30 pamilya, nasunugan sa Tondo!

ni Zel Fernandez | April 19, 2022

Nasunog ang 10 bahay sa Brgy. 129 Zone 2 Tondo, Maynila kagabi kung saan 30 pamilya ang sinasabing naapektuhan.

Pawang gawa sa mga light materials ang mga kabahayan kaya madaling lumaganap ang apoy.

“Nanood ako ng TV, nandu’n ‘yung asawa ko, ngayon sabi ng asawa ko, ‘Pa, parang may naaamoy kaming nag-iinsenso saka amoy nagsusunog lang… eh, hindi na, ‘di ko naman pinansin dahil tumawag sa ‘kin, eh. Mayamaya, may sumigaw na, isang babae rito, may sunog nga ro’n,” pahayag ni Wilfredo Cano, residenteng tumalon mula sa bintana dahil sa bilis ng pagkalat ng sunog.

Hinihinalang napabayaang kandila ang sanhi ng apoy. Tinatayang aabot sa 100 libo ang halaga ng pinsala. Maliban sa fire volunteer na nabalian sa kamay, wala ng ibang nasaktan o nasawi sa sunog.

Umabot sa ikalawang alarma ang sunog na nagsimula bandang alas-9 ng gabi at naapula bandang hatinggabi.

Pizza parlor sumabog, street sweeper, nadale

ni Lolet Abania | March 28, 2022

Isang street sweeper ang nasugatan matapos ang pagsabog ng isang pizza parlor sa Quezon City, ngayong Lunes ng madaling-araw.

Ayon sa Bureau of Fire Protection (BFP), pasado alas-4:00 ng madaling-araw naganap ang pagsabog sa naturang pizza parlor sa Visayas Avenue, Quezon City, kung saan umabot sa unang alarma ang sunog, subalit agad ding naapula ang apoy bandang alas-5:00 ng madaling-araw.

Kinilala ang biktima na si Sophia Rafa, street sweeper, na bahagyang nasunog ang suot niyang face mask habang agad siyang binigyan ng paunang lunas na nagtamo ng first degree burns sa kanyang mukha.

“Nagwawalis ako kanina, madilim pa. Tapos pagtapat ko dito may biglang sumabog. Kaya ‘yung face mask ko, ayan, nasunog. Nasa mukha ko ito kanina,” salaysay ng biktima.

Bukod sa pizza parlor, nadamay din ang ilang kabahayan na nasa likod lamang ng naturang restaurant .

Patuloy ang imbestigasyon ng mga awtoridad sa sanhi at pinagmulan ng sunog. Gayundin, inaalam pa ang halaga ng mga ari-arian na napinsala matapos ang sunog.

Mag-ina na-trap sa sunog, patay

ni Lolet Abania | February 9, 2022

Patay ang mag-ina matapos na ma-trap sa nasusunog nilang bahay sa Quezon City, ngayong Miyerkules ng madaling-araw.

Ayon sa Bureau of Fire Protection (BFP), sumiklab ang sunog bandang alas-5:00 ng madaling-araw sa unang palapag ng bahay ng mga biktima sa 11th St. corner Victoria St., Barangay Mariana, Quezon City.

Hindi na nakalabas ng kuwarto na nasa ikalawang palapag ng bahay ang 67-anyos na nanay at 42-anyos na anak niyang babae.

Nakaligtas naman ang kasambahay ng mga biktima nang makalabas ito mula sa nasusunog na bahay.

Natupok din ang dalawang nakaparadang sasakyan ng mga ito. Itinaas naman sa unang alarma ang sunog habang naapula ang apoy ng alas-6:20 ng umaga, ayon pa sa BFP.

Patuloy na inaalam ng BFP ang dahilan at halaga ng pinsala matapos ang sunog.