang sitwasyon ng pagkakaibigan ay hindi ito maituturing na tunay na kabigan dahil ang tunay na kaibigan ay hindi pumapayag na pasamain man lang ang loob ng kanyang kaibigan.

Isa pa kung talagang sumilong lang sa ating teritoryo ang mga barko ng Tsina dahil inabot lang sila ng sama ng panahon ay maaari naman nila itong ipagbigay-alam sa ating pamahalaan na pansamantala lang ang kanilang pananatili.

Kaso ang National Task Force for the West Philippine Sea (NTF-WPS) pa ang nag-ulat na namataan umano ng Philippine Coast Guard ang may 220 maritime militia vessels sa ating teritoryo, tapos nabawasan at naging 183 na lamang noong Marso 22 hanggang naging 199 noong Marso 27.

Tapos noong Marso 29 ay 44 pa ang natira pero ayon sa Task Force mahigit pa sa 100 barko ang namataan sa iba pang reef — 115 sa Chigua, 50 pa ang nakahambalang sa paligid ng Panganiban (Mischief) Reef, Kagitingan (Fiery) Reef at Zamora (Subi) Reef.

May 45 pa sa Pag-asa Island at may tatlo umanong Type 022 (Houbei class) stealth missile fast attack craft at iba pang barkong pandigma na lahat ay nasa bahagi ng Kalayaan Island Group ng Pilipinas.

Paano pa ito itatanggi ng Tsina at ano na naman kaya ang kanilang paliwanag hinggil dito na ang pakiramdam ng marami sa ating kababayan ay tahasang pang-aabuso na ito sa ating pananahimik?

Mahalagang maging malinaw tayo sa itinuturing nating kaibigan na bansang Tsina na dapat igalang nila ang ating sovereign territories at sundin ang international law.

Kung sinsero ang mga Tsinong ito sa pakikipagkaibigan sa atin ay hindi nila hahayaang humantong sa away-magkaibigan ang lahat at sana ay gawin nila ang tama.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Iresponsableng statement at post sa Facebook laban sa mga manggagawa ng Senado

ni Bong Revilla - @Anak ng Teteng | April 12, 2021

Ilang sandali tayong naabala at nag-isip kung dapat bang patulan ang isang napaka-iresponsableng statement at post sa Facebook na kinasasangkutan mismo ng mga manggagawa sa Senado.

Bilang Senador ay hindi natin ito mapalampas dahil mismong ang National Intelligence Coordinating Agency (NICA) ang nag-post at isang Alex Paul Monteagudo na Director-General ng naturang ahensiya.

Ang NICA ay primary agency intelligence gathering and analysis arm ng ating pamahalaan na siyang ring nakatutok sa mga kapansin-pansin at hindi kapansin-pansing galaw kabilang na ang mga lihim na pagkilos laban sa pamahalaan.

Napakamalisyoso ng pagkaka-post at isa itong maliwanag na red-tagging na basta na lamang ipinaskil sa social media at masyadong inabuso ang kapangyarihang saklaw ng NICA na hindi man lang isinaalang-alang ang kalagayan at magiging kalagayan ng mga manggagawa sa Senado.

Bale dalawang lay-out na magkapareho naman ng nilalaman at ganito ang pagkakasulat-STAY INFORMED, The Sandigan ng mga Empleyadong Nagkakaisa sa Adhikain ng Demokratikong Organisasyon (S.E.N.A.D.O.), the workers union in the Senate of the Philippines is affiliated with COURAGE.

Ang ibig sabihin ng COURAGE ay Confederation for Unity, Recognition and Advancement of Government Employees na umano’y isang CPP-NPA-NDF’s Front Organization.

Nakasaad din sa ibabang bahagi ng layout ang mga katagang — SENADO SERVES AS THE EYES AND EARS OF THE CPP-NPA-NDF IN THE SENATE TO HIJACK PLANS AND PROGRAMS OF THE GOVERNMENT.

Hindi naman masamang mahagilap ng NICA ang mga impormasyong ito, lehitimo o hindi man ang may gawa, ngunit hindi dapat basta na lamang ipinapaskil sa social media ang hilaw pang impormasyong tulad nito na kahit ang NICA ay bulag dito.

Buo ang ating paniniwala na ang unyon ng mga empleyado sa Senado o ang S.E.N.A.D.O. mismo ay hindi kailanman naging traydor sa pamahalaan tulad nang ipinalalabas ng malisyosong Facebook post.

May ilang masasamang loob lamang na nais maghasik ng kalituhan para guluhin ang mapayapang sitwasyon sa Senado at makakuha ng simpatya sa mga maniniwala.

Tulad ng inaasahan ay halos iisa ang naging daloy ng mga komento na kesyo nalusutan umano ang intelligence gatherings ng PNP, nariyang suportado ito ng mga oposisyon at alam diumano ito ng ilang Senador na hindi pabor sa palakad ng administrasyon.

Sa katunayan ay binanggit pa ng ilang nagkomento sa Facebook ang mga pangalan ng mga umano’y nakakaalam na Senador, ngunit wala itong basehan at walang matibay na ebidensiya na mag-uugnay sa kanila.

Isa sa mga nakikita nating dahilan ay may ilang grupo na nais sakyan ang kasalukuyang paggalaw ng NPA na noong Marso 29 lamang ay nagdiwang ng kanilang anibersayo.

Sa mga lalawigan ay aktibo rin ang mga sundalo at pulisya sa pagkakabit ng mga poster na kumukondena sa aktibidades ng NPA bilang bahagi ng National Task Force to End Local Communist Armed Conflict (NTF-ELCAC).

Maging ang mga kapatid nating rebelde ay galit na galit sa red-tagging kaya naniniwala tayong hindi rin sila bababa sa ganitong lebel para ipahamak ang manggagawa sa Senado na wala namang ibang agenda kundi ang magtrabaho.

Lehitimo ang unyon ng mga manggagawa sa Senado at sila mismo ang nagsusulong ng kapakanan ng mga empleyado at bilang chairman ng Civil Service Committee ay kilala nating personal ang mga opisyal ng unyon na nakakasalamuha natin sa ilang mahalagang gawain.

Higit sa lahat, hindi ito makalulusot sa karanasan at husay ng mga namamahala ng seguridad ng buong gusali at ng Senado sa kabuuan bukod pa sa mga nakalatagang pulisya sa detachment na nasa loob mismo ng compound ng Senado.

Sa mga manggagawa sa Senado, huwag kayong maalarma sa mga ganitong uri ng propaganda dahil higit sa lahat kami ang nakakaalam sa tunay na kalagayan ng ating mga manggagawa.

Sa NICA ay wala naman tayong nilabag kung depinisyon lang ng inyong function ang pag-uusapan, ngunit tila hindi naman kasama na lahat nang inyong makakalap na impormasyon ay basta n’yo na lamang ipapaskil sa social media kahit hindi pa tiyak.

Itinalaga kayo para mangalap ng impormasyon, pero hindi kayo itinalaga para magpahamak ng kapwa, maging reponsable lang sana!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com