After ‘di matuloy ang kasal kay Paola… MAX, NIYAYA NG DINNER DATE NI RYAN BANG

ni Beth Gelena @Bulgary | September 19, 2026

Photo: IG _maxcollinsofficial & _ryanbang

Mukhang nag-level-up na ang pambobola ni Ryan Bang kay Max Collins.

Sa episode ng It’s Showtime (IS) nitong Huwebes, Setyembre 17, naging kapansin-pansin ang ginawa ni Ryan nang magkaroon siya ng pagkakataong makausap ang magandang aktres na nagsisilbing hurado sa programa.

Si Ryan ang may bitbit ng bowl of questions nang magkaroon siya ng espesyal na tanong para kay Max.

Hindi na rin pinalampas ng ‘oppa’ ang pagkakataong yayain sa dinner ang aktres. 

Kung dati ay coffee invite lamang ang usapan, nagkaroon ito ng kasunod na level.

Kaya naman, nakatawag-pansin sa mga nasa studio ang paglalakas-loob ni Ryan sa magandang hurado.

Matutuloy kaya ang dinner na inialok ni Ryan kay Max? 

Handa na kayang magka-GF uli ang binatang Koreano after maudlot ang kasal nito kay Paola Huyong?

Abangan ang susunod na kabanata!

---

NAPANSIN ng mga netizens ang magaan at nakakaaliw na palitan ng mensahe sa Instagram (IG) ni Jodi Sta. Maria at ng dating asawa niyang si Pampi Lacson tungkol sa kanilang anak.

Nagbahagi si Pampi ng throwback photo ng anak nila ni Jodi na si Thirdy, na makikitang karga ang kanyang nakababatang kapatid na si Hiromi Aiko Eve (anak naman ni Pampi sa partner na si Iwa Moto).

Kalakip ng larawan ang sentimental na caption ni Pampi: “They say that no matter how old you become, when you are with your siblings, you revert back to childhood @iamthrds @hiromi.aiko.eve.”

Hindi naman nakaligtas sa paningin ni Jodi ang cute na throwback photo kaya nag-iwan siya ng komento.

Sey ng aktres, “Cute nila.”

Agad itong sinagot ni Pampi at nakipagbiruan sa dating asawa.

Comment nito (as is): “@jodistamaria Oo, Jodz, mga panahong cute pa silang dalawa d’yan. Pero ngayon, nakaka-tacute (takot+cute) na.”

Naki-join din si Iwa sa kanilang masayang palitan, na sinundan ni Pampi ng biruan tungkol sa kanilang anak na si Mimi.

Aniya, “@iam_iwa nakakatakot ‘pag maglalambing si Mimi, eh, ibig sabihin may iuutos. Hahaha!”

Humirit naman si Jodi, “@iampampi Hahaha! Ikaw talaga.”

Dahil sa naturang exchange, muling napansin ang maayos at magaan na samahan nina Jodi, Pampi at Iwa, partikular sa pakikitungo nila sa isa’t isa bilang mga magulang at bahagi ng isang blended family.

Matatandaang naging panauhin din noon si Iwa sa Fast Talk with Boy Abunda (FTWBA), kung saan napag-usapan ang pagkakaibigan nila ni Jodi.

Ibinahagi ni Iwa na naging malapit sila sa isa't isa ng aktres at malaking bahagi ng kanilang pagkakaibigan ang pagmamahal nila kay Thirdy.

Mas pinili ang Asian Games kesa WTA China Open… ALEX EALA, TAGILID MAGMULTA NG P620K, SEN. TULFO, TO THE RESCUE

ni Beth Gelena @Bulgary | September 18, 2026

Photo: IG _alex.eala & _raffytulfoinaction

Posibleng umabot sa $10,000 o tinatayang P620,000 ang multa kay tennis star Alex Eala mula sa Women’s Tennis Association (WTA) matapos niyang piliing kumatawan sa Pilipinas sa Asian Games kaysa lumahok sa WTA China Open.

Sa ngayon, hinihintay pa ang desisyon ng WTA sa hiling na exemption ng Philippine Tennis Association (PHILTA) para kay Eala. Wala pang ipinapataw na multa, ayon sa mga ulat noong Setyembre 14, habang patuloy ang pag-uusap tungkol sa kanyang paglahok sa Asian Games.

