2 todas, 1 nawawala sa gumuhong istraktura sa Bulacan

ni Lolet Abania | June 1, 2022

Dalawang bangkay ang narekober habang isa ang nawawala matapos na isang bahagi ng establisimyento ang gumuho sa Meycauayan, Bulacan, ayon sa Bureau of Fire Protection (BFP) ngayong Miyerkules.

Sa isang Facebook post, sinabi ng BFP Central Luzon na tinatayang nasa apat na katao ang naapektuhan sa insidente sa kahabaan ng Silver St., Moralla Industrial Park, Barangay Libtong, Meycauayan, Bulacan.

“Per recent status update, two were found dead upon retrieval, one has been found alive, and one still missing as operation continues,” pahayag ng BFP.

Patuloy naman ang BFP na nagsasagawa ng search, rescue, at retrieval operations sa pinangyarihang lugar. Inaalam na rin ng mga awtoridad ang dahilan at sanhi ng pagguho ng istraktura.

60-anyos na lalaki patay sa sunog sa Maynila

ni Lolet Abania | June 1, 2022

Isang senior citizen ang nasawi matapos sumiklab ang sunog sa isang residential area sa Sta. Mesa, Manila ngayong Miyerkules ng madaling-araw.

Ayon sa Bureau of Fire Protection (BFP), alas-4:30 ng madaling-araw nagsimula ang sunog sa kahabaan ng V. Mapa Street, kung saan namatay ang 60-anyos na lalaki.

Nagising na lang ang mga residente nang kalampagin ng isang kapitbahay ang kanilang mga pinto para ipaalam sa mga itong nasusunog na ang kanilang mga bahay.

Marami sa kanila ang hindi na nailigtas ang ilang kasangkapan dahil kumalat na ang apoy sa mga kabahayan. Alas-5:53 ng madaling-araw, idineklara naman itong fire out ng BFP. Patuloy pang iniimbestigahan ng mga awtoridad ang dahilan at sanhi ng sunog.

Sa pagtaya ng BFP, aabot sa P500,000 ang halaga ng pinsala sa mga ari-arian ang naturang sunog.

80 pamilya nasunugan sa Malabon City

ni Lolet Abania | May 5, 2022

Umabot sa tinatayang 80 pamilya ang nawalan ng tirahan sa nangyaring sunog sa Malabon City ngayong Huwebes nang madaling-araw.

Batay sa Bureau of Fire Protection (BFP), nasa 25 bahay umano ang natupok matapos na sumiklab ang sunog bandang alas-2:00 ng madaling-araw.

Ayon kay Senior Fire Officer 4 Rizaldy Evangelista, nagsimula ang sunog sa ikalawang palapag ng isang tirahan sa Barangay Catmon, Malabon, habang mabilis na kumalat ang apoy sa mga katabing bahay na pawang mga gawa sa mga plywood at yero.

Sinabi naman ng BFP, walang nai-report na nasawi o nasugatan sa insidente.

Patuloy na inaalam ng mga awtoridad ang naging dahilan ng sunog.