Tuloy ang laban para sa mas maaasahang PhilHealth benefits para sa lahat

ni Bong Go @Bisyo Magserbisyo | Nov. 9, 2024

Sa kabila ng mga ipinangakong reporma, hindi natin tinitigilan ang pagtutok sa PhilHealth lalo pa ngayong may bilyun-bilyong pisong pondo ito na hindi pa napapakinabangan ng taumbayan.

Sa deliberasyon para sa panukalang 2025 national budget noong Huwebes, mismong ang Department of Finance ang nagsabi na “natutulog” ngayon ang natitirang P30 bilyong sobrang pondo ng PhilHealth na balak ibalik sa National Treasury pero pinigilan ng Supreme Court. Binigyang-diin natin bilang chairman ng Senate Committee on Health at Vice Chairperson ng Senate Finance Committee na dapat mapakinabangan ng mga Pilipino ang bawat pisong pondo ng gobyerno.

Sulit kahit papaano ang ating pangungulit dahil naglabas ng temporary restraining order ang Korte Suprema laban sa patuloy na fund transfer mula PhilHealth papunta sa National Treasury para magamit sa ibang mga bagay. Nanindigan tayo na ang pera ng PhilHealth ay dapat para sa health!

Naiintindihan natin na kailangan ng finance managers ng gobyerno ang lahat ng malilikom na pondo upang magamit nang tama at hindi masayang ang pera ng taumbayan. Ngunit para sa akin, legal man ito, pero morally ay hindi ito katanggap-tanggap! Dapat sa PhilHealth pa lamang ay hindi na natutulog ang kanilang pondo para hindi ito mawalis papuntang National Treasury lalo na’t napakaraming mga Pilipino ang naghihingalo at nangangailangan ng tulong pampagamot.

Sa mga nagdaang pagdinig, marami rin tayong nadiskubreng polisiya ng PhilHealth na anti-poor gaya ng Single Period of Confinement policy na bawal mag-admit sa magkatulad na sakit sa loob ng tatlong buwan. Dahil hindi natin sila tinigilan, tuluyan nang ipinatigil ng PhilHealth ang polisiyang ito.

Naibunyag din natin ang 24-Hour Confinement Rule kung saan kailangang magpa-admit muna ang isang pasyente sa loob ng isang araw bago siya i-cover ng PhilHealth. Nangako naman ang PhilHealth na bago matapos ang taon ay rerepasuhin nila ang polisiyang ito at magkakaroon na sila ng mga package para sa outpatients o mga pasyenteng hindi kailangang i-admit sa ospital.

Umasa kayo na hindi ko titigilan ang PhilHealth hangga’t hindi nila natutupad ang iba pa nilang commitments sa mga Pilipino tulad ng kanilang pangako na taasan ang case rates; palawakin ang benefit packages; babaan ang premium contribution; i-cover ang dental, visual, emergency, out-patient at preventive care; magbigay ng libreng gamot, libreng salamin at wheelchair para sa mahihirap na Pilipino, at iba pa.

Nais kong iparating ang pasasalamat sa aking mga kasamahan sa Senado na sinusuportahan ang ating adhikain na maproteksyunan ang kalusugan ng ating mga kababayan. Hindi naman tayo tumitigil sa paghahatid ng serbisyo at sa iba pa nating mga gawain sa loob at labas ng Senado.

Nakiisa tayo sa ginanap na Liga ng mga Barangay Antique Chapter Provincial Congress sa Bacolod City sa pamamagitan ng video call noong November 6. Binisita rin natin ang ating mga kababayan sa Bulacan at personal na pinangunahan ang pamamahagi ng tulong sa 1,500 mahihirap na residente ng Angat. Sa ating inisyatiba at pakikipagtuwang kay Mayor Jowar Bautista, nakatanggap din ang mga benepisyaryo ng tulong pinansyal. Dumalo rin tayo sa reunion dinner para sa ika-108 anibersaryo ng Senado na pinangunahan ni Senate President Chiz Escudero.

Nasa Catanduanes tayo noong November 7 at pinangunahan ang pagbibigay ng tulong sa 1,500 mahihirap na residente sa Virac, na may natanggap ding 25 kilo ng bigas sa ating pakikipagtuwang kay Gov. Joseph Cua. Binisita rin natin ang Malasakit Center sa Eastern Bicol Medical Center, at namigay ng lugaw sa mga pasyente, watchers at kanilang mga kasama, maging sa healthcare workers ng ospital.

