Sangkot sa ‘Ghost Receipts’ scam.. Kulong, tanggal-lisensya sa accountant

ni Mylene Alfonso | March 22, 2023

Namimiligrong makulong at mawalan ng lisensya ang Certified Public Accountant (CPA) na sangkot sa P25.5 bilyong “Ghost Receipts”.

Ito ang tiniyak ni Bureau of Internal Revenue Commissioner Romeo D.  Lumagui, Jr., matapos na pamunuan ang pagsasampa ng reklamong administratibo laban sa accountant na hindi muna pinangalanan sa Professional Regulation Commission (PRC) at kasong kriminal sa Department of Justice (DOJ) dahil sa paglabag sa CPA Code of Ethics.

“We have a list of all the buyers and sellers of these ghost receipts, including the accountants that allowed the buyers and sellers to profit from these ghost receipts by evading taxes. Businesses and taxpayers who use these ghost receipts in their returns will not only be audited by the BIR, they will also be arrested and spend 6-10 years in prison,” ayon kay Lumagui.

Ang naturang accountant ay ikinukonsidera na “conspirator” sa Ghost Receipts scam kung saan ineksamin nito at ini-audit ang book of accounts ng mga kumpanya.

Una nang nagsampa ng kasong paglabag sa National Internal Revenue Code of 1997, as amended (Tax Code) noong Marso 16, 2023 laban sa apat na korporasyon sa

Department of Justice (DOJ) dahilan para mawalan ng may P25.5 bilyon buwis, ang gobyerno.

Kinilala silang mga “ghost corporation” dahil wala silang lehitimong business activity at inestablisa lamang sila para makapagbenta ng mga pekeng sales invoice sa kanilang mga buyers na ginagamit para mabawasan ang bayarin nilang buwis.

De Leon sa NICA at Guillermo sa BIR, kabilang sa Marcos’ Cabinet

ni Lolet Abania | June 18, 2022

May napili na si President-elect Ferdinand “Bongbong” Marcos Jr. na mamumuno sa National Intelligence Coordinating Agency (NICA) at sa Bureau of Internal Revenue (BIR) sa ilalim ng kanyang administrasyon.

Ayon kay incoming Press Secretary Rose Beatrix Cruz-Angeles, in-appoint ni P-BBM si Lilia Guillermo bilang susunod na head ng BIR, kung saan siya rin ay naging dating deputy commissioner ng ahensiya.

Si Guillermo ay kasalukuyang assistant governor ng Bangko Sentral ng Pilipinas (BSP), at head ng technology and digital innovation unit habang nangangasiwa rin sa IT modernization plan ng central bank.

“Guillermo is cited for successfully implementing the Philippines Tax Computerization Project, which established a modern tax collection system for the BIR and the Bureau of Customs,” saad ni Angeles. Napili rin ni Marcos ang tax lawyer na si Romeo “Jun” Lumagui Jr. bilang incoming deputy commissioner ng ahensiya. Dati nang pinamunuan ni Lumagui ang regional investigation division ng Revenue Region No. 7B East NCR.

Samantala, napiling italaga ni P-BBM si retired Philippine National Police (PNP) Deputy Director General Ricardo de Leon bilang incoming NICA director-general upang pamunuan ang intelligence gathering ng bansa.

Nagsisilbi rin ang NICA bilang secretariat sa Anti-Terrorism Council ng bansa at one cluster ng anti-insurgency task force.

Si De Leon ay kasalukuyang pangulo ng Philippine Public Safety College, na siyang humahawak ng training ng mga police officer cadets, police rookies, fire at jail personnel.

Miyembro rin si De Leon ng Philippine Military Academy (PMA) Matatag Class of 1971. Noong 2004, sa ilalim ni dating Pangulo Gloria Macapagal-Arroyo, siya ay na-designate na commander ng Anti-Illegal Drugs Special Operations Task Force.

Sa Abril 18 pa rin... Deadline ng paghahain ng ITR – BIR

ni Lolet Abania | April 18, 2022

Hindi na magkakaroon ng extension para sa deadline ng paghahain ng mga annual income tax returns matapos na ito ay iniurong kasabay ng paggunita ng Semana Santa, batay sa Bureau of Internal Revenue (BIR).

Sa isang post sa kanilang socmed account ngayong Lunes, ayon sa BIR, wala nang ekstensiyon ang Abril 18, 2022 deadline para sa pagpa-file at pagbabayad ng mga tax para sa taong 2021, gayunman, ang mga taxpayers ay pinapayagan na i-amend ang kanilang mga returns hanggang Mayo 16, 2022 nang walang mga penalties o multa.

“Allowing taxpayers time to amend returns until next month is in a bid to alleviate the difficulties in bearing the deadline on a holiday and considering the challenges encountered in the hybrid working arrangement adapted by most taxpayers,” pahayag ng ahensiya.

Orihinal na itinakda ang deadline para sa paghahain ng returns noong Abril 15, subalit natapat ito nang Biyernes Santo, kung saan idineklara bilang regular holiday ng Malacañang.

Ang mga taxpayers ay maaaring mag-file at magbayad ng kanilang kaukulang taxes sa pamamagitan ng mga authorized agent banks (AABs) at revenue collection officers (RCOs), na puwede nilang piliing gawin ito ng cash o kaya in check.

Kapag mga checks, dapat na gawing ibayad sa BIR, mayroon o wala mang IFO name at TIN ng taxpayer na nakasulat sa check na dating inire-require. Gayundin, ang pangalan at ang branch ng AAB ay hindi na kailangang ilagay.

Para sa mga piniling gamitin ang electronic filing and payment system (eFPS), maaari nilang gawin din ito sa pamamagitan ng mga payment channels gaya ng GCash, PayMaya, at MyEG.

Nakasaad sa mandato ng BIR, “to assess and collect all national internal revenue taxes, fees, and charges, and enforce all forfeitures, penalties, and fines connected. This includes cases decided in its favor by the Court of Tax Appeals and ordinary courts.”