6 lugar nagpositibo sa toxic red tide – BFAR

ni Lolet Abania | May 14, 2022

Ipinahayag ng Bureau of Fisheries and Aquatic Resources (BFAR) na ang mga shellfish na nakolekta mula sa anim na mga lugar ay nagpositibo sa test para sa paralytic shellfish poison o toxic red tide.

Ayon sa BFAR, ang lahat ng uri ng shellfish at Acetes sp. o alamang na nakolekta ay hindi ligtas na kainin mula sa mga sumusunod na lugar:

• coastal waters ng Bolinao, Pangasinan;

• coastal waters ng Dauis at Tagbilaran City, Bohol;

• Dumanquillas Bay sa Zamboanga del Sur;

• coastal waters ng Milagros, Masbate;

• Litalit Bay, San Benito, Surigao del Norte;

• Lianga Bay sa Surigao del Sur

“Fish, squids, shrimps, and crabs are safe for human consumption provided that they are fresh and washed thoroughly, and internal organs such as gills and intestines are removed before cooking,” pahayag ni BFAR National Director Commodore Eduardo Gongona sa isang advisory.

Biyaya sa magsasaka at mangingisda... Higit 161-M agri-fishery projects, kaloob sa Ilocos Norte – DA

ni Zel Fernandez | May 3, 2022

Malugod na ipinamahagi ng Department of Agriculture (DA) ang tinatayang P161.32 milyong halaga umano ng mga agri-fishery development projects sa iba’t ibang asosasyon ng mga magsasaka at kooperatiba sa Ilocos Norte.

Pinangunahan ni Sec. William Dar at Ilocos Norte Governor Matthew Joseph Manotoc ang paggawad at pamamahagi ng iba’t ibang post-harvest facility, irigation network services kabilang ang mga productions inputs para sa mga magsasaka at mangingisda mula sa una at ikalawang distrito ng lalawigan.

Ayon sa DA, sa pangkalahatan ng naturang proyekto, ang serbisyong irigasyon ang may pinakamalaking halaga na aabot umano sa mahigit P50 milyon.

Kaugnay nito, limang DA attached agencies ang naggantimpala ng iba’t ibang kaukulang proyekto sa mga magsasaka at mangingisda na tinatayang aabot naman sa higit P80 milyon.

Gayundin, nasa mahigit P20 milyon naman anila ang ipinamahagi mula sa Bureau of Fisheries and Aquatic Resources (BFAR), habang mahigit P600 libo naman ang nanggaling sa Philippine Rice Research Institute (PhilRice) at Philippine Crop Insurance Corporation (PCIC).

Kasunod ng mga suportang ipinagkakaloob ng ahensiya sa pagpapabuti ng pagsasaka at pangingisda sa Ilocos Norte ay nagpasalamat naman si Gov. Manotoc sa mga interbensyong ito ng DA na pakikinabangan ng kanilang sektor sa agrikultura at pangingisda.

Babala ng BFAR... 6 na baybayin sa ‘Pinas, positibo sa red tide toxins!

ni Zel Fernandez | May 2, 2022

Nagbabala ang Bureau of Fisheries and Aquatic Resources (BFAR) sa mga residente ng 6 na baybayin sa bansa, kasunod ng pinangangambahang lason mula sa mga laman-dagat.

Batay sa inilabas na Shellfish Bulletin #8 ng BFAR, ipinatutupad ang shellfish ban matapos magpositibo sa red tide toxin ang ilang mga baybayin kabilang ang Bolinao sa Pangasinan; Milagros sa Masbate; Dauis at Tagbilaran City sa Bohol; Dumanquillas Bay sa Zamboanga del Sur; Litalit Bay sa San Benito, Surigao del Norte at Lianga Bay sa Surigao del Sur.

Kaugnay nito, nagpaalala ang BFAR na mahigpit na ipinagbabawal ang panghuhuli, pagbebenta at pagkain ng mga laman-dagat sa mga nasabing lugar dahil sa matinding panganib nito sa kalusugan dulot ng Paralytic Shellfish Poison (PSP) na isang red tide toxin.

Gayunman, nilinaw ng BFAR na maaari pa rin umanong kainin ang mga isda, pusit, hipon at alimango ngunit kailangang tiyakin na ang mga ito ay sariwa, hinugasan at nilinis nang mabuti, at tinanggalan ng mga laman-loob bago lutuin at ihain.