Sa araw ding iyon, sinaksihan ng aking opisina ang inagurasyon ng itinayong Super Health Center sa Panganiban, Catanduanes kung saan nagbigay din kami ng suporta tulad ng foodpacks sa mga BHWs na nandoon. Tayo rin ay nagpapasalamat dahil kinilala tayong adopted son ng bayan.

Kahapon, November 8, isinagawa naman ang groundbreaking ng itatayong kalsada sa Brgy. San Roque, Madrid, Surigao del Sur na ating isinulong kasama si Mayor Juan Paolo Lopez.

Tuluy-tuloy din ang aking Malasakit Team sa paghahatid ng tulong sa ating mga kababayan tulad ng dalawang biktima ng sunog sa Davao City; gayundin ang 54 sa Iloilo City; at 14 sa Tigbauan, Iloilo.

Nabigyan din ng tulong ang 300 residente ng Sebaste, Antique sa ikinasang medical and dental mission katuwang si Vice Gov. Ed Denosta.

Namahagi tayo ng relief goods para sa mga binagyo sa Camarines Norte, Catanduanes, Cagayan, at sa Banate, Iloilo.

Natulungan natin ang 323 kapos ang kita sa Sto. Tomas, Davao del Norte katuwang si Mayor Roland Dejesica. Tulong pangkabuhayan naman ang naipagkaloob natin sa 23 mahihirap sa Quezon City katuwang si Coun. Mikey Belmonte.

Binalikan natin at muling tinulungan ang 96 na nawalan ng tirahan sanhi ng sunog sa Iloilo City na nabigyan pa ng emergency housing allowance ng NHA na ating isinulong para may pambili ang mga benepisyaryo ng materyales sa pagpapatayong muli ng kanilang tahanan. Bukod d’yan ay may 34 pamilyang nasunugan sa Zamboanga City ang ating natulungan.  

Naalalayan din ang 96 biktima ng kalamidad sa San Andres, Romblon, na sa ating pakikipagtuwang sa DHSUD ay nakatanggap ng tulong pinansyal na pampaayos ng bahay.

Sa pakikipagkapit-bisig sa DOLE ay nabigyan ng pansamantalang trabaho ang mga displaced workers, na dagdag sa tulong na ating ipinamahagi sa 584 manggagawa sa Banaybanay, Davao Oriental katuwang si Mayor Ian Larcia; 118 sa San Pablo City, Laguna kaagapay si VG Karen Agapay; 50 sa Nasugbu, Batangas kasama si BM Armie Bausas; 98 sa Paniqui, Tarlac katuwang ang Market Vendors President na si Renato Fernandez; 920 sa San Enrique, Iloilo katuwang si Mayor Trixie Fernandez; 98 sa Culion, Palawan kaagapay si Mayor Virginia De Vera; at 500 sa Alabel, Sarangani kasama si Mayor Vic Paul Salarda.

Nakabenepisyo rin sa Misamis Oriental ang 132 sa Initao kaagapay sina Mayor Mercy Grace Acain at BM Pangky Acain; at 277 sa Gitagum, Alubijid at Tagoloan katuwang sina Mayor Emmanuel Mugot, Mayor Emmanuel Jamis, at Mayor Nadia Emano-Elipe; at 283 pa sa Lugait, Manticao at Naawan katuwang sina Mayor Wellie Lim, Mayor Stephen Tan, at Mayor Dennis Roa.

Hindi ko sasayangin ang pagkakataon na ibinigay ninyo sa akin na makapaglingkod sa inyo. Buong tapang at pagmamalasakit kong ipaglalaban ang tama at tutulong ako sa abot ng aking makakaya, dahil bisyo ko na ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Proteksyunan ang kapakanan at dignidad ng mga biktima ng kalamidad

ni Bong Go @Bisyo Magserbisyo | Nov. 6, 2024

Sa pag-iikot ko sa mga lugar na nasalanta ng mga sakuna at kalamidad, palagi kong nakikita ang kawawang kalagayan ng mga kababayan nating evacuees. Nawalan na nga sila ng tirahan at kabuhayan, wala pa silang maayos na matuluyan. 

Kalimitan ang mga ginagamit na pansamantalang matitirhan ay mga eskwelahan, covered court, o kaya’y multi-purpose hall na madalas ay walang supply ng malinis na tubig na inumin, siksikan ang mga palikuran, maruming paligid at hindi komportableng matutulugan.

Dagdag pa rito ang kakulangan ng supply ng gamot para sa mga dinadapuan ng karaniwang sakit gaya ng sipon, ubo, pagkasira ng tiyan at allergies sa balat. Apektado rin ang schedule ng mga klase kung naka-evacuate pa sa mga paaralan ang mga biktima ng kalamidad.