Dahil dito, nanawagan si Sen. Erwin Tulfo na tulungan ng gobyerno si Eala sakaling ipataw sa kanya ang naturang penalty.

Sa kanyang privilege speech, sinabi ni Tulfo na hindi dapat pasanin ni Alex nang mag-isa ang posibleng multa dahil pinili nitong kumatawan sa bansa.

“If she is being fined because she chose to represent our people, isn’t it only right that the government extends its assistance or support to her?” ani Tulfo.

Ayon pa sa senador, maaaring malaking halaga ang multa para kay Eala, pero iba ang halaga ng pagkakataong katawanin ang Pilipinas sa international stage.

Aniya pa, “May be a significant amount, but compared to the honor of having one of our best athletes represent our country, I believe it is a price worth paying for.”

Nauna nang humingi ng exemption ang PHILTA sa WTA para kay Eala. 

Samantala, tiniyak ng PHILTA na tutuloy sa Asian Games ang Pinay tennis star habang hinihintay ang desisyon ng WTA.

Sinabi rin ni Philippine Olympic Committee President Abraham Tolentino na may sariling rules ang WTA at may katapat na penalty ang paglabag dito.

“The WTA has its rules and breaking the rules has penalties,” he said. 

Aniya pa, “But Alex will be in Nagoya, for the flag and country.”

Nakakuha na noon si Eala ng bronze medal sa singles at mixed doubles nang kumatawan siya sa Pilipinas sa 2022 Asian Games.

Samantala, nanindigan si Tulfo na hindi dapat mapunta sa sitwasyon si Eala na kailangang mamili sa pagitan ng kanyang professional career at paglalaro para sa bansa.

Sey niya, “We should not put Alex in a situation where she has to choose. She chose to play for the Philippines instead of her professional career. She should not have to carry that burden alone.”

---

Inspirasyon ng mga Pinoy sa sports…

PACQUIAO, BINIGYAN NG HONORARY DEGREE NG PNU

Ipinakita ni Jinkee Pacquiao ang kanyang pagmamalaki sa asawang si Manny Pacquiao matapos nitong makamit ang panibagong academic milestone.

Noong Miyerkules (Setyembre 16), ibinahagi ni Jinkee sa kanyang social media account ang ilang larawan mula sa seremonya ng paggawad kay Manny ng honorary Doctor in Physical Education and Sports degree ng Philippine Normal University (PNU).

Ginawaran si Manny ng honorary degree bilang pagkilala sa kanyang mga kontribusyon sa larangan ng sports at sa kanyang pagbibigay-inspirasyon sa mga Pilipino.

Sa caption, sey ni Jinkee: “I’m so incredibly proud of you, Sec. @mannypacquiao.”

Nagpasalamat din siya sa PNU para sa pagkilalang ipinagkaloob kay Manny.

Aniya, “To God be all the glory! Thank you Philippine Normal University!”

Ang honorary degree ay dagdag sa mahabang listahan ng mga tagumpay ni Pacquiao, hindi lamang sa boxing kundi maging sa iba pang larangan.

Du’n daw magkakaalaman… GERALD, IDEAL DATE ANG CAMPING PARA MA-TESTING ANG BABAE

ni Beth Gelena @Bulgary | September 17, 2026

Photo: Gerald Anderson-IG @andersongeraldjr

Hindi nagmamadali si Gerald Anderson na muling umibig. Sa ngayon, mas focused muna siya sa iba pa niyang mga ginagawa sa buhay, gaya ng negosyo at career.

Isa sa mga bago niyang negosyo ang Trivera powered by SOLORA, isang glamping resort sa Zambales. 

Tungkol sa posibilidad na magkaroon muli ng pag-ibig, sey ni Gerald, “Tingnan natin, darating ‘yan. Just like anything else, manifestation. You have to manifest. Right now, I am manifesting about the West Philippine Sea, about business, about career. ‘Di minamadali.”

Nang tanungin naman kung ano ang estado ng kanyang puso, pabirong sagot niya, “Bayani naman s’ya [puso ko], bayani pa rin s’ya.”

