Sanggol, nadale rin 11-anyos patay sa sunog sa Taguig City

ni Lolet Abania | December 13, 2021

Patay ang 11-anyos na batang babae habang isang 8-buwan-gulang na sanggol ang nagtamo ng mga paso sa katawan matapos ang sunog sa Taguig City, ayon sa Bureau of Fire Protection-National Capital Region (BFP-NCR) ngayong Lunes.

Ayon sa spot report ng BFP, sumiklab ang sunog sa isang residential area sa J. Ramos Street Barangay Ibayo Tipas bandang tanghali ngayong Lunes. Itinaas sa unang alarma ang sunog at tumagal ito ng halos isang oras.

Umabot naman sa 23 trak ng bumbero ang dumating na tuluyang naapula ang apoy bandang alas-12:55 ng hapon, ayon pa sa report ng BFP.

Hindi naman binanggit sa report ang pangalan ng 11-anyos na batang babae na namatay sa sunog, habang ang 8-buwan-gulang na sanggol ay nagtamo ng 1st at 2nd degree burns sa pareho niyang itaas at ibabang extremities.

Ayon pa sa BFP nasa tinatayang P150,000 halaga ng ari-ari ang napinsala matapos ang sunog habang 10 pamilya ang apektado. Patuloy naman ang BFP sa pag-iimbestiga sa naging dahilan at pinagmulan ng sunog.

Pasig City General Hospital, nasunog

ni Lolet Abania | May 12, 2021

Nilamon ng apoy ang Pasig City General Hospital sa Maybunga, Pasig City ngayong Miyerkules nang umaga. Ayon sa Bureau of Fire Protection-National Capital Region, nagsimula ang sunog sa storage room ng ospital na nasa ikaapat na palapag.

Sa ulat ng BFP-NCR, itinaas ang sunog sa unang alarma nang alas-10:33 ng umaga habang ang ikalawang alarma ay alas-11:00 ng umaga hanggang sa umabot sa ikatlong alarma nu'ng alas-11:09 ng umaga.

Agad namang inilipat ang mga pasyente sa ibang bahagi ng nasabing ospital.

Ayon kay Robert Romba, nakatalaga sa procurement and materials management office ng ospital, nasa storage room ang kanilang mga medical supplies gaya ng syringes, dialysis solution, formalin, alcohol, detergent powder, mga unan at kumot ng ospital. Idineklarang kontrolado na ang sunog eksaktong alas-1:19 ng hapon, ayon sa BFP-NCR.