16.3 ang TV ratings ng pilot episode ng Agimat ng Agila

ni Bong Revilla - @Anak ng Teteng | May 07, 2021

Noong pilot episode ng Agimat ng Agila nitong nakaraang Sabado ay halos mamaos tayo sa kaka­pasalamat dahil sa dami ng mga tumatawag sa akin at tuwang-tuwa umanong nakatutok sa kani-kanilang telebisyon.

Pero kung dati ay palakpak at papuri lang ang ating natatanggap, ngayon ay opisyal nang ulat na inilabas mismo ng Nielsen Phils.TAM NUTAM People Ratings at kumpirmado nang napakarami nang nanood dahil umabot ang ratings nito sa 16.3. Na­nga­ngahulugan umano ito na mahigit sa 14 milyong telebisyon sa mga tahanan ay tumutok sa ating palabas.

Kaya kahit punuin pa ng napakaraming pasasa­lamat ang artikulong ito ay hindi sasapat para sa galak na ating nararamdaman sampu ng aking pa­milya na tuwang-tuwa rin dahil sa mainit na pagtang­gap ng ating mga kababayan sa pagbabalik ko sa telebisyon.

Siyempre, ipinagpapasalamat din natin ang hindi pagdadalawang-isip ni Direk Rico Gutierrez na ma­ging bahagi ng Agimat ng Agila nang alukin ito ng GMA Network at kitang-kita sa kanya ang excitement na pagandahin talaga ang animo’y pelikulang teleseryeng ito.

Inaasahan nating mas aabangan na ito ng ating mga tagapanood dahil nais na nilang makita ang ginampanan nating papel bilang forest ranger na si Major Gabriel Labrador na nakalmot ng makapang­yarihang agila at kung paano nito sisimulan ang pagsagupa sa mga evil forces na nais maghari sa kagubatan.

Isa itong action-packed fantasy na kahit ang kababaihan at mga bata ay labis na matutuwa dahil sa binusising visual effects na masyadong maka­bago at masasaksihan ninyo ang mga kakaibang fight scenes na sadyang binuo para lamang sa Agimat ng Agila.

Bilang hepe ng Task Force Kalikasan ay mapalad na napili si Major Labrador na maging tagapag-ingat ng Agimat ng Agila kaya hindi rin nasayang ang napakatagal nating preparasyon para mabuo ang teleseryeng ito.

Isipin n’yo para tayong nanganganay muli, dahil sa kinailangan nating sumailalim sa matinding pagsasanay sa boxing, muay thai at iba klase ng mixed martial arts; bina­likan din natin ang pagsasanay sa paghawak ng baril at iba pang armas dahil nga kaila­ngang-kailangan bilang tagapag­tanggol ng kalikasan.

Dapat pelikula talaga ang Agimat ng Agila kaso nagkasundo kami ng GMA Network na gawin itong TV series at kitang-kita ang pagsisikap ng buong production team kaya lumabas itong maganda at mabuti na lamang at nabigyan ito ng hustisya ng direktor at ng scriptwriter.

Napakalaking inspirasyon din sa TV series na ito ang ating namapaya­pang ama na si dating Senador Ra­mon Revilla, Sr. na sobrang miss na miss ko na rin, pero dahil sa Agimat ng Agila ay parang bigla nating minana ang kanyang agimat.

Alam naman nating lahat na mula noong tayo’y bata pa ay palagi niya tayong isinasama sa napakarami niyang pelikula hanggang s magbinata at tuluyan nang pumalaot sa pelikula na ako na mismo ang bida.

Hinasa ako sa pagharap sa ka­mera ng aking ama at minana ko sa kanya ang husay sa pagganap at ma­ging ang pagpo-produce ng pelikula ay aking natutunan kaya rito na rin ako nakaipon ng sarili kong puhunan hang­gang sa mapunta na sa pulitika.

Buong buhay ay pelikula ang humu­bog sa atin kaya nang mahinto sa pag­harap sa kamera ay ramdam na ram­dam natin ang pagkalungkot at hinahanap-hanap talaga ang nakala­­kihang industriya.

Nananalaytay talaga sa dugo ang pagiging aktor at higit sa lahat ay na-miss ko ‘yung camaraderie at ‘yung collective creativity with my co-workers — mula co-actors hanggang writers, directors, crew, at buong staff, lahat na-miss at masuwerte tayong muli itong naranasan.

Kumumpleto sa powerhouse cast ng Agimat ng Agila ay sina Sanya Lopez ang aking leading lady bilang si Maya Lagman, isang mapagmahal na adopted daughter ni Nanay Berta na ginampanan naman ni Elizabeth Oropesa.

Si Nanay Berta ang misteryosong nakatatanda ang aalalay kay Major Labrador sa kanyang pakikipabaka bilang tagapagligtas; si Roi Vinzon naman ay si Alejandro Dominguez, isang respetado at kinatatakutang negosyante at crime lord.

Si Benjie Paras naman ay Sgt. Wesley Dimanahan, pinagkakatiwa­laan at kanang-kamay ni Major Labrador; Allen Dizon bilang Capt. Gerry Flo­res, second-in-command ng Task Force Kalikasan; Michelle Dee bilang Serpenta, evil shadow creature na palaging bumubuyo kay Alejandro.

EA Guzman sa papel na Julian at kababata ni Maya; Miggs Cuaderno bilang Bidoy, ismarteng bata na napalapit kay Major Labrador; Ian Ignacio bilang Malvar at deputy henchman ni Alejandro.

May special participation din si Sheryl Cruz bilang Dr. Myrna Labrador, mayumi at mabuting maybahay ni Major Labrador at siyempre, hindi na­man mawawala ang ibang nagsi­ga­nap tulad nina King Gutierrez, Jhong Cuenca, Mike Lloren, Althea Ablan, Dentrix Ponce, Yuan Francisco, at Seth Dela Cruz.

Sa casting palang panalo na kaya muli ay inaanyayahan namin kayo bukas ng alas-7:15 ng gabi, Sabado sa GMA para masagot na ang mga tanong ninyo kung paano bibigyan ng proteksiyon ni Major Labrador ang likas na yaman ng ating kalikasan la­ban sa masasamang espirito.

Marami ang nagtatanong kung totoo ba ang agimat ng aking ama at kung ipinamana ba ito sa akin, malalaman n’yo rin ‘yan sa takdang panahon at sa ngayon ay tutukan n’yo muna ang Agimat ng Agila!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Nakakalungkot ang sinapit ng India, maging isang halimbawa sana sa ating lahat

ni Bong Revilla - @Anak ng Teteng | May 05, 2021

Marami sa ating mga kababayan ang hanggang sa kasalukuyan ay puro reklamo pa rin ang bukambibig dahil umano sa hindi magandang pagtugon ng pamahalaan na maresolba ang pandemyang ating pinagdadaanan.

Ngunit totoo ang pahayag ng pamahalaan na higit tayong mas maayos kumpara sa mas maraming bansa na ngayon ay nasa grabeng sitwasyon tulad na lamang ng India na nagsasagawa na ng mass cremation dahil sa sobrang dami na ng mga nasawi dahil sa pandemyang ito.

Sa pinakahuling ulat mula sa India, nasa 357,229 ang mga bagong nahawa sa kanila sa loob lamang ng isang araw at dahil d’yan ay umaabot na sila 20.3 milyong kaso na lubhang napakalayo sa ating sitwasyon.

Sa loob lamang ng pitong araw ang India ay nakapagtala ng 2,613,415 bagong kaso ng COVID-19 at mahigit na sa 3,438 ang pinakahuling ulat ng mga binawian na ng buhay at nasa 3.44 milyon naman ang aktibo nilang kaso dahil sa hindi na nila maampat na sitwasyon.

Sa loob lamang ng nagdaang 24-oras ay nakapagtala ng mga bagong kaso ang Maharashtra na may 48,621 na mga bagong nahawa, sinundan ng Karnataka na may 44,438, Delhi na may 18,000, Kerala na may 26,011 at Andhra Pradesh na may 18,000.

Itong mga lugar na ito sa India ay kasama sa talaan ng mga grabeng naapektuhan ng COVID-19 na kumpara sa atin ay halos naglalaro lamang sa mahigit-kumulang sa 10,000 bagong kaso sa loob ng isang araw at sa buong bansa na ito.

Sa buong mundo ay nasa 154,161,386 na nahawa sa nakamamatay na virus, habang nasa 132,273,257 ang mga gumaling, nasa 3,226,272 naman ang mga nasawi kaya huwag natin masyadong sisihin ang pamahalan dahil sa buong mundo ang problemang ito.

Ang United States ang nananatiling worst-hit country na may 33,228,988 kaso, sinundan ng India, Brazil, France at Turkey kaya lamang nitong nagdaang huling pitong araw ay nagdagdag ang India ng pinakamataas na mga bagong kaso na 2,613,415, na sinundan ng Brazil na may 414,123 at US na may 361,019.

Ganyan kalala ang sitwasyon kaya nga ang ating pamahalaan ay nagbigay na ng babala na ang ating bansa ay maghihigpit sa pagpapatupad ng “hard, long and strict” quarantine requirements para sa mga manggagaling sa India sa oras na maalis na ang travel restriction.

At pabor ang marami nating kababayan sa paghihigpit na ito upang hindi na kumalat pa ang mga bagong coronavirus variant na pinaniniwalaang dahilan kung bakit biglang-bigla ang hindi inaasahang paglobo ng mga kaso ng COVID-19 sa South Asian country.

Sa ngayon ay nasa 73 na ang mga Pinoy sa India na tested positive sa COVID-19 kabilang na ang may mga mild hanggang moderate na sintomas at dalawa pa lamang ang naitatalang namamatay.

Hindi naman natin puwedeng pabayaan ang may 60 hanggang 70 Pinoy na nagbigay na ng pahayag na nais na nilang bumalik sa ating bansa dahil sa nakakatakot ngang sitwasyon sa India kaya nga lamang ay suspendido pa ang biyahe dahil sa kasalukuyang sitwasyon.

Ayon sa paliwanag ng OCTA Research Team ng University of the Philippines (UP) isa sa mga posibleng dahilan nang muling paglobo ng kaso ng COVID-19 sa ating bansa ay pagkakaantala ng pagdating bakuna na hindi naman kontrolado ng pamahalaan.

Ngunit higit umanong malaking kadahilanan ang paulit-ulit na hindi pagsunod ng marami sa ating mga kababayan sa umiiral na health protocol partikular ang simpleng pagsusuot ng facemask, face shield, regular na paghuhugas ng mga kamay at physical distancing.

Ayon pa sa mga eksperto, katigasan ng ulo at kawalang disiplina ang mas malaki umanong kadahilanan kung bakit muli tayong bumalik sa grabeng sitwasyon na noong una ay atin nang napigilan ngunit tila apoy na naman itong naglagablab dahil sa madalas na siksikan.

Patunay dito ang ipinapataw na mas mahigpit na community quarantine ng ating pamahalaan kung saan sa loob lamang ilang araw ay nakakaramdam na agad tayo nang pagbaba ng mga kaso ng COVID-19 at inaasahang bababa pa sa mga darating na araw.

Nandito na ang bakuna, nandito na ang solusyon, ang tanging puwede na lamang nating gawin ay ipagpatuloy ang sinimulan nating pag-iingat na kayang-kaya naman ng mga Pinoy habang ipinatutupad na ang pagbabakuna.

Kilala naman tayong nagsasama-sama at nagkakaisa sa oras ng kagipitan at kung ito ang ating paiiralin ay hinding-hindi tayo matutulad sa bansang India na labis nating ikinalulungkot ang pangyayari.

Sa kasalukuyan nating sitwasyon, ang mainip talo; ang hindi magpapasakop sa pamahalaan, delikado; ang hindi mag-iingat baka mapunta sa sementeryo!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Maraming salamat sa mga nag-abang sa Agimat ng Agila

ni Bong Revilla - @Anak ng Teteng | May 03, 2021

Isang napakalaking tagumpay ang naging pilot episode ng Agimat ng Agila noong nakaraang Sabado ng alas-7:15 ng gabi sa GMA 7 na inabangan ng napakarami nating kababayan na labis nating ipinagpapasalamat.

Medyo napawi na ang kabang nararamdaman dahil muli ay naramdaman natin ang labis na pagmamahal mula sa ating mga tagasuporta na dahil sa tagal na hindi tayo humaharap sa kamera ay inakala nating hindi gaanong mainit ang pagtanggap sa akin.

Ngunit dahil sa dami ng mga nanood ay muli kong naramdaman ang dating init na ipinapadama ng mga nagmamahal sa atin at dahil sa maluwalhati ninyong pagtanggap sa aking pagbabalik sa telebisyon ay umasa kayong magtutuluy-tuloy na ang pagbabalik ko maging sa paggawa ng mga pelikula.

Maraming salamat din sa napakaraming sponsor na sobra-sobra ang ipinakitang suporta sa Agimat ng Agila at sa pamunuan ng GMA Network ay labis din ang aking pasasalamat sa muli nilang pagbubukas ng pintuan sa aking pagbabalik sa telebisyon.

Naging matagumpay din ang isinagawa nating Kap’s Amazing ‘Agimat ng Agila’ Gadget Giveaway na isinagawa dalawang oras bago ang pilot episode ng Agimat ng Agila na tinutukan din ng napakarami nating kababayan sa aking Facebook account.

Bukod sa inyong lingkod ay naging katuwang ko bilang host ng programa si Benjie Paras at ang nagbigay-kaguluhan para maging masaya ang programa ay si Boobsie Wonderland at nakisaya rin online ang aking leading lady sa Agimat ng Agila na si Sanya Lopez.

Sa kabuuan ay umabot sa halos 2,261,050 ang Reach, mahigit 2,000,000 din ang Engagements, 67,534 ang Reactions, 821,937 ang Comments at 115,490 ang Shares, kaya sobra-sobra talaga ang aking pasasalamat sa lahat nang tumutok sa ating programa.

Nagsimula ang ating online give away bandang alas-5: 00 ng hapon hanggang alas-7: 00 ng gabi na nagsilbing unang round lamang ng programa at pansamalatang itinigil upang bigyang-daan ang panonood ng Agimat ng Agila.

Sa unang round pa lamang ay marami na agad ang natuwa sa ating Amazing Roleta na may mga nakalaang premyo na isa sa mga paboritong sinusubaybayan ng ating mga viewers.

Sobrang saya rin ang portion na Agimat ng Agila-Pera o Letra? at iba pang games na nilahukan ng napakarami nating kababayan mula sa Isabela, Nueva Ecija, Pangasinan, Cagayan, Metro Manila, Bicol, Zamboanga Del Sur, Davao De Oro, Visayas hanggang sa Saudi Arabia Saudi Arabia ay may mga nakisali kabilang na ang napakaraming Overseas Filipino Workers (OFWs).

Bago magtapos ang unang round ng programa ay napakarami pa ng ipinamahagi naming tablet at laptop sa mga hindi bumibitaw sa pagtutok sa aming programa at napakarami ng mapalad na nabahaginan ng ayudad sa ilalim naman ng portion na Agimatizer bago pa nag-break ang programa.

Bandang alas-8:15 ng gabi pagkatapos na mapanood ang Agimat ng Agila ay muli na naman naming itinuloy ang online program para sa second round at sa pagkakataong ito ay dinoble na namin ang mga premyong tatamaan sa Amazing Roleta.

Dahil dinoble na ang papremyo kaya dobleng kasiyahan din ang hatid nito sa ating mga kababayan at maging ang mga secret card na nakataob ay dinoble rin kaya marami ang nanalo ng pangkabuhayan na may kasamang tig-dadalawang laptop o tablet.

Marami rin ang nakakuha ng premyo na mapalad na napili dahil sa nagpadala ng selfie photos ang mga viewers habang nanonood ng Agimat ng Agila kasama ang kanilang mga mahal sa buhay.

Sa tuwing iikot ang roleta ay magkahalong emosyon ang nararansan ng mga kalahok na may sumisigaw at may umiiyak na damang-dama natin ang labis na pangangailangan ng marami sa ating mga kababayan.

Nakakataba lamang ng puso na marami sa ating natulungan ay nasa gitna ng mga matitinding pagsusubok tulad ng walang sariling tahanan, may sakit at kailangan ng karagdagang panggasatos sa araw-araw.

Ganap na alas-9: 00 ng gabi nang pansamantala na kaming mamaalam sa programa at labis-labis din ang aming kaligayahan dahil bukod sa tagumpay ng Agimat ng Agila ay tagumpay din ang Kap’s Amazing ‘Agimat ng Agila’ Gadget Giveaway dahil napakarami na naman ng ating natulungan.

Sa ngayon ay patuloy pa rin ang natatanggap nating mga messages mula sa ating mga kababayan na nais ring mabigyan ng pagkakataong manalo sa ating online giveaway na kaya natin regular na isinasagawa ay upang makapagbigay ayuda tayo sa ating mga kababayan sa gitna ng pandemya.

Sayang nga lamang at hindi natin kayang bigyan ang buong bansa kaya kinakailangan pa nating idaan sa mga palaro at roleta upang walang makapagsabi na may pinaiiral tayong lamangan sa pamamahagi.

Sa mga nanalo ng malalaking halaga ay ibahagi naman ninyo ang inyong biyaya sa ilang nangangailangan kahit paano at huwag kayong tumulad sa mga kontrabida sa Agimat ng Agila na kahit mawasak na ang kalikasan ay walang pakialam dahil lamang sa pagkagahaman.

Kaya tutok lang tuwing Sabado ng alas-7:15 ng gabi sa GMA 7 upang masubaybayan ninyo ang Agimat ng Agila kung saan ay ginagampanan ko ang forest ranger sa katauhan ni Major Gabriel Labrador para sa punung-puno ng aksiyon, drama at katatawanan na binusisi at pinagandang mabuti ng direktor na si Rico Gutierrez.

Kasama ko rin sa fantasy-adventure na ito sina Sheryl Cruz, Miss World Philippines Michelle Dee, Elizabeth Oropesa, Roi Vinzon, Allen Dizon at Benjie Paras na pare-parehong dumanas ng hamon dahil sa hirap na pinagdaan nila habang binubuo ang teleseryeng ito.

Maganda rin ang feedback ng kalmot sa aking braso mula sa kuko ng agila na aking sinagip sa isang eksena at kung ano ang magiging kaugnayan nito sa pakikipaglaban ko sa mga nagmula sa kadiliman na nais wasakin ang kalikasan!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com