Lechon, binatikos... Bday ni P-Duterte, simple lang - Sen. Go

ni Mary Gutierrez Almirañez | March 29, 2021

Dinepensahan ni Senator Bong Go ang mga bumabatikos sa kumakalat na larawan ni Pangulong Rodrigo Duterte mula sa idinaos nitong ika-76 na kaarawan sa Davao kasama ang mga kamag-anak nitong Linggo, Marso 28.

Matatandaang unang lumabas sa social media ang larawan ng Pangulo habang hinihipan ang kandilang nakatusok sa nakaumbok na kanin. Kasunod nitong kumalat ang video kung saan makikita na hindi lamang iyon ang nakahain sa lamesa ng Pangulo kundi mayroong lechon at iba pa.

Batay sa ilang kritiko, huwag nang magpanggap na mahirap sapagkat insulto iyon sa totoong naghihirap.

Ayon pa sa tweet ni Bayan Muna Representative Ferdinand Gaite, "Acting poor for your birthday photo ops when you're not really poor is just mocking those who truly have nothing to put on their tables for their own birthdays.”

Giit naman ni Senator Go, “Simple lunch lang naman talaga. Sila-sila lang pamilya sa munting tahanan niya sa Davao. Ganu'n naman mag-birthday si PRRD. Wala pa ngang bihis. Presidente 'yan. Ayaw n'yo bang pakainin man lang ng pagkain na kinakain naman ng ordinaryong Pilipino kahit saan... Kahit man lang sa kaarawan niya? Sa mga bumabatikos kay Pangulo, tingin kayo sa salamin. Mas cute pa ang lechon sa inyo. Per PRRD, labinglimang apo at kasambahay ang kumain. Ano palang ipapakain niya?”

Sagot pa ni Presidential Spokesperson Harry Roque, “Tingin ko naman, utak talangka lang po 'yan. Birthday naman po ng Presidente, 76th. Ang importante, hindi po magarbo ang selebrasyon. Hindi naman sinasabi ni Presidente na kahit kailan na siya ay nagugutom.”

Sa ngayon ay burado na ang kumalat na video.

Inaasahan namang babalik sa Maynila ngayong araw si Pangulong Duterte upang salubungin ang pagdating ng 1 million doses ng Sinovac COVID-19 vaccines mula sa China.

Naipangako na, pero… Pondo para sa bagong ayuda, wala pa

ni Mary Gutierrez Almirañez | March 28, 2021

Kinausap na ni Senator Lawrence Bong Go ang gabinete upang magkaroon ng expanded Social Amelioration Program (SAP) habang nasa ilalim ng enhanced community quarantine (ECQ) ang NCR Plus Bubble.

Sa kanyang privilege speech bilang Chairman of the Committee on Health ng Senado, aniya, “Nakausap ko po kahapon si Secretary Dominguez. Hindi ko po tinitigilan pati si Secretary Avisado. Sabi ko, maghanap kayo ng pagkukunan, kung maaari, walisin n’yo kung ano ang puwedeng walisin.”

Umapela umano siya ng dagdag na ayuda kina Pangulong Rodrigo Duterte, Finance Secretary Carlos Dominguez, Budget Secretary Wendel Avisado at iba pang kaugnay na ahensiya ng gobyerno bilang pag-aalala sa mga maaapektuhang kabuhayan sa ilalim ng ECQ.

Dagdag pa niya, “Alam n’yo sa ayuda na ‘yan, alam na po ng DSWD ang kanilang trabaho. Wala na akong nakikitang rason na magkakandarapa sila sa distribusyon.” “Wala pong pulitika rito, ‘wag n’yong haluan ng pulitika. Marami na pong nasususpinde na mga kapitan na nagsasamantala,” paliwanag pa niya.

P500-M pondo para sa makararanas ng side effects ng COVID vaccine, oks na

ni Lolet Abania | February 27, 2021

Ganap nang batas ang COVID-19 Vaccination Program Act of 2021 matapos na pirmahan ni Pangulong Rodrigo Duterte upang maipatupad ang vaccination rollout laban sa COVID-19, ayon kay Senator Bong Go.

Nakapaloob sa batas ang P500-million indemnity fund na ilalaan para sa mga indibidwal na makararanas ng masamang epekto matapos na mabakunahan ng COVID-19 vaccine.

Ayon kay Presidential Spokesperson Harry Roque, agad nang maisasagawa ang pagbabakuna kontra-coronavirus dahil dito.

"We are confident that the signing of this landmark piece of legislation would expedite the procurement and administration of vaccines for the protection against COVID-19," ani Roque.

"Indeed, we remain committed in our fight against the coronavirus pandemic and we are using necessary means, such as the enactment of this Republic Act, certified urgent by the President, as a way to start our vaccine rollout," dagdag ng kalihim.

Sa ilalim ng batas, ang Department of Health (DOH) at ang National Task Force Against COVID-19 (NTF) ang otorisado na magsagawa ng negosasyon sa pagkuha ng COVID-19 vaccines kabilang na ang mga ancillary supplies at services para sa storage, transport at distribusyon ng bakuna.

Ang indemnity fund ay gagamitin para sa kompensasyon ng mga indibidwal na makararanas ng adverse effects matapos maturukan ng COVID-19 vaccine.