20 kabahayan natupok sa Davao City — BFP

ni Lolet Abania | January 15, 2022

Nasa tinatayang 20 kabahayan ang natupok matapos na sumiklab ang sunog sa Davao City ngayong Sabado ng umaga, ayon sa Bureau of Fire Protection.

Sa ulat ng Bucana Fire Station, gawa sa mga light materials ang marami sa mga bahay na nasunog habang mabilis na kumalat ang apoy.

Agad na isinara ang isang bahagi ng Bolton Bridge sa Barangay 76-A ng nasabing lungsod, bandang alas-9:30 ng umaga dahil sa sunog.

Batay sa mga lumabas na video mula sa mga netizens, kitang-kita ang makakapal at maiitim na usok na nanggagaling sa ilalim ng tulay habang malalaking apoy naman ang tumutupok sa mga kabahayan.

Alas-11:00 ng umaga, idineklarang fire-out ang sunog ng BFP.

Wala namang naitalang nasaktan matapos ang sunog, subalit ayon sa mga awtoridad nasa tinatayang 23 pamilya ang nawalan ng tirahan.

Ayon pa sa BFP, posibleng ang sanhi ng sunog ay faulty wiring mula sa tirahan ng isang residente ng nasabing barangay.

Gayunman, patuloy na inaalam ng mga awtoridad ang dahilan at pinagmulan ng sunog.

Sanggol, nadale rin 11-anyos patay sa sunog sa Taguig City

ni Lolet Abania | December 13, 2021

Patay ang 11-anyos na batang babae habang isang 8-buwan-gulang na sanggol ang nagtamo ng mga paso sa katawan matapos ang sunog sa Taguig City, ayon sa Bureau of Fire Protection-National Capital Region (BFP-NCR) ngayong Lunes.

Ayon sa spot report ng BFP, sumiklab ang sunog sa isang residential area sa J. Ramos Street Barangay Ibayo Tipas bandang tanghali ngayong Lunes. Itinaas sa unang alarma ang sunog at tumagal ito ng halos isang oras.

Umabot naman sa 23 trak ng bumbero ang dumating na tuluyang naapula ang apoy bandang alas-12:55 ng hapon, ayon pa sa report ng BFP.

Hindi naman binanggit sa report ang pangalan ng 11-anyos na batang babae na namatay sa sunog, habang ang 8-buwan-gulang na sanggol ay nagtamo ng 1st at 2nd degree burns sa pareho niyang itaas at ibabang extremities.

Ayon pa sa BFP nasa tinatayang P150,000 halaga ng ari-ari ang napinsala matapos ang sunog habang 10 pamilya ang apektado. Patuloy naman ang BFP sa pag-iimbestiga sa naging dahilan at pinagmulan ng sunog.

1 taong gulang, patay sa sunog sa Parañaque

ni Jasmin Joy Evangelista | October 3, 2021

Patay ang isang bata sa sunog sa residential area sa Barangay Sun Valley, Parañaque City, hapon ng Sabado.

Ayon sa Bureau of Fire Protection (BFP), hindi na nakitang buhay ang 1 taong gulang na biktima.

Inaalam na raw ng mga imbestigador kung paano nasawi ang bata at nasaan ang mga magulang nito nang sumiklab ang sunog.

Tinatayang nasa 100 tao ang nawalan ng bahay sa sunog na umabot ng unang alarma at 13 kabahayan ang nadamay na karamiha'y gawa sa kahoy o light materials kaya mabilis kumalat ang apoy.

Ayon sa BFP, nag-umpisa ang sunog sa ikalawang palapag ng isang bahay pero hindi pa matukoy kung paano ito nagsimula.

Ayon sa Parañaque Health Management Service, nagbigay sila ng paunang serbisyo medikal sa mga apektadong residente, na inilipat muna sa mga modular tent at sa isang chapel sa lugar.

Nasa P100,000 ang inisyal na halaga ng ari-ariang natupok sa sunog.