Samantala, mas gusto raw niyang mag-camping nang mag-isa. Para sa aktor, maaari rin itong maging magandang idea para sa isang date.

Aniya, “Mas okay kung solo, pero kung may kasama, dapat cowboy. Ideal date ko s’ya kasi ru’n mo malalaman ano’ng klaseng tao kayo. ‘Pag medyo mahirap, uncomfortable.”

Kabilang sa mga pinakabagong proyekto ni Gerald ang Pusong Bayani, isang online reality series tungkol sa West Philippine Sea (WPS).

Ibinahagi niya kung gaano kalaki ang naging epekto sa kanya ng proyekto.

Aniya, “It was very life changing and inspiring. Before this, mahilig ako mag-research ng documentary sa WPS. I really hope and pray na mapanood s’ya ng mas maraming tao. Sana ngayon pa lang, makapanood sila para ma-realize nila ang nangyayari.”

---

After ng hiwalayan nila… 

SIGAW NG EX NI RYAN BANG: CHARMING IN PUBLIC, IBANG-IBA ‘PAG WALA NANG CAMERA

NAGBIGAY ng curiosity sa mga netizens ang dating fiancée ni Ryan Bang na si Paola Huyong matapos siyang magbahagi ng ilang cryptic reposts sa social media.

Ang mga reposts nito ay tungkol sa mga taong tila friendly, charming at kagalang-galang sa publiko, ngunit maaaring iba ang ipinapakita kapag nasa pribadong sitwasyon na.

Wala namang binanggit na pangalan si Paola at hindi rin niya ipinaliwanag kung sino o ano ang tinutukoy ng kanyang mga posts.

Isa sa mga quote cards na kanyang ibinahagi ay may nakasulat na: “They’re charming in public, respected by everyone, generous, funny, and the first to offer help. They know exactly how to protect their reputation while destroying someone else’s peace behind closed doors.”

Ito pa ang isa: “They’re extremely good at making everyone else feel comfortable, except for the people they are already close to. That is why people struggle to believe women when they finally speak. They say, ‘They were always the nicest to me.’ And that’s the whole point.

“Some people wanna look like a good person. Being one cost more. Some people don’t wanna do better. They just don’t wanna look bad. A clean reputation don’t (sic: doesn’t) automatically mean clean hands.”

Hindi malinaw kung ano ang intensiyon ni Paola sa pagre-repost ng mga naturang mensahe. Ang mga posts ay napansin ilang buwan matapos kumpirmahin ni Ryan noong Hunyo, 2026 ang kanilang paghihiwalay after engagement.

Well, parinig kaya ito sa kanyang ex-fiancé?

---

TOM, SPOTTED DAW NA KASAMA ANG MAG-INA SA TAGAYTAY 

MULING napag-usapan online ang personal na buhay ng aktor na si Tom Rodriguez matapos maglabas ng blind item ang isang online entertainment website.

May headline itong: “Is She the Wife of Tom Rodriguez and Mom of His Child?”

Kasama sa post ang mga larawan na sinabing mula sa Instagram accounts na @akosimangtomas at @bundleofjoystudioph.

Tinanong sa blind item kung ang babaeng kasama ni Tom ay ina ng kanyang anak, ngunit walang direktang kumpirmasyon mula sa aktor.

Kaya naging aktibo ang mga netizens sa comment section. May ilan na nagsabing nakita umano nila si Tom at ang babae kasama ang isang bata.

Isang commenter naman ang nagsabing nakita rin umano nila ang dalawa sa Rosario, Tagaytay, at napansin daw na hands-on si Tom sa pag-aalaga ng anak.

Aniya, “She is cute. I saw them, very western looking. Si Tom, mukhang nag-e-enjoy being a dad kasi karga ‘yung bata at nilalaro n’ya.”

Ang mga pahayag ay mula lamang sa mga anonymous commenters at wala pang opisyal na kumpirmasyon mula kay Tom.

Sa kabila ng iba’t ibang reaksiyon, meron ding mga netizens na nagsabing mas mabuting respetuhin ang privacy ng aktor, pati na ang pamilya nito.