32 dayuhan sa ilegal na pasugalan, arestado

ni Lolet Abania | April 22, 2021

Timbog ang 32 dayuhan na nagtatrabaho umano sa isang illegal gambling company sa Pasay City.

Huli sa akto ng Bureau of Immigration (BI) ang 32 Korean, Chinese at Indonesian habang subsob ang mga ito sa kanila umanong online pasugalan.

Nabatid na walang mga working visa at pawang mga tourist visa lamang ang gamit ng mga naarestong dayuhan.

“Nakita po that there is illegal live studio gambling. Meron pong mga table talaga kung saan may gambling na nagaganap. Nagkaroon ng ilang araw na surveillance at noong na-determine na totoong merong mga illegal aliens na nagtatrabaho sa opisinang ito, nag-issue si Commissioner (Jaime) Morente ng isang mission order para ma-implement ang arrest sa mga illegal aliens,” ani BI Spokesperson Dana Sandoval.

Iniimbestigahan na ng mga awtoridad kung kailan pumasok sa bansa ang mga nahuling dayuhan.

36 banyaga, arestado sa illegal online gambling sa Pasay

ni Ronalyn Seminiano Reonico | April 20, 2021

Inaresto ng Bureau of Immigration (BI) ang 36 foreign nationals sa Pasay City noong Lunes nang hapon sa isinagawang raid sa illegal online gaming company.

Ayon kay BI Commissioner Jaime Morente, nagsagawa ng imbestigasyon ang ahensiya matapos makatanggap ng ulat ang intelligence division na may mga nagtatrabaho umanong foreigners na walang appropriate permits sa Double Dragon Tower 3, Pasay City.

Pahayag ni Morente, “We coordinated with PAGCOR and verified that this company is unlicensed and has no authority to operate.”

Ayon kay BI Intelligence Chief Fortunato Manahan, Jr., nagsasagawa ng illegal live studio gambling ang kumpanya kung saan ang karamihan sa mga operators at management nito ay mga Koreano.

Saad pa ni Manahan, “Apart from the live studio, they were also conducting illegal and clandestine online gaming operations.”

Tatlumpu’t anim sa mga banyaga ang nasa kustodiya na ng awtoridad dahil sa pagtatrabaho nang walang working visa at dokumento.

Saad pa ni Manahan, “We initially rounded up 40 individuals, but found 4 of them to be sufficiently documented, being permanent residents in the country.

“However, the other 36 were unable to present their passports and visas, and were caught in the act of working illegally.”

Dadalhin umano sa BI’s Warden Facility sa Bicutan, Taguig ang mga inaresto pagkatapos lumabas ang resulta ng kanilang RT-PCR test.

Panawagan din ni Morente sa mga banyaga, “We call on all foreigners to legalize your stay.

“Do not take advantage of the pandemic, because despite the challenges, our work never stops, and we will continue to arrest, deport, and blacklist any alien who dare disobey our laws.”

3 Pasahero galing sa bansang may travel ban, naharang, pinabalik

ni Lolet Abania | December 31, 2020

Naharang ng mga opisyal ng Bureau of Immigration (BI) ang tatlong pasahero na may travel history sa mga bansang ipinatutupad ng pamahalaan ang travel ban upang maiwasan ang pagkalat ng bagong COVID-19 na nanggaling sa United Kingdom. "Yesterday, may na-intercept po tayo. Kung 'di ako nagkakamali, nasa tatlo po 'yung na-intercept natin that came from these countries," ani BI spokesperson Dana Sandoval ngayong Huwebes. "They were turned back po, hindi po sila pinayagang pumasok ng Pilipinas. Excluded po natin sila," dagdag ni Sandoval.

Hindi naman binanggit ni Sandoval kung saang bansa na may travel ban nagpunta ang tatlong pasahero. Matatandaang agad na nagpatupad ng travel ban ang gobyerno sa mga pasaherong manggagaling sa 20 bansa na na-detect na mayroong bagong variant ng COVID-19 virus. Epektibo ang ban mula December 30, 2020 hanggang January 15, 2021 sa mga bansa tulad ng UK, Denmark, Ireland, Japan, Australia, Israel, The Netherlands, Hong Kong, Switzerland, France, Germany, Iceland, Italy, Lebanon, Singapore, Sweden, South Korea, South Africa, Canada at Spain. "Kung mayroon po silang travel history within the last 14 days dito po sa countries na ito, kahit hindi po sila doon directly nanggaling, hindi pa rin po natin papapasukin," ani Sandoval.

Inatasan din ang mga BI officers sa lahat ng airport sa bansa na magsagawa ng 100% passport inspection upang matiyak na ang mga travel histories ng mga darating na pasahero ay maayos at walang problema. Gayunman, ang mga Filipino na uuwi sa ‘Pinas na manggagaling sa 20 bansa na may travel ban ay papapasukin pa rin sa bansa.

"Kahit galing po sila doon sa 20 countries papayagan naman pong pumasok but they would be referred to the one-stop shop para strictly ma-implement 'yung 14-day quarantine," paliwanag ni Sandoval.

Naghihintay naman ang BI ng official order mula sa Inter-Agency Task Force for the Management of Emerging Infectious Diseases (IATF) kung idaragdag ang United States sa travel ban.

"We are on standby kung sakali po na makita ng IATF na kailangan pong i-expand itong travel restrictions po natin but we're ready to implement kung sakali pong makita nila na kailangan na po talagang i-expand ito," sabi ni Sandoval.