Ito ang ilan sa mga dahilan kaya isinulong natin ang Senate Bill No. 2451 o ang Ligtas Pinoy Centers bill na base sa aking naunang nai-file na Mandatory Evacuation Centers Bill. Layunin ng panukalang batas na ito na magtatag ng permanenteng mandatory evacuation center sa bawat lokalidad sa buong bansa. 

Dahil naipasa na ng Senado at Mababang Kapulungan ang panukalang ito na tayo ang principal author at co-sponsor, umaasa tayong maging ganap na batas na ito kapag pinirmahan ng Pangulo. 

Palagi kong binibigyang-diin ang pagiging vulnerable ng ating bansa laban sa mga natural na kalamidad. Sa loob ng isang taon, mahigit sa 20 bagyo ang dumaraan sa Pilipinas, pinakamarami sa lahat ng bansa sa Southeast Asia. Nito lamang pananalasa ng Bagyong Kristine at Leon, iniulat ng National Disaster Risk Reduction and Management Council (NDRRMC) noong November 4 na mahigit walong milyong kababayan natin ang naapektuhan. Mahigit 600,000 na mga Pilipino ang nawalan ng tirahan. 

Masakit makitang ang pinaghirapan sa loob ng mahabang panahon ay naglahong parang bula. Mas masakit lalo na kung may nasawi. At sa tuwing may kalamidad, laging ang mga mahihirap nating kababayan ang pinakaapektado. Panahon na para hindi lang tiyakin ang kaligtasan at seguridad ng ating mga evacuee, kundi iangat din ang kanilang dignidad. Dumaraan na nga sila sa krisis, ang mga naghihirap ay dapat huwag nang mas pahirapan pa.

Sa ating patuloy na pagsulong para sa mas epektibong pagtugon sa mga kalamidad, isinusulong din natin ang SBN 188, na naglalayong magtatag ng Department of Disaster Resilience (DDR). Nais nating mapalakas ang ating kakayahan sa disaster risk reduction, paghahanda, pagtugon sa emergencies, at mabilis na pagbangon pagkatapos ng mga kalamidad. 

Kung maisasabatas ito, magkakaroon ng departamentong may cabinet secretary level na timon na nakatutok sa sitwasyon at hindi lang coordinating council o task force. Sa pamamagitan nito, umaasa tayong maiibsan ang epekto ng mga kalamidad, mas maraming buhay ang maaaring mailigtas, at mas mabilis na maibabalik sa normal na pamumuhay ang mga biktima ng sakuna. 

Ang serbisyo at malasakit sa mga Pilipino ay hindi lamang dapat sa pamamagitan ng pagbibigay ng agarang tulong. Magtulungan tayo para maging mas matibay at mas handa ang sambayanan sa anumang paparating pa na sakuna. 

Samantala, dumalo tayo kahapon, November 5, sa ginanap na Philippine Board Members League of the Philippines 32nd National Convention sa Maynila sa paanyaya ni PBMLP President BM Ramon Vicente Bautista. Sa araw ding iyon, sinaksihan ng aking opisina ang turnover ceremony ng Super Health Center sa Kananga, Leyte kasama si Mayor Matt Torres. 

Patuloy din ang aking Malasakit Team sa paghahatid ng tulong sa ating mga kababayan tulad ng 189 na naging biktima ng sunog sa Cebu City; at 53 sa Puerto Princesa City. Namahagi rin tayo ng ilang relief goods sa mga naging biktima ng pagbaha sa Albay, Camarines Sur, Pampanga at Batangas.

Nagkaloob din tayo ng tulong sa 297 residente ng Tagum City, Davao del Norte na kapos ang kita katuwang si Mayor Rey Uy. 

Sa pakikipagkapit-bisig sa DOLE na nagbigay ng pansamantalang trabaho sa mga nawalan ng hanapbuhay ay natulungan din natin ang 268 residente ng Lingig, Surigao del Sur kaagapay si Mayor Elmer Evangelio.

Bilang inyong Mr. Malasakit, sa abot ng aking makakaya ay tutulong tayo sa mga Pilipinong nangangailangan. Bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Isang ligtas at mapayapang paggunita sa Undas

ni Bong Go @Bisyo Magserbisyo | Nov. 2, 2024

Tuwing sasapit ang Undas na isa sa mahalagang okasyon ng maraming mga Pilipino, nagkakaroon tayo ng pagkakataon na pansamantalang makapagpahinga sa ating mga gawain, makapiling ang ating pamilya at maisagawa ang tunay na layunin ng tradisyon na ito — ang makapagdasal at mabisita ang puntod ng mga pumanaw nating mahal sa buhay.

Bukod dito, marami sa atin ang nagsasakripisyong umuwi ng probinsya para samantalahin din ang pagkakataong makasama ang mga kamag-anak na matagal nang hindi nakikita, mabisita ang mga kaibigan, at makapag-“recharge” bago sumabak muli sa ating mga hanapbuhay.

Anuman ang ating relihiyon o paniniwala, ngayong All Saints’ Day, ang pinakaimportante ay ang paghingi ng gabay mula sa mga santo at martir na nagsisilbing inspirasyon sa ating pananampalataya. Isapuso natin ang mga aral ng kabutihan at serbisyo na diwa ng okasyong ito. Tularan natin ang mga santo at martir bilang mga ehemplo ng pagseserbisyo at pagmamalasakit sa kapwa. Sa atin namang paggunita sa alaala ng ating mga yumao sa All Souls’ Day, gawin din nating maayos at mapayapa ang pagdiriwang bilang respeto sa sagradong okasyon.

Bilang chairperson ng Senate Committee on Health, paalala ko sa bawat isa na ingatan ang ating mga sarili habang nasa biyahe at pahalagahan ang maayos na kalusugan. Tandaan natin na ang kalusugan ay katumbas ng buhay ng bawat Pilipino.

Higit sa lahat, huwag nating kalimutan ang tunay na diwa ng mga okasyong ito kung kailan ipinapamalas natin ang ating pagmamahal at pagmamalasakit sa ating kapwa habang pinahahalagahan ang ating pananampalataya. Kaya tuluy-tuloy naman tayo sa paghahatid ng serbisyo sa abot ng ating makakaya dahil ako’y naniniwala na ang serbisyo sa tao ay serbisyo sa Diyos.

Noong October 30, namahagi tayo ng dagdag na suporta para sa 23 kooperatiba na ikalawang batch mula sa NCR na nakabenepisyo sa ‘Malasakit sa Kooperatiba’ na programang ating isinulong kasama ang Cooperative Development Authority. Kaakibat natin ang mga kooperatiba tungo sa pag-unlad kaya bilang supportive legislator awardee sa ginanap na CDA Gawad Parangal 2024 noong nakaraang araw, patuloy kong susuportahan ang mga inisyatibang tulad nito.

Dumalo rin tayo sa Rising Tigers Charity Ball sa Makati City, kung saan pinarangalan tayo bilang isa sa mga Public Servants of the Year at natatanging senador na binigyan ng parangal. May award man o wala, patuloy akong magseserbisyo sa inyo sa abot ng aking makakaya dahil iyan na ang aking bisyo — ang magserbisyo!

Namahagi naman ang aking Malasakit Team ng tulong para sa 118 na nawalan ng tirahan sanhi ng kalamidad sa Brgy. Lapasan, Cagayan de Oro City. Binalikan naman natin at muling pinagkalooban ng tulong ang tatlong residenteng nawalan ng tirahan sa Tolosa, Leyte. Ang mga pamilya ay nakatanggap ng emergency housing allowance mula sa National Housing Authority sa ilalim ng programang ating isinulong para may pambili sila ng materyales sa kanilang nasirang tahanan.

Nabigyan natin ng tulong ang 45 residenteng naging biktima ng sunog sa Butuan City, Agusan del Norte. Namahagi rin tayo ng relief goods at iba pang tulong para sa mga naging biktima ng Bagyong Kristine lalo na sa Sorsogon, Albay, Catanduanes at Camarines Sur.

Natulungan din ang 400 mahihirap na residente ng Biñan City, Laguna katuwang ang kanilang Sangguniang Panlungsod at Sangguniang Panlalawigan ng Laguna.

Nagbigay din tayo ng tulong sa 56 residente ng Cagayan de Oro City na nawalan ng hanapbuhay, na sa ating pakikipagkapit-bisig sa DOLE ay nabigyan din ng pansamantalang trabaho.

Ngayong Undas — at kahit anumang okasyon o araw — sana ay maging halimbawa tayong lahat kung ano ang tunay na pagmamalasakit at pagseserbisyo sa kapwa. Patuloy tayong magdasal at isama natin sa ating mga panalangin ang mabilis na pagbangon ng ating mga kababayan na nasalanta ng mga nagdaang kalamidad.

Mga kababayan, minsan lang tayo daraan sa mundong ito. Kung anumang kabutihan o tulong na puwede nating gawin sa ating kapwa ay gawin na natin ngayon dahil hindi na tayo babalik sa mundong ito. Patuloy akong magseserbisyo sa inyo dahil bisyo ko ang magserbisyo at ako ay naniniwala na ang serbisyo sa tao ay serbisyo ‘yan sa Panginoon!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.