Pray for Mindanao

ni Bong Go @Bisyo Magserbisyo | June 13, 2026

Bilang isang Mindanaoan, mabigat sa aking kalooban ang nangyaring malakas na lindol sa Mindanao noong Lunes ng umaga, June 8. Ayon sa Philippine Institute of Volcanology and Seismology (PHIVOLCS), magnitude 7.8 ang lindol na tumama sa Maasim, Sarangani, na naramdaman sa maraming lugar.  Ito ay sinundan ng maraming aftershocks na patuloy na nagdudulot ng takot sa ating mga kababayan.

Nakikiramay ako sa mga pamilyang nawalan ng mahal sa buhay. Ipinagdarasal ko rin ang agarang paggaling ng mga nasugatan at ang kaligtasan ng mga nawawala pa. Libu-libong mga kababayan natin ang napilitang lumikas, daan-daang pamilya ang tuluyan nang nawalan ng tirahan.

Sa ganitong sitwasyon, ang unang dapat bantayan ay ang kaligtasan ng ating kapwa. Kaya nananawagan ako sa ating mga local government units (LGUs) na magsagawa sa lalong madaling panahon ng masusing assessment sa mga gusali, bahay, paaralan, ospital, tulay, kalsada, at iba pang istruktura. At dahil patuloy pa rin ang aftershocks, hindi dapat ipagsapalaran ang buhay ng ating mga kababayan.

Mahalaga ang mabilis at maayos na koordinasyon. Kailangang maibalik agad ang kuryente at tubig sa mga lugar na apektado, lalo na sa mga ospital at evacuation centers. Bilang health reforms crusader, mahalaga sa akin na tuluy-tuloy ang serbisyo sa kalusugan lalo na sa panahon ng sakuna. Kapag may pasyente, sugatan, bata, matanda, o may sakit, hindi puwedeng mawalan sila ng mga serbisyong medikal.

Nanawagan din ako sa mga kinauukulang ahensya na bigyan ng agarang tulong ang mga nawalan ng kabuhayan. Maraming manggagawa ang apektado kapag nagsara pansamantala ang mga tindahan, negosyo, palengke, opisina, at iba pang establisyemento dahil sa pinsala. Kailangan nilang makakain, makabili ng gamot, at masuportahan ang kanilang pamilya habang hindi pa normal ang sitwasyon.

Dahil sa mga ganitong sakuna, patuloy kong isinusulong ang mas matibay na disaster resilience at mga programang makatutulong sa pabahay ng mga pamilyang naapektuhan ng kalamidad.

Ako ang principal author at co-sponsor ng Republic Act No. 12076, o ang Ligtas Pinoy Centers Act. Layunin ng batas na ito na magkaroon ng permanent, disaster-resilient, at fully equipped evacuation centers sa buong bansa. Kailangan ng ating mga kababayan ng ligtas, maayos, at disenteng matutuluyan tuwing may sakuna. Muli tayong nananawagan sa national government para sa full implementation ng batas ito.

Patuloy ko ring ipaglalaban ang Senate Bill No. (SBN) 173, o ang proposed Department of Disaster Resilience. Layunin nito na magkaroon ng isang nakatutok na ahensya para pag-isahin ang disaster risk reduction, preparedness, response, at rehabilitation efforts. Sa panahon ng kalamidad, mahalaga ang mabilis na aksyon, malinaw na sistema, at iisang direksyon sa pagtugon.

Kasama rin sa aking isinusulong ang SBN 415, o ang proposed Rental Housing Subsidy Program. Layunin nito na magbigay ng pansamantalang tulong sa pabahay sa mga pamilyang nawalan ng tirahan dahil sa kalamidad habang sila ay nag-aayos, bumabangon, o naghahanap ng mas permanenteng matitirhan.

Sa tulong ng mga kapwa ko mambabatas at mga kasamahan sa gobyerno, magtatrabaho po ako sa abot ng aking makakaya para makatulong sa pag-ahon ng mga biktima ng malakas na lindol. Mahalaga po ngayon ang agarang return to normalcy, o pagbalik sa normal ng kanilang pamumuhay sa lalong madaling panahon.

Ngayong sunud-sunod ang krisis, nananawagan ako sa lahat na unahin muna ang serbisyo sa ating kapwa lalo na sa mga mahihirap. Ito ang panahon para magkaisa tayo para sa Pilipino.

Nitong June 10, bumisita tayo sa mga bayan ng Malapatan at Glan sa Sarangani upang personal na kamustahin ang ating mga kababayang naapektuhan at maghatid ng tulong sa abot ng ating makakaya. Katuwang ang mga lokal na opisyal na sina Malapatan Mayor Jun Sumbo Jr., Glan Mayor Tata Yap at Vice Mayor James Yap, namahagi tayo ng iba’t ibang assistance sa mga pamilyang nagsisikap na makabangon mula sa pinsalang dulot ng lindol.

Patuloy tayong makikipag-ugnayan sa mga lokal na opisyal at kinauukulang ahensya upang maipaabot ang tulong sa mga nangangailangan.

Samantala, noong June 3, personal nating tinulungan ang 87 fire victims sa BASECO sa Manila. Isinagawa ang relief operation sa pakikipag-ugnayan kina Councilor Charry Ortega, former Councilor Robert Ortega, at Barangay Chairman Diane Espinosa.

Nito namang June 8, nang aking mabalitaan na may nasunugan noong umaga ng parehong araw ay minabuti kong puntahan at kamustahin ang kalagayan ng mga kababayan nating nasunugan sa Brgy. 20, Maynila. Nakasama natin si Brgy. Captain Anthony Igus sa pag-iikot. Personal rin tayong naghatid ng tulong sa libo-libong pamilyang nasunugan sa Brgy. 275 sa Maynila katuwang sila Brgy. Captain Bernard Narito at mga kinatawan ng barangay.

Naging abala ang nakaraang linggo sa Senado. Ngunit sa kabila nito, tuluy-tuloy pa rin ang trabaho ng ating Malasakit Team sa mga komunidad para makatulong sa mga kababayan nating nangangailangan, kabilang ang mga fire victims sa Taguig City, Pasay City, Bacolod City, Negros Occidental, at Davao City.

Nagpaabot din tayo ng karagdagang tulong sa mga fire victims sa Bacolod City at San Carlos City sa Negros Occidental; Taytay, Rizal; Navotas City at Malabon City na patuloy na bumabangon. Doon, nakatanggap din ang mga benepisyaryo ng tulong mula sa gobyerno para makabili ng construction materials na magagamit sa muling pagpapatayo ng kanilang mga tahanan.

Bukod dito, sa imbitasyon ni Mayor Gina Merilo, nagtungo rin ang ating Malasakit Team sa Tanauan, Leyte upang dumalo sa blessing at inauguration ng pinakabagong Super Health Center. Namahagi rin tayo ng grocery packs sa mga barangay health workers.

Nabigyan din ng tulong ng ating team ang mga scholars mula sa Dagupan City, Pangasinan noong nakaraang linggo.

Bilang inyong Mr. Malasakit, anumang pagsubok ang ating haharapin sa susunod na mga araw, patuloy akong magseserbisyo sa inyong lahat dahil bisyo ko na ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Ligtas Pinoy Centers Act para sa mabilis na aksyon vs. kalamidad

ni Bong Go @Bisyo Magserbisyo | June 5, 2026

Ngayong nagsimula na ang Habagat season na inaasahang magdudulot ng malalakas na ulan at pagbaha, paalala ito sa ating lahat na hindi dapat maging huli ang paghahanda sa kalamidad. Dahil dito, mahalagang maging alerto ang mga komunidad, lalo na sa mga lugar na madalas bahain o may panganib ng landslide.

Bilang inyong senador, patuloy kong itinutulak ang mga batas at programa para sa mas matibay na paghahanda sa kalamidad. Bilang principal author at co-sponsor ng Republic Act No. 12076, o Ligtas Pinoy Centers Act, mahalaga sa akin na maipatupad nang maayos ang batas na ito. Layunin ng RA 12076 na magkaroon ng permanente, disaster-resilient, at kumpletong evacuation centers sa buong bansa.

Marami sa ating mga paaralan, covered courts, at iba pang pampublikong pasilidad ang nagagamit bilang pansamantalang evacuation areas tuwing may kalamidad. Nakakatulong ang mga ito sa oras ng pangangailangan, pero kailangan din natin mas angkop at mas ligtas na pasilidad para sa mga pamilyang kailangang lumikas. Panahon na para protektahan natin ang dignidad ng mga evacuee.

Muli ko ring inihain ang panukalang Senate Bill No. 173, o ang Department of Disaster Resilience Bill, na naglalayong magkaroon ng isang nakatutok na ahensya para pag-isahin ang disaster risk reduction, preparedness, response, at rehabilitation efforts. Sa mga ganitong sitwasyon, mahalaga ang koordinasyon, bilis ng aksyon, at pananagutan sa bawat yugto ng pagtugon.

Patuloy din nating isinusulong ang SBN 415, o ang proposed Rental Housing Subsidy Program. Layunin nito na makatulong sa mga pamilyang nawalan ng tahanan dahil sa kalamidad habang sila ay bumabangon, nag-aayos ng bahay, o naghihintay ng mas permanenteng tirahan.

Hindi rin natin dapat kalimutan ang mga disaster responders at frontliners. Sila ang unang sumusuong sa panganib para tumulong sa ating mga kababayan. Kaya ipaglalaban natin na maisabatas ang SBN 669, o ang Hazard Pay for Disaster Personnel bill, na naglalayong mabigyan ng hazard pay ang disaster responders sa panahon ng kalamidad.

Kasama rin sa mga panukalang aking itinutulak ang SBN 666, o ang New Building Code bill, na layuning i-update ang ating construction standards para mas mapalakas ang kaligtasan at resilience ng mga gusali at imprastruktura sa bansa.

Napakahalaga ng paghahanda dahil sa bawat kalamidad, buhay ang nakataya. Tandaan po natin na ang mga bahay at gamit na nasira ay naaayos o nabibili, ngunit ang ating buhay ay hindi. A lost life is a lost life forever, kaya’t magtulungan po tayo at gawing prayoridad ang kaligtasa ng bawat isa.

Samantala, kahit holiday noong May 26, binisita natin ang mga biktima ng sunog mula sa Barangay 132, Caloocan City at nagbigay ng agarang tulong. Nakasama natin sina Mayor Along Malapitan at Barangay Captain Rey Mariano.

Sa Cabuyao City, Laguna, personal tayong nakipag-ugnayan sa lokal na pamahalaan sa pangunguna ni Governor Sol Aragones upang magpaabot ng tulong sa 2,743 women beneficiaries noong May 28. Kinikilala rin natin ang mahalagang papel ng kababaihan sa pagpapatatag ng pamilya, pag-angat ng komunidad, at pag-ambag sa pag-unlad ng ating bansa sa pamamagitan ng kanilang sipag, katatagan, at dedikasyon.

Noong May 29, bumisita rin tayo sa Parañaque City upang magbigay ng tulong sa 1,094 pamilyang naapektuhan ng sunog sa Barangay San Antonio, sa pakikipag-ugnayan kina Barangay Captain Pol Casale at Councilor Binky Favis.

Nitong June 3, bumisita rin tayo sa Brgy. Baseco, Manila, upang mamahagi rin ng tulong sa mga 87 na pamilyang nasunugan. Katuwang natin sila Councilor Charry Ortega at Barangay Chairwoman Diane Espinosa.

Samantala, noong nakaraang linggo, nagpaabot din ng tulong ang ating team sa mga kababayang nangangailangan habang inalalayan nila ang mga biktima ng sunog sa Pasay City, Quezon City, Zamboanga City, Caloocan City at Davao City.

Tinulungan din ang mga biktima ng sunog mula sa Muntinlupa City at Taguig City na patuloy na bumabangon, at nakatanggap din sila ng karagdagang tulong mula sa gobyerno upang muling maitayo ang kanilang mga tahanan.

Nakibahagi rin ang ating team sa pagpupulong ng Vice Mayors' League - Bukidnon Chapter, kung saan ipinaabot natin ang patuloy na suporta sa mga lokal na opisyal na may mahalagang papel sa paglalapit ng serbisyo ng gobyerno sa kanilang mga nasasakupan.

Patuloy kong susuportahan ang mga programang ito dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Palakasin ang Pilipino sa larangan ng sports

ni Bong Go @Bisyo Magserbisyo | May 28, 2026

Sa bawat pagkakataon na may makakatulong sa pagpapalakas ng ating national sports program, tulad na lang ng basketball na mahal na mahal ng mga Pilipino, naipaparamdam natin ang malawak na suporta sa ating mga atleta at kabataan.

Kaya ikinagagalak ko ang pagsasabatas ng Republic Act No. 12318 na nagkaloob ng Philippine citizenship kay Maodo “Malick” Diouf, at Republic Act No. 12319 para naman kay Elizabeth Jeanette Means. Dahil sa mga batas na ito, pormal na nating ibinibigay sa dalawang atleta ang pagkakataong maging bahagi ng bansa sa pamamagitan ng sports.

Ako po ay isa sa mga authors at co-sponsor ng dalawang batas na ito. Bilang Chairman ng Senate Committee on Sports, naniniwala ako na kung may atleta na may kakayahan, disiplina, at pusong maglaro para sa Pilipinas, dapat nating bigyan ng pagkakataon na makatulong sa ating national team.

Para sa akin, basta makakatulong sa ating bansa at sa ating mga atleta, dapat nating suportahan. Ang mahalaga, puso ang dala sa paglalaro para sa Pilipinas.

Si Diouf ay isang Senegal-born center na dating naglaro para sa University of the Philippines (UP) Fighting Maroons. Naging bahagi siya ng koponan nang magkampeon ang UP sa University in Athletic Association of the Philippines (UAAP) men's basketball noong 2022. Siya rin ay tinitingnan para sa ating 3x3 basketball program.

Si Means naman ay isang American forward na dating naglaro para sa Westminster University at inaasahang magiging bahagi ng pool ng Gilas Pilipinas Women. Sa tulong ng kanilang talento at karanasan, mas mapapalawak pa ang pagpipilian ng ating mga sports officials para sa mga susunod na international competition, alinsunod pa rin sa umiiral na rules at selection process.

Sa tulong ng kapwa kong mga mambabatas at ng buong sports community, sisikapin natin ang tuluy-tuloy na pagpapalakas sa grassroots sports hanggang sa national level. Patuloy kong isusulong ang mga programa at panukalang magbibigay ng mas maraming oportunidad sa ating kabataan at atleta.

Isa rin sa mga patuloy nating isinusulong ay ang pagpapalawak ng National Academy of Sports (NAS), na naitatag sa ilalim ng Republic Act No. 11470, na aking inakda at co-sponsored. Sa pamamagitan ng Senate Bill No. 171, o ang panukalang National Academy of Sports Regional Expansion Act of 2025, layunin nating magkaroon ng mga regional NAS campuses sa iba’t ibang bahagi ng bansa, lalo na sa Visayas at Mindanao, upang mas maraming kabataang atleta ang mabigyan ng dekalidad na edukasyon, full scholarship, at mas maayos na training habang hinuhubog ang kanilang talento sa sports.

Bilang isa ring atleta, naniniwala ako na kung magtutulungan ang lahat ng sektor sa pagsuporta sa ating national athletes, kayang-kaya nilang mag-uwi ng maraming medalya mula sa iba’t ibang international competitions. Pangarap ko po na muling maitanghal ang Pilipinas bilang sports powerhouse sa buong Asya. Kaya ngayon pa lang, ang payo ko sa ating mga kabataan: Get into sports, stay away from drugs, to keep us healthy and fit!

Samantala, noong May 21, nagpaabot din tayo ng tulong sa 71 pamilyang naapektuhan ng sunog sa Barangay Putatan, Muntinlupa City. Kinilala rin natin ang mga lokal na opisyal, lalo na sina Vice Mayor Stephanie Teves, Barangay Putatan Captain Gerry Teves, at Barangay Alabang Captain Tintin Abas-Ding. 

Bukod dito, noong nakaraang linggo, nakiisa tayo sa 37th Regional Emergency Assistance Communication Team (REACT) National Convention sa San Jose Resort sa Davao City. Mahalaga ang ganitong pagtitipon dahil 

Sa mabilis na komunikasyon, maayos na koordinasyon, at kahandaan sa oras ng sakuna ay malaking bahagi ng pagliligtas ng buhay at pagtulong sa ating mga kababayan.

Tinulungan din ng ating team ang mga kababayan nating nangangailangan, kabilang ang mga biktima ng sunog sa Valenzuela City; Sara, Iloilo; Cebu City; Zamboanga City; Cagayan de Oro City; at Caloocan City.

Nakatanggap din ng tulong mula sa ating team ang mga biktima ng sunog sa Biñan City, Laguna; at Brgy. Putatan, Muntinlupa City, gayundin ng karagdagang assistance mula sa pamahalaan para sa pagbili ng construction materials na magagamit sa muling pagpapatayo ng kanilang mga tahanan.

Samantala, dinaluhan din ng ating team ang inauguration ng Super Health Center sa Lavezares, Northern Samar. Namahagi rin tayo ng grocery packs sa mga barangay health workers sa lugar. Patuloy nating isinusulong ang pagpapalakas ng primary healthcare sa mga komunidad upang mas mailapit sa ating mga kababayan ang serbisyong medikal na kailangan nila.

Bilang Mr. Malasakit, patuloy akong magseserbisyo sa sambayanang Pilipino